Hëchus
24 Pitsqa junaq pasanqanchönam mas mandakoq sacerdöti Ananïasqa,+ markachö wakin dirigeqkunawan y Tertulu jutiyoq abogäduwan urarqan, y gobernadorman ëwëkurmi Pablupita quejakuyarqan.+ 2 Qayariyaptinnam Tertuluqa kënö nir Pabluta acusar qallëkurqan:
“Musyayämi qamrëkur yamë kawakuyanqanta y puntallapitana imamampis pensaptiki, kë nacionchö imëka allikunata rurëkäyanqanta. 3 Tsëkunataqa alläpa respetashqa Fëlix, imëpis y mëchö këkarpis alläpam agradecikuyä. 4 Peru tiempuykita mana perditsita munarmi, alli kënikichö rätulla wiyarayämänëkipaq rogakoq. 5 Këta musyanëkitam munayä: kë nunaqa nunakunatam büllatsin,+ entëru patsachömi llapan judïukunata gobiernupa contran churakätsin,+ y nazarënukuna niyanqan sectachö këkaqkunatam dirigin.+ 6 Templutapis mana limpiutam tikratsita munashqa, tsëmi prësuyarqä.+ 7 * 8 Kikiki tapuparnam acusar niyanqäkuna rasumpa kanqanta musyanki”.
9 Tsënö niptinnam judïukunaqa tsë ninqankuna rasumpa kanqanta nir acusar ushayarqan. 10 Parlanampaq peqanwan o umanwan gobernador sëñasta rurariptinnam, Pabluqa kënö nir contestarqan:
“Musyämi mëtsika watana kë nacionchö juez kanqëkita, tsëmi mana mantsakur defendikur parlakaramushaq.+ 11 Kikiki musyëta puëdinqëkinöpis, Jerusalenman Teyta Diosta adoraq witsanqäpitaqa, tsëllaran döci junaq pasarishqa.+ 12 Pëkunaqa manam templuchö piwampis discutikaqtatsu ni Teyta Diosta adorayänan wayikunachö ni markachö nunakunata büllatsir këkaqtatsu tariyämashqa. 13 Kanan höra acusamar niyanqankuna rasumpa kanqantapis manam rikätsikuyta puëdiyantsu. 14 Peru këtam sï qamta nirï, noqaqa Leychö y Teyta Diospa Willakoqninkuna Qellqayanqanchö ninqankunaman creirmi,+ pëkuna ‘secta’ niyanqanchö këkaqkuna kawakuyanqannö kawar unë kastäkunapa Diosninta sirwikä.+ 15 Noqapis kë nunakunanöllam, allita ruraqkunata y mana allita ruraqkunatapis,+ Teyta Dios kawaritsimunampaq kaqta shuyëkä.+ 16 Tsëmi Diospa y nunakunapa rikëninchö imëpis alli* concienciayoq kanäpaq kallpachakü.+ 17 Atska wata pasanqanchömi, nacionnïpaq qarëkunata apamur,+ y Diospaq pishtashqa animalkunata rupatseq shamurqö. 18 Tariyämanqan höraqa, Ley ninqannö Diospa rikëninchö limpiu karmi,+ tsëkunata rurar templuchö këkarqä. Manam mëtsika nunakunawantsu ni nunakunata büllatsirtsu këkarqä. Peru tsëchömi Asia provinciapita juk ishkë judïukuna këkäyarqan. 19 Pëkunam imapitapis acusamëta munarqa, qampa puntëkichö kanan këkäyanman.+ 20 Sinöqa këchö këkaqkuna niyämutsun, Judïukunapa Jatun Cortinchö trabajaqkunapa puntanchö këkar, ima mana allita ruranqäpita culpayoq kanqäta. 21 Noqaqa pëkunapa chowpinchö* këkar fuertipa kënö ninqällatam yarpä: ‘¡Qamkunapa puntëkikunachömi wanushqakuna kawariyämunampaq kaqman creinqäpita kanan juzguëkäyäman!’”.+
22 Tsënö kaptimpis, Rasumpa Kaq Nänipita+ alli musyaq Fëlixqa, tsë asuntuta yapëpaq dejarmi llapankunata kënö nirqan: “Soldädukunapa comandantin Lisias urämuptinmi, kë asuntuykikunata altsamushaq”. 23 Y soldädukunata mandaqtam mandarqan prësu katsinampaq, peru wakin wakinchöqa libri dejanampaq y amïgunkuna atiendiyänanta permitinampaqpis.
24 Tsëpita juk ishkë junaqtam Fëlixqa judïa warmin Drusïlawan charqan, y Pabluta qayëkatsirmi Cristu Jesusman creikuypita parlapanqanta wiyakurqan.+ 25 Peru alli kaqta rurëpaq, controlakuyta yachëpaq y shamoq tiempuchö juiciupaq+ Pablu parlaptinmi, Fëlixqa alläpa mantsakar, “kananqa ëwakuyna, yapëchö tiempü kaptinnam qayatsishqëki” nirqan. 26 Pëqa Pablupita qellëta chaskita munarmi, pëwan parlanampaq cada vez mas seguïdu qayatseq. 27 Ishkë wata pasariptinqa, Fëlixpa rantinmi Porciu Festu gobernador yëkurqan. Peru judïukunawan alli quedëta munarmi+ Fëlixqa Pabluta prësurëkaqta dejarqan.