Hebrëus

5 Akrashqa mandakoq sacerdötiqa, nunakunarëkur Teyta Diospa kaqchö sirwinampaq churashqam,+ tsënöpa qarëkunata y pishtashqa qarëkunata nunakunapa jutsankunapita* Teyta Diosman apanampaq.+ 2 Pëqa, manaraq musyar imëka mana allita ruraqkunatam, kikimpis pishipaq kanqanta yarpar llakipar* tratëta yachan. 3 Tsëmi nunakunapa jutsankunapita* qarëkunata apanqannölla, kikimpa jutsankunapitapis qarëkunata apanan.+

4 Nunaqa manam kikinllapitatsu respetashqa carguman chan, sinöqa Aaronwan pasanqannömi Teyta Dios churaptinlla tsë carguta chaskin.+ 5 Tsënöllam Cristupis kikin munartsu mandakoq sacerdöti y respetashqa këman charqan,+ sinöqa, “qammi tsurï kanki y noqam kanampitaqa teytëki kashaq”+ neqmi respetashqa këman churarqan. 6 Juk läduchöpis kënö ninqannö: “Qammi Melquisedecnö imëyaqpis sacerdöti kanki. Tsë änishunqëkitaqa imëpis cumplinqam”.+

7 Patsachö kawanqan witsanqa, fuertipa qayakur y waqarmi, Cristuqa wanuypita salvëta puëdeqman rogakurqan+ y mañakurqan, y Teyta Diosta shonqupita respetanqampitam wiyashqa karqan. 8 Teyta Diospa Tsurin këkarpis, imëkata sufrishqa karmi cäsukoq këta yachakurqan.+ 9 Llapanchö alliyätsishqa kanqampitam,+ pëta llapan cäsukoqkuna imëyaqpis salvashqa kayänampaq yanapakoq këman charqan.+ 10 Tsënöqa karqan, Melquisedecnö mandakoq sacerdöti kanampaq, kikin Teyta Dios churashqa kaptinmi.+

11 Pëpitaqa imëkatam nita puëdiyä, peru qamkuna wiyayanqëkita mana ras o sas entiendeq kayaptikim tsëkunata entienditsikunanqa fäciltsu. 12 Kananyaqqa yachatsikoqnam kayankiman, peru yapëmi Diospa palabrampita qallanan yachatsikuykunata qallanampita yachatsiyäshunëkita wanayanki.*+ Yapëran lichita munayanki, y manam chukru mikuytaqa. 13 Pï nunapis lichillataraq upuykaqqa, wamrallaraq karmi alli rurëkunapaq palabrata reqintsu.+ 14 Peru chukru mikuyqa poqu nunakunapaqmi, alli pensëta yachakushqa kar, ima alli kanqanta y ima mana alli kanqanta cuentata qokuyta yachaqkunapaq.