Mateu
20 Teyta Diospa Gobiernunqa, üvas chakranchö trabajatsinampaq peonkunata contrataq tempränulla ëwaq nunanömi.+ 2 Juk junaqpita juk denariuta* paganampaq pëkunawan parlaskirmi, üvas chakranman trabajaq mandarqan. 3 Las nuëvi de la mañänanö* ëwarnam, rantikuyänan pampachö trabäjunnaq këkaq nunakunata rikarqan. 4 Tsënam pëkunata nirqan: ‘Qamkunapis üvas chakräman trabajaq ëwayë, y chaskiyänëkipaq kaqtam pagayashqëki’. 5 Tsënö niptinmi pëkunaqa ëwayarqan. Pullan junaqnö* y las tres de la tardinö* ëwarpis, pëqa yapëmi mas nunakunata contratarqan. 6 Tsëpitanam las cincu de la tardinö* yapë ëwar mas nunakunata shëkaqta* tarir kënö nirqan: ‘¿Imanirtan entëru junaq trabajayarqunkitsu?’. 7 Pëkunanam, ‘mana ni pï contratayämashqa kaptinmi’ niyarqan. Tsënam pëqa, ‘qamkunapis üvas chakräman trabajaq ëwayë’ nirqan.
8 Inti o rupay jeqëkaptinnam, üvas chakrayoq nunaqa trabajaqkunata rikaqta kënö nirqan: ‘Peonkunata qayëkur trabäjunkunapita paguëkuy,+ qepata yëkoqkunapita qallëkur puntata yëkoqkunachö pagar ushë’. 9 Y las cincu de la tardi* trabajaq yëkoqkunam, cada ünu juk denariuta* chaskiyarqan. 10 Tsëmi puntata yëkoqkunaqa, masta chaskiyänampaq kaqta pensayarqan, peru pëkunatapis juk denariullatam* pagarqan. 11 Pägunkunata chaskirirqa üvas chakrayoq nunapaqmi quejakur qallëkuyarqan, 12 kënömi niyarqan: ‘¡Qepata yëkamoqkuna juk höralla trabajëkäyaptinmi qamqa noqakunatanö igual pagarqunki, noqakunaqa entëru junaq y alläpa achachëchö trabajëkäyaptï!’. 13 Tsënam pëqa, pëkunapita jukninta kënö nirqan: ‘Amïgu, qamtaqa manam ima mana allitapis rurëkaqtsu, ¿manaku juk denariuta* paganaqpaq parlarqantsik?+ 14 Tsëqa päguykita chaskir ëwakuy. Kë qepa yëkamoqtapis qamtanöllam igual paguëta munä. 15 ¿Manaku kikïpawanqa munanqäta rurëta puëdï? ¿O pëkunawan alli kaptïku chikikunki?’.+ 16 Tsënömi qepachö kaqkuna puntachö kayanqa, y puntachö kaqkunana qepachö kayanqa”.+
17 Jerusalenman witsëkarnam Jesusqa döci qateqninkunata juk läduman apëkur nänichö kënö nirqan:+ 18 “Rikäyë, Jerusalenmanmi witsëkantsik, tsëchömi mandakoq sacerdötikunaman y Ley qellqaqkunaman Nunapa Tsurinta entregayanqa. Pëkunam wanutsiyänampaq o wañutsiyänampaq condenayanqa,+ 19 y pëpita burlakuyänampaq, astayänampaq y qeruchö wanutsiyänampaqmi mana judïu nunakunata entregayanqa,+ y kima junaqtam kawarimunqa”.+
20 Tsënam Zebedeupa+ tsurinkunapa mamäninqa, ishkan wamrankunawan Jesusman witïkur juk favorta mañakunampaq puntanman qonqurikurqan.+ 21 Tsënam Jesusqa, “¿imatataq munanki?” nir tapurqan. Tsënam pëqa, “ishkan wamräkuna Gobiernuykichö juknin derëcha läduykiman y jukninna izquierda läduykiman täkuyänampaq änïkamë” nirqan.+ 22 Tsënam Jesusqa nirqan: “Qamkunaqa manam musyayankitsu imata mañakuyanqëkita. ¿Puëdiyankiku upunäpaq kaq cöpapita upuyta?”.+ Pëkunanam, “puëdiyämi” niyarqan. 23 Tsënam pëqa kënö nirqan: “Awmi, cöpäpitaqa qamkunapis upuyankim,+ peru derëcha lädüman o izquierda lädüman pï täkunampaq kaqtaqa manam noqatsu dispunï, tsëkunaqa Teytä akranqan kaqkunapaqmi”.+
24 Tsëta musyëkurnam chunka qateqninkunaqa tsë ishkan wawqipaq alläpa cölerakuyarqan.+ 25 Peru Jesusqa llapankunata juntëkurmi kënö nirqan: “Qamkunaqa musyayankim nacionkunata gobernaqkunaqa munayanqanmannö nunakunata gobernayanqanta, y autoridäkunaqa nunakunata mandädunchö katsiyanqanta.+ 26 Peru qamkunaqa manam tsënötsu kayänëki.+ Tsëpa rantinqa, mëqëkipis mas carguyoq këta munarqa, wakinkunapa sirweqninkunam kayänëki,+ 27 y mëqëkipis puntachö këta munarqa, wakinkunapa sirweqninkunam kayänëki.+ 28 Tsëtam Nunapa Tsurimpis rurashqa. Pëqa manam sirwiyänampaqtsu shamushqa, sinöqa nunakunata sirwinampaq+ y vïdanwan pagakur mëtsikaqta salvanampaqmi”.+
29 Jericöpita ëwakuptinnam, mëtsika nunakuna qepanta ëwayarqan. 30 Y ishkaq wisku o qapra nunakunam näni kuchunchö tëkäyarqan. Jesus tsëpa pasëkanqanta wiyarmi fuertipa kënö niyarqan: “¡Teytë, Davidpa Tsurin, llakipëkayämë!”.*+ 31 Tsënam nunakunaqa upälla kayänampaq qayapäyarqan, peru pëkunaqa mas fuertiparan, “¡Teytë, Davidpa Tsurin, llakipëkayämë!”* niyarqan. 32 Tsënam Jesusqa shäkurir* pëkunata qayëkur, “¿qamkunapaq imata ruramunätataq munayanki?” nirqan. 33 Tsëmi pëkunaqa niyarqan: “Teytë, nawilläkuna rikäyänantam munayä”. 34 Tsënam Jesusqa alläpa llakiparnin* nawinkunata yatëkurqan,+ y tsë höram nawinkunaqa rikar qallëkurqan, y Jesuspa qepantam ëwakuyarqan.