1 Timoteu
6 Sirwipakoq kaqkunaqa, llapan shonqunkunawan duëñunkunata respetayätsun,+ tsënöpa Teyta Diospa jutimpita y yachatsikunqampita mana allita mana parlayänampaq.+ 2 Creikoq duëñuyoq kaqkunaqa, ama creikoq mayinkuna* kaptin pëkunata mana respetakoq kayätsuntsu. Tsëpa rantinqa, alli sirwiyanqanta provechaqkuna creikoq mayinkuna y kuyë wawqinkuna kaptinmi, mas alli sirwiyänan.
Qamqa tsëkunata yachatsikur y consejakur* sïgui. 3 Pï nunapis jukta yachatsikurqa, y Señornintsik Jesucristu allita* yachatsimanqantsikwan+ y Teyta Diosta imanö sirwinapaq yachakunqantsikwan mana acuerdu karqa,+ 4 alläpa orgullösum tikrashqa y manam imatapis entiendintsu.+ Palabrakuna asuntu discutita y pelyëtam alläpa gustan.*+ Tsëkunaqa chätsikun envidiaman, pleytuman, calumniaman,* jukkunapaq mana allita pensëman, 5 y mana alli pensëyoq y rasumpa kaqta mana entiendeq nunakunapa culpan mana kaqlla asuntukunapita imëpis discutiman.+ Pëkunaqa imatapis tarita munarllam, llapan shonqunkunawan Teyta Diosta sirwita munayan.+ 6 Rasunmi, kapamanqantsikllawan kushishqa kawakur llapan shonquntsikwan Teyta Diosta sirwirqa, imëka allikunatam tarintsik.+ 7 Kë munduchö yurikurqa manam imata apamurqantsiktsu, y wanukurpis manam imata apashuntsu.+ 8 Tsëmi mikuynintsik y röpantsik* kaptinqa, tsëkunawan kushishqa kashun.+
9 Tsënö kaptimpis, imëkanöpa rïcu këta munaqkunaqa, tentacionman y trampaman,+ y juiciunnaq y mana allita rurakoq munëkunamanmi ishkiyan, y tsëkunam mana allikunaman y ushakëman chätsin.+ 10 Awmi, qellëta kuyëqa imëka mana allikunamanmi chätsikun, y qellëta kuyarmi wakinkunaqa creikuyanqanta dejayashqa, y imëka sufrimientukunata pasayashqa.+
11 Peru qam Teyta Diospa sirweqninqa, tsëkunapita cuidakuy.* Tsëpa rantinqa, alli kaqta ruranqëkita, llapan shonquykiwan Diosta sirwinqëkita, markäkoq o yärakoq kanqëkita, kuyakoq kanqëkita, alli tsarakoq kanqëkita y yachanëpaq kanqëkita rikätsikunëkipaq kallpachakuy.+ 12 Cristiänukuna creiyanqanta defendinëkipaq alli pelyë. Chaskinëkipaq qayashqa kanqëki y mëtsika nunakunapa rikëninchö alli musyatsikunqëki imëyaqpis kawëpita següru kë.
13 Llapan imëkata kawëkaqta katseq Teyta Diospa, y testïgunö Diospa gobiernumpita Ponciu Pilätuta+ alli cläru musyatseq Cristu Jesuspa puntanchömi qamta mandaq, 14 Señornintsik Jesucristu rikakunqan* tiempuyaq, shumaq y imapitapis mana parlashqa, tsë mandamientuta cäsukunëkipaq.+ 15 Tsëtaqa kushishqa y japallan Alläpa Puëdeqmi tsëpaq dispunishqa tiempuchö rikätsikunqa. Pëqa gobernaqkunapa Gobernaqninmi y señorkunapa Señorninmi.+ 16 Pëllam mana ushakaq kawëyoqqa,+ y alläpa chipapëkaq y espantëpaq sitiuchö kawaptinmi pï nunapis pëman witita puëdintsu.+ Pëtaqa manam pï nunapis rikashqatsu ni rikëta puëdintsu.+ Pë alläpa respetashqa y imëyaqpis alläpa puëdeq katsun. Tsënö kallätsun.*
17 Kanan witsanchö* rïcukunata këkunata mandë: wakinkunapita mas alli kayanqanta mana pensayänampaq,* y mana confiakuypaq rïcu këman mana markäkuyänampaq o yärakuyänampaq,+ sinöqa kushishqa kanampaq imëkatapis atska atskata qaramaqnintsik Teyta Diosman markäkuyänampaq.+ 18 Pëkunata nï, alli kaqta rurayänampaq, imëka allikunata rurayänampaq, atska atskata qarakoq kayänampaq y wakinkunata imëkankunata rakiyänampaq listu këkäyänampaq.+ 19 Tsëta rurarmi Teyta Diospita imëka väleqkunata chaskiyanqa, awmi shamoq tiempuchömi alli kawayanqa,+ tsënömi rasumpa alli kawëpita següru kayanqa.+
20 Timoteu, Teyta Diosta deshonrar parlayanqampita y rasumpa kaqpa contran yachatsikuyanqampita cuidakur,+ carguykichö këkaqta cuidë.+ 21 Tsëta musyayanqampita allish tukurmi, wakinkunaqa creikuyanqanta dejayashqa.
Teyta Dios qamkunawan alläpa alli këkutsun.