Levïticu
26 Noqa Jehovä Diosnikikuna kaptïmi, mana imapaqpis väleq santukunata rurayänëkitsu+ ni manam llaqllashqa santukunata+ ni sagrädu postikunata jawiyänëkitsu, y manam adorayänëkipaq+ rumipita santukunata+ markëkikunaman churayänëkitsu. 2 Säbadu junaqpaq mandakunqätam cumpliyänëki, y carpa* wayïtam llapan shonquykikunawan respetayänëki. Noqam Jehovä Diosnikikuna kä.
3 Mandakunqänö kawayaptiki, y leynïkunata cäsukuyaptikiqa,+ 4 tiempunchö tamyatsimuptïmi+ imëka wayunqa,+ y früta plantakunapis wayuyanqam. 5 Trïgu cosëchapis üvas cosëchayaqmi kanqa, üvas cosëchapis murukuy witsanyaqmi kanqa. Pacha juntam mikuyanki, y yamëmi kawakuyanki.+ 6 Markëkikunachömi yamë kawakuyanki,+ punukurpis manam imatapis mantsayankitsu.+ Manam mikukoq animalkunapis markëkikunachö kanqatsu, manam ni pï qamkunawan pelyaq shamunqatsu. 7 Qeshpir ëwakoq chikishoqnikikunatam taripëkur espädawan ushakätsiyanki. 8 Pitsqaqmi cien chikiyäshoqnikikunata qatipayanki, y cienmi diez mil chikiyäshoqnikikunata qatipayanki, y espädawanmi chikishoqnikikunata wanutsiyanki.+
9 Bendiciyapteqmi mëtsika wamrayoq kar atskaq tikrayanki,+ y qamkunawan ruranqä acuerdutam cumplishaq.+ 10 Pasaq watachö cosechayanqëkita manaraq mikur ushayaptikim, tsëllaraq cosechayanqëkita churayänëkipaq pasaq watapita sobranqanta jitariyänëki. 11 Carpa* wayïtam qamkuna këkäyanqëkiman churamushaq,+ manam qamkunata qonqayashqëkitsu. 12 Diosnikikunam kashaq, y qamkunawanmi këkäshaq,+ qamkunaqa sirwimaqnïkunam kayanki.+ 13 Noqam Jehovä Diosnikikuna kä, noqam Egiptuchö esclävu kayanqëkipita pushamurqä,* y libri kayänëkipaqmi yanaparqä.*
14 Tsënö kaptimpis, mandakunqäkunata mana wiyakur y mana cäsukur,+ 15 y ninqäkunata mana wiyakur,+ mandakunqäkunata mana cäsukur leynïkunata mana kaqpaq churarqa y qamkunawan ruranqä acuerduta mana respetarqa,+ 16 imëka llakikuykunapam pasayanki, tïsicu* y fiebri qeshyatam qamkunam chätsimushaq. Tsëkunapa pasayaptikim nawikikunapis rikanqanatsu, y kallpëkikunapis ushakanqa. Murukuyanqëkitapis chikiyäshoqnikikunallam mikuyanqa,+ tsëmi ardëlla* imatapis muruyanki. 17 Qamkunapa contrëkikunam churakäshaq, y chikiyäshoqnikikuna venciyäshurnikim+ munayanqanta rurayäshunki.+ Mana qatikachëkäyäshuptikim qeshpir ëwakuyanki.+
18 Tsëpis mana cäsuyämaptikiqa, jutsata* rurayanqëkipitam qanchis kuti mas castigayashqëki. 19 Allish tukoq kayanqëkitam ushakätsishaq, manam ciëlupis tamyamunqatsu,* patsachöpis manam ni ima kanqatsu.*+ 20 Chakrakunachö plantakunapis manam wayunqatsu, y manam imapis patsachö kanqatsu,+ tsëmi kallpëkikunatapis ardëlla* ushayanki.
21 Y tsëpis conträ churakar sïguiyaptiki y mana cäsuyämaptikiqa, jutsata* rurayanqëkimannömi qanchis kuti mas castigayashqëki. 22 Wätayanqëki animalkunata y tsurikikunata ushakätsinampaqmi,+ mikukoq animalkunata mandamushaq.+ Tsëmi wallkaqllana kayaptiki puriyanqëki nänikunapis tsunyaq kanqa.+
23 Tsënö kaptimpis corregiyanqaqta mana chaskikur conträ karnin sïguiyaptikiqa,+ 24 noqapis contrëkikunam churakäshaq, y jutsata* rurayanqëkipitam qanchis kuti mas castigayashqëki. 25 Qamkunawan ruranqä acuerduta mana cumpliyaptikiqa, chikiyäshoqnikikuna qamkunawan pelyaq shayämunampaqmi permitishaq.+ Markëkikunaman cörriyaptikipis, qeshyatam apamushaq,+ y chikiyäshoqnikikunam venciyäshunki.+ 26 Tanta churakuyänëkita ushakätsiptïmi,+ chunka warmikuna juntakäyanqa juk hornullachö tantata kuwayänampaq, y balanzawan pesëkur ichikllata rakipuyäshuptikim+ pachëkikunapis juntanqatsu.+
27 Tsëpis mana wiyayämaptiki, y conträ karnin sïguiyaptikiqa, 28 masran qamkunapa contrëkikuna churakäshaq,+ y yapëmi jutsata* rurayanqëkipita qanchis kuti castigayashqëki. 29 Ollqu y warmi wamrëkikunapa ëtsantam mikuyanki.+ 30 Santukunata adorayänëki sitiukunata,+ inciensuta rupatsiyänëki altarkunatam ushakätsishaq, y patsachö jitarëkaq melanëpaq santuykikuna+ jananmanmi ayëkikunata pelashaq. Melanarmi qamkunapita witikushaq.+ 31 Markëkikunata y templuykikunatam ushakätsishaq,+ y qarëkunata rupatsiyämuptiki shumaq rupanqampis manam gustüpaqnatsu kanqa. 32 Markëkikunapis tsunyaqmi quedanqa,+ y markëkikunaman chikiyäshoqnikikuna shamurmi mantsakashqa quedayanqa.+ 33 Mëtsë nacionkunamanmi apayäshunki,+ y permitiptïmi chikiyäshoqnikikunaqa qamkunawan pelyaq espädankunawan shayämunqa.+ Tsënömi markëkikuna ushakar tsunyëkar quedanqa.+
34 Chakrëkikunata mana jamatsishqa kayaptikim, chikiyäshoqnikikunapa markankunachö kayanqëki witsan chakrëkikuna jamanqa. Awmi, mana jamatsishqa kayaptikim, tsë llapan tiempuchö jamanqa.+ 35 Markëkikunachö kayanqëki witsan chakrëkikunata mana jamatsishqa kayaptikim, markëkikuna tsunyëkar quedanqan witsan chakrëkikuna jamanqa.
36 Chikiyäshoqnikikunapa markankunachö kawëkar quedaqkunaqa,+ mantsakashqam kawayanki, plantakunapa rapranta vientu qashrarätsinqanta wiyarllam, qeshpir ëwakuyanki. Y mana qatikachëkäyäshuptikim, espädawan qatikäyäshuptikinöpis qeshpir ëwakur ishkir ushayanki.+ 37 Y mana qatikachëkäyäshuptiki qeshpir ëwayanqëkichömi, jukniki juknikikuna tanqanakur ushayanki, y manam chikiyäshoqnikikunata pärapuyta puëdiyankitsu.+ 38 Juk nacion nunakunapa markankunachömi atskaq wanuyanki o wañuyanki,+ y chikiyäshoqnikikunapa markankunachömi ushakäyanki. 39 Papänikikuna mana allita rurayanqampitam,+ kawëkar quedaqkunapita wakinnikiqa chikiyäshoqnikikunapa markankunachö sufriyanki.+ 40 Tsëkuna pasayäshuptikim, mana allita rurayanqëkita, papänikikuna mana allita rurayanqanta y mana cäsukoq kayanqanta cuentata qokuyanki.+ Y traicionamaq cuenta portakurnin conträ churakäyanqëkitam cuentata qokuyanki.+ 41 Tsënö portakuyaptikim, noqapis qamkunapa contrëkikuna churakäshaq,+ y chikeqnikikunapa markankunaman apayäshunëkitam permitishaq.+
Tsëqa capaz mana wiyakoq shonquykikuna wiyakoq tikraptin,+ mana allita rurayanqëkipita apamunqä castïguta chaskikuyanki. 42 Jacobwan,+ Isaacwan+ y Abrahanwan+ ruranqä acuerduta, y entregayänaqpaq markakunata äniyanqaqtam yarpäshaq. 43 Ninqäkunata mana wiyakur,+ y mandakunqäkunata mana kaqpaq churar mana allikunata rurayanqëkipitam sufriyanki. Markëkikunata dejayanqëki witsanmi chakrëkikuna jamanqa,+ y tsunyaqmi quedanqa. 44 Tsënö kaptimpis, chikiyäshoqnikikunapa markankunachö këkäyaptikipis, manam qonqëkuyashqëkitsu+ ni ushakätsiyashqëkitsu. Tsënö rurarqa papänikikunawan ruranqä acuerdutam cumplikämantsu.+ Noqam Jehovä Diosnikikuna kä. 45 Qamkunarëkurmi unë kastëkikunawan ruranqä acuerduta yarpäshaq.+ Pëkunatam Diosninkuna kanäpaq juk nacion nunakuna rikëkäyaptin Egiptupita pushamurqä.+ Noqam Jehovä Diosnikikuna kä’”.
46 Moiseswan israelïtakunata willatsinampaqmi, Teyta Jehoväqa kë mandakunqankunata, ninqankunata y leykunata Sinaï jirkachö patsätsirqan.+