Romänus
1 Noqa Pablupita, Cristu Jesuspa sirweqnin y apostol kanäpaq akrashqa, y Teyta Diospa alli noticiankunata willakunäpaq akrashqa.+ 2 Tsëtaqa willakoqninkunawanmi puntallapitana Palabranchö änikurqan, 3 tsëkunachöqa Tsurimpitam willakun. Pëqa Davidpa kastampitam nunanö yurirqan,+ 4 peru santu espïritupa poderninwan wanunqampita Teyta Dios kawatsimushqa kaptinmi,+ Diospa Tsurin kanqanta cläru musyantsik.+ Awmi, Señornintsik Jesucristu. 5 Përëkurmi llapan nacionkunapita+ nunakuna markäkur o yärakur cäsukuyaptin jutin respetashqa kanampaq, Teyta Dios noqawan alläpa alli kashqa y apostol kë+ carguyoq kanäta permitishqa. 6 Tsë nacion nunakunapitam qamkunapis Jesucristupa kayänëkipaq akrashqa kayarqunki. 7 Römachö Teyta Dios kuyanqan y limpiu nuna kayänampaq akrashqa kaqkunapaq:
Teytantsik Dios y Señornintsik Jesucristu qamkunawan alli këkuyätsun y yamë kayänëkipaq yanapëkuyäshuy.
8 Puntataqa, qamkuna markäkoq o yärakoq kayanqëkipita mëtsëchö parlayaptinmi, Jesucristupa jutinchö llapëkipita Teyta Diosnïta agradecikü. 9 Tsurimpita alli noticiakunata willakur llapan kawënïwan sirwinqä Teyta Diosmi musyan, qamkunapaq imëpis mañakunqäta,+ 10 y puëdikaptinqa y Dios munaptinqa, kë kaq kutichöqa qamkunaman shamunäpaq rogakunqäta. 11 Diospa kaqchö mas alli kayänëkipaqmi, Diospita ima bendicionllatapis apamunäpaq, qamkunata alläpa rikëta munä, 12 o tsëpa rantinqa, markäkoq o yärakoq kanqantsikrëkur, awmi, qamkuna markäkoq kayanqëkirëkur y noqa yärakoq kanqärëkur, juknintsik juknintsik kallpata chaskinapaq.+
13 Peru wawqikuna y panikuna këta musyayänëkitam munä, qamkuna këkäyanqëkichöpis, wakin nacionkunachönölla Jesuspa qateqnin tikrayänampaq nunakunata yanapanäpaqmi, atska kuti qamkunaman shamuyta munarqö. Peru kananyaqpis imëkam michämashqa. 14 Griëgu nunakunata y juk idiömata parlaq nunakunata,* yachaq nunakunata y juiciunnaq nunakunata debeq cuentam kä. 15 Tsëmi alläpa munëkü, qamkuna Römachö këkaqkunatapis alli noticiakunata willëta.+ 16 Noqaqa manam alli noticiakunapitaqa penqakütsu.+ Tsëkunaqa llapan markäkoq o yärakoq kaqkuna salvakuyänampaq Diospa poderninmi,+ puntata judïukuna+ y tsëpitana griëgu nunakuna.+ 17 Tsëchömi markäkoq o yärakoq kaqkunaqa, Teyta Dios allita ruraq kanqanta rikäyan, tsëmi mas markäkuyänampaq+ yanapan, kënö nir qellqarëkanqannö: “Peru allita ruraq nunaqa, markäkoq o yärakoq kanqampitam kawanqa”.+
18 Awmi, pëta mana respetaqkunaman y mana allita ruraqkunamanmi, Teyta Diospa cöleranta ciëlupita chëkätsimun.+ Pëkunaqa mana allita rurarmi, nunakuna rasumpa kaqta reqiyänanta michäkuyan.+ 19 Teyta Diospita musyëta puëdinqantsikqa, Dios cläru rikätsikushqa kaptinmi, pëkunachö alli cläru këkan.+ 20 Pë imanö kanqanta+ mana rikëta puëdirpis,+ munduta imanö kamanqanta rikarmi entiendita puëdintsik.+ Ruranqanta rikarmi pë imanö kanqanta yachakuyta puëdintsik. Tsëkunam rikätsikun mana ushakaq poderninta y rasumpa Teyta Dios kanqanta. Tsëmi tsëkunata mana kaqpaq churaqkunaqa tsapäkuyta puëdiyantsu. 21 Teyta Diosta reqikarpis, manam Diostanötsu alabayarqan ni agradecikuyarqan, tsëpa rantinqa imanö pensayanqanchömi upa tikrayarqan, y juiciunnaq shonqunkunam mana entiendikoq tikrarqan.*+ 22 Yachaq kayanqanta nikarpis, upam tikrayarqan. 23 Mana ushakaq Teyta Diosta alabayänampa rantinmi, ushakaq nuna niraq, pishqukuna niraq, chusku chakiyoq animalkuna niraq y lätëpa pureq animalkuna niraq santukunata alabayarqan.+
24 Tsëmi Teyta Diosqa shonqunkuna munanqannö imëka melanëpaqkunata rurar, cuerpunkunata deshonrayänampaq dejarqan. 25 Diospita rasumpa kaqman creiyänampa rantinmi, pëkunaqa engañakuyanqanman creiyarqan, imëyaqpis alabashqa këkaq Kamakoqta adorayänampa y sirwiyänampa rantinmi, kamanqankunata adorayarqan y sirwiyarqan. Tsënö kallätsun.* 26 Warmikunaqa ollqullawan oqllanakuyänan këkaptinmi,+ mana rurana kaqta rurar warmipura oqllanakuyarqan. Tsëmi Teyta Diosqa oqllanakuyta ërayëpa munayänanta dejarqan.+ 27 Tsënöllam ollqukunapis warmillawan oqllanakuyänan këkaptin, juknin juknin achachapäkur ollqupura+ oqllanakur melanëpaqkunata rurayarqan. Tsëmi mana allikunata rurayanqampita kikinkuna castïguta* chaskiyarqan.+
28 Teyta Diosta mana reqita munayaptinmi,* Diosqa mana rurana kaqta rurakuyänampaq, pë chikinqankunaman pensar kakuyänanta dejarqan.+ 29 Pëkunaqa mana alli kaqta rurëman, alläpa mana alli këman,+ jukpa imantapis munëman,*+ mana allikunata rurëman, chikikoq këman,+ wanutsikuyman,+ pleytu rurëman, jukkunata engañëman+ y wakinkunata sufritsimanmi imëpis yarparäkuyarqan.+ Pëkunaqa kayarqan wasa rima,* 30 calumniakoq,*+ Teyta Diosta chikeq, mana respetakoq, allish tukoq, orgullösu, mana alli rurëkunata patsätseq,*+ papäninkunata mana cäsukoq, 31 mana entiendikoq,+ änikuyanqanta mana cumpleq, mana kuyakoq y mana llakipäkoqmi.* 32 Tsëta ruraqkuna wanuyänampaq kaqta Teyta Dios allita rurar mandakunqanta musyëkarpis,+ manam tsëkunata rurarllatsu këkäyan, sinöqa tsëkunata ruraqkunatapis allitanömi rikäyan.