1 Rëyes

10 Jehovä Dios yanapaptinmi+ Salomonqa alläpa yachaq karqan. Tsëta musyarirmi Säba* markachö gobernaq warmiqa imëkata tapupänampaq ëwarqan.+ 2 Pukutaq o mushkoq aceitita,+ cuestaq shumaq rumikunata y mëtsika örutam camëllukunawan cargashqa atska yanapaqninkunawan+ Jerusalen markaman charqan. Tsëchömi llapan pensashqanta gobernanti Salomonta tapuparqan. 3 Y Salomonqa llapan tapunqantam contestarqan. Pëpaqqa llapan tapunqampis fäcil-llam karqan.

4 Säba markachö gobernaq warmiqa Salomon yachaq kanqanta+ y palaciu wayita ruratsishqa kanqanta+ rikarmi alläpa espantakurqan. 5 Tsënöllam espantakurqan alli allita mikuyanqanta,+ sirweqninkuna imanö jamakuyanqanta, mikuy sirwikoqkunata, vistikuyanqanta, vïnu sirwikoqkunata y animalkunata pishtëkur Jehovä Diospaq templuchö seguïdu rupatsiyanqanta rikarnin. 6 Tsëmi gobernanti Salomonta kënö nirqan: “Imëka ruranqëkikunata* y yachaq kanqëkita nacionnïchö willayämanqanqa rasumpam kanaq. 7 Tsënö willëkäyämaptimpis kikï rikarninran creirqö. Kananmi musyarï willayämanqampitapis mas yachaq y mas kapoqyoq kanqëkita. 8 Yachaq kar shumaq parlapanqëkita wiyarnin, ¡ima kushishqaraq yanapashoqnikikuna y sirwishoqnikikunapis kayan!+ 9 Jehovä Diosniki alabashqa këkullätsun.+ Pëmi kuyashurniki Israelchö gobernanëkipaq churashurqunki. Jehoväqa israelïtakunata kuyanmi, tsëmi alli gobernanëkipaq churashurqunki”.

10 Tsënö nirmi cuatru mil cientu cuatru kïlus* öruta, pukutaq o mushkoq mëtsika aceitita+ y cuestaq rumikunata+ qararqan. Säba markachö gobernaq warmi Salomonta qaranqan mëtsika aceititanöqa manam imëpis Israelman apayarqannatsu.

11 Ofir+ sitiupita öruta apamoq Hirampa barcunkunapis, cuestaq shumaq rumikunata+ y sandalu qerutam+ mëtsikata apamurqan. 12 Tsë sandalu qerukunapitam Salomonqa, Jehovä Diospa templunchö balconkunata y palaciu wayipa balconninkunatapis ruratsirqan. Tsënöllam cantaqkunapaq arpakunata y cuerdayoq instrumentukunatapis ruratsirqan.+ Tsënö atska sandalu qerutaqa manam imëpis apayämurqannatsu ni rikäyarqannatsu.

13 Säba markachö gobernaq warmitam Salomonqa llapan mañanqanta qararqan. Tsë jananmannam kikimpa voluntänimpita masta qararqan. Tsëpitanam tsë warmiqa sirweqninkunawan markanta kutikurqan.+

14 Cada watam Salomonqa chaskirqan veintidos mil setecientus setenta y siëti kïlus* öruta.+ 15 Y impuestutapis negociuyoq nunakunapita, ärabe gobernantikunapita y Israel nacionchö gobernadorkunapitam chaskirqan. Tsënöllam kikimpa negociantinkunapis imëkata chätsiyaq.

16 Gobernanti Salomonqa öruman juk metalkunata takurkurmi+ doscientus jatusaq escüdukunata ruratsirqan (cada escüduchömi cäsi qanchis kïlunö* öru karqan).+ 17 Tsënöllam öruman juk metalkunata takurkur trescientus taksha escüdukunata ruratsirqan (cada escüduchömi ishkë kïlunö* öru karqan). Tsëpitanam Lïbanu Monti niyanqan wayiman churatsirqan.+

18 Tsënöllam Salomonqa gobernar täkunan sïllantapis marfilpita*+ rurëkatsir alli kaq öruwan laqatsirqan.+ 19 Tsë sïllapa cada lädunchömi rikran jamanampaq karqan+ y tsë lädunchömi ruratsinqan leonkuna churararqan. Y sïllaman chänampaqqa joqta grädakunam karqan y sïllapa janan tëchunam redondu karqan. 20 Cada grädapa ishkan kuchunchömi ishkë leonkuna churararqan, y llapanqa döci leonkunam karqan. Manam ni pï gobernantipapis tsënöqa kapurqantsu.

21 Gobernanti Salomonpa cöpankunaqa llapampis örupitam karqan, tsënöllam Lïbanu Monti niyanqan wayichö+ utilizanqan cösaskunapis alli kaq örupita karqan. Salomon gobernanqan witsanqa pläta metaltaqa mana valeqtanömi rikäyaq,+ tsëmi pläta metalpitaqa imatapis ruratsirqantsu. 22 Salomonqa Hirampa barcunkunawan juntum wakin barcunkunata Tarsischö katsirqan.+ Tsë barcukunaqa cada kima watatam Tarsispita öruta, pläta metalta, marfilta,*+ mönukunata y pävu realkunata Salomonpaq apayämoq.

23 Salomonqa entëru patsachö gobernantikunapitapis+ mas kapoqyoq+ y mas yachaqmi karqan. 24 Tsëmi yachaqta Dios tikratsishqa kanqanta musyarir,+ parlanqanta wiyëta munar mëtsëpita nunakuna ëwayaq. 25 Tsënö ëwarmi örupita y pläta metalpita rurashqa cösaskunata qarayaq. Tsënöllam apayaq röpakunata, armakunata, pukutaq o mushkoq aceitita, cawallukunata y mulakunatapis. Salomonqa cada watam tsëkunata chaskeq.

26 Salomonqa mastam carrëtakunata y cawallukunata* rantirqan. Tsëmi mil cuatrocientus carrëtankuna y döci mil cawallunkuna*+ kapurqan. Tsëkunataqa katsirqan carrëtakuna churaränan markakunachö y Jerusalen markachömi palaciupa amänunchö.+

27 Jerusalenman Salomonpaq apayanqan pläta metalqa lluta ruminömi mëtsika karqan, y cedru qerupis Sefelächö sicömoru hïgus montikunanömi mëtsika karqan.+

28 Salomonpa negociantinkunaqa imëpis tsë preciullachömi+ cawallukunata Egiptupita atskata rantiyämoq. 29 Egiptupita rantiyämunqan carrëtakunaqa cada ünum seiscientus pläta qellë cuestaq y cawallukunanam cientu cincuenta pläta qellë cuestaq. Tsë cawallukunatawan carrëtakunataqa hitïta nunakunapa gobernantinkunata+ y Siria nunakunapa gobernantinkunatam rantikuyaq.