Isaïas
13 Këchömi qellqarëkan Amozpa tsurin Isaïasta+ Teyta Dios revelanqan. Tsë revelacionchömi Babilonia+ nacionta ima pasanampaq kaqta rikätsirqan.
2 Teyta Diosmi nin: “Chikishoqnikikuna rikäyänampaq
mana imapis kanqan jirkachö señalta churayë.+
Dirigeqkuna yëkayämunqampa yëkayämunampaq makikikunata kuyutsir qayayë.
3 Akranqäkunatam mandarqö.+
Cöleratsimaqkunata castiganäpaqmi pelyëta yachaq
soldädukunata qayatsimurqö, pëkunaqa kushishqam këkäyan.
4 ¡Wiyayë! ¡Mëtsika nunakunam jirkakunachö këkäyan!
¡Mëtsika nunakuna juntakar büllayanqannömi wiyakan!
¡Wiyayë mëtsë nacionpita nunakuna büllayanqanta!+
Angelkunata mandaq Teyta Jehovämi guërrapaq soldädukunata qayëkätsimun.+
5 Entëru patsata ushakätsiyänampaqmi+
Teyta Jehoväwan soldädunkunaqa,
karu sitiukunapita y ciëlukunapa kuchumpita
shamuykäyan.+
6 ¡Llakikur waqayë! Nunakunata Teyta Jehovä juzganan tiempuqa chëkämunnam.
Tsë tiempuqa Llapanta Puëdeq Diosmi markëkikunachö imëkata ushakätsinqa.+
7 Tsëmi nunakunaqa alläpa mantsakar ima rurëtapis puëdiyanqatsu.+
8 Llapan nunakunam alläpa mantsakashqa këkäyan.+
Wamran yuriptin warmi nanatsikur sufrinqannömi,
nunakunaqa pasëpa sufrikäyan.
Jukninkuna jukninkunam mantsakashqa
y alläpa llakishqa rikänakuyan.
9 ¡Rikäyë! Nunakunata Teyta Jehovä juzganan tiempuqa chëkämunnam.
Tsë tiempuqa alläpa cölerarmi Teyta Diosqa pitapis llakipanqatsu.*
Inti o rupay yarqamurpis paqasyaräkunqallam,
y killapis manam aktsimunqanatsu.
11 Teyta Diosmi nin: “Patsachö kawaqkunatam
mana allita rurayanqampita cuentata mañashaq,+
y mana alli ruraqkunatam mana allita rurayanqampita castigashaq.
Allish tukoqkunapis mananam allish tukuyanqanatsu,
y wakinkunapita provechakoqkunapis penqakatsishqam kayanqa.+
12 Wanoqlla o wañoqlla nunakunaqa alli örunömi escäsu kayanqa.+
Awmi, Ofir markapita örunömi escäsu kayanqa.+
13 Noqa angelkunata mandaq Jehovämi ciëlukunata kuyutsishaq,
y alläpa cöleranqä witsanmi patsata kuyutsir sitiumpita jipishaq”.+
14 Wanutsita munayaptin qeshpir ëwakoq luychunö,*
y pï mana juntanqan üshakunanömi, llapankuna markankunaman kutiyanqa.
Cada ünum kawayanqan sitiukunaman qeshpir ëwayanqa.+
15 Llapan tariyanqan nunakunatam lanzawan wanutsiyanqa,
y qeshpir ëwaq nunakunata tariparmi espädawan ushakätsiyanqa.+
16 Rikëkäyaptikim wayikikunapita imëkëkikunata apakuyanqa,+
tsurikikunatam maqar wanutsiyanqa y warmikikunatam violayanqa”.
17 Teyta Diosmi nin: “Pëkunata ushakätsiyänampaqmi,
Mediapita nunakunata+ mandamushaq.
Pëkunapaqqa manam plätapis välintsu, y öruta tarirpis manam kushikuyantsu.
18 Flechakuyänanwanmi jövinkunata ushakätsiyanqa,+
y manam wamrakunatapis llakipäyanqatsu ni ankupäyanqatsu.
19 Wakin markakunapita Babilonia marka mas shumaq kaptinmi+
Caldëapita nunakunaqa tsëpita alabakuyan.+
Peru Teyta Dios ushakätsiptin
Sodöma y Gomörra markakuna quedayanqannömi quedanqa.+
Arabiapita nunakunapis manam tsëchö carpankunata* armayanqanatsu,
y mitsikoqkunapis manam tsëchö üshankunata dejayanqanatsu.
21 Tsëchöqa tsunyaq sitiuchö päraq chukaru animalkunallanam punuyanqa,
y wayikuna kanqanchöpis tukullanam päranqa.
Tsëchöqa avestruzkunallanam pärayanqa,+
y chukaru cabrakunallanam* wakpa këpa saltakachar-raq puriyanqa.
22 Törrinkunachöpis chukaru animalkunallanam waqayanqa,
y shumaq palaciunkunachöpis chacalkunallanam* büllayanqa.
Babilonia ushakänan junaqqa yupashqallanam këkan, y ichikllachönam chämunqa”.+