Exodu
33 Tsëpitanam Teyta Jehoväqa Moisesta kënö nirqan: “Abrahanta, Isaacta y Jacobtam, ‘kastëkikunatam kë markakunata entregashaq’+ nirnin änirqä. Tsëmi Egiptupita apamunqëki sirwimaqnïkunata tsë markakunaman pushanëki. 2 Qamkunata pushayäshunëkipaqmi angelnïta mandamushaq.+ Y cananeu, amorreu, hitïta, perizïta, heveu y jebuseu nunakunata markankunapita qarquyänëkipaqmi yanapayashqëki.+ 3 Pëkunapa markankunachöqa lichipis, mielpis mëtsikam kan.+ Peru mana wiyakoq kayaptikim+ qamkunawan ëwashaqtsu, tsënöpa cöleratsiyämaptiki qamkunata mana wanutsinäpaq o wañutsinäpaq”.+
4 Teyta Dios tsënö ninqanta wiyarmi israelïtakunaqa alläpa llakikuyarqan, y manam mëqampis jöyankunata churakuyarqantsu. 5 Tsëpitanam Teyta Jehoväqa Moisesta nirqan: “Israelïtakunata këta nï: ‘Qamkunaqa mana wiyakoqmi kayanki,+ munarninqa juk rätullachömi qamkunata ushakäratsïman.*+ Tsëmi qamkunawan imata ruranäpaq kaqta pensanqäyaq jöyëkikunata churakuyänëkitsu’”. 6 Tsëmi israelïtakunaqa Horeb jirkachö këkarnin jöyankunata jipikuyarqan, y manam yapëqa churakuyarqannatsu.
7 Tsëpitanam Moisesqa campamentupita karuman carpanta* apakurqan, y juntakäna carpa nirmi jutin churarqan. Y pï nunapis Teyta Jehoväta imatapis tapukuyta munarqa,+ tsë carpamanmi ëwaq. 8 Moises carpanman* ëwaptinqa, yëkunqanyaqmi llapan israelïtakuna carpankuna yëkunampita rikaräyaq. 9 Juntakäyänan carpanman* Moises yëkuriptinqa, pukutë urämurmi+ carpa yëkunanman churakäreq, y Teyta Diosmi Moisesta parlapaq.+ 10 Juntakäyänan carpapa* yëkunanchö pukutëta rikarqa, llapan israelïtakunam carpankunapa yëkunanchö qonqurikuyaq. 11 Nunapura parlayanqannömi+ Teyta Jehoväqa Moisesta parlapaq. Y Moises campamentuman kutikuptinqa, yanapaqnin y sirweqnin+ Josuëmi+ carpachö* quedakoq. Josuëqa Nun jutiyoq nunapa tsurinmi karqan.
12 Tsënam Moisesqa Teyta Jehoväta kënö nirqan: “Qamqa, ‘sirwimaqnïkunata pushë’ nimarqunkim. Peru manam nimarqunkitsu pï yanapamänampaq kaqta. Y, ‘jutikipam reqeq,* y rikënïchöpis alli nunam kanki’ nimarqunkim. 13 Rikënikipaq alli nuna kaptïqa, imatapis imanö ruranqëkita yachëkatsillämë,+ tsënöpa qamta mas reqinaqpaq y rikënikichö imëpis alli nuna kanäpaq. Y ama qonqëtsu israelïtakuna sirwishoqnikikuna kayanqanta”.+ 14 Tsënam Teyta Diosqa, “kikïmi qamwan ëwashaq,+ y imapis mana pasashunëkipaqmi cuidashqëki”+ nirqan. 15 Tsënam Moisesqa kënö nirqan: “Noqakunawan mana ëwarninqa, ama kë sitiupita yarquyänäpaq niyämëtsu. 16 Sinöqa, ¿imanöraq nunakuna musyayanqa noqawan y israelïtakunawan kushishqa këkanqëkita? Noqawan y israelïtakunawan këkanqëkita rikarqa,+ llapan nunakunam musyayanqa jukläya kayanqäta”.+
17 Tsënam Teyta Jehoväqa, “rikënïchö alli nuna kaptiki y jutikipa reqirnikim nimanqëkinölla kë mañamanqëkitapis rurashaq” nirqan Moisesta. 18 Tsënö niptinnam Moisesqa, “mana cölerakushllapa, alläpa puëdeq kanqëkita rikärinäta permitïkamë” nirqan. 19 Tsënam Teyta Diosqa nirqan: “Puntëkipa pasarmi alläpa alli kanqäta, y noqa Jehovä imanö Dios kanqanta musyatsishqëki.+ Munanqä kaqtam shumaq tratashaq, y llakipëta* munanqä kaqtapis llakipäshaqmi”.+ 20 Y kënöpis nirqanmi: “Manam ni pï nunapis rikämarnïqa kawarnin sïguinmantsu, tsëmi cärataqa rikëta puëdinkitsu”.
21 Teyta Jehoväqa kënöpis nirqanmi: “Läduchö këkaq rumi rurinman churakë. 22 Tsëchömi makïwan tsapashqëki, puëdeq kanqäta rikätsikur puntëkipa pasanqäyaq. 23 Tsëpitanam makïta witiratsiptï waqtällata rikanki, tsënö kaptimpis, cärataqa manam rikëta puëdinkitsu”.+