¿Jehovä imanö kanqantataq Bibliachö willakun?

Jehoväman pensarqa, ¿imanö kanqantataq pensanki? ¿Estrëllakunanö alläpa karuchö këkanqantaku? ¿Poderyoq karnin räyunö kanqantaku? ¿Jehova imanö kanqanta musyëta munankimantsuraq? Bibliachömi willakun Jehovä imanö kanqanta y qampaq yarpachakunqanta.

1 KAQ: ¿Diosta rikëta puëdishwantsuraq?

Manam. “Diosqa espïritum” (Juan 4:24). Jehovä Diosqa manam nunakunanö cuerpuyoqtsu, sinöqa juk espïritum, ciëluchömi këkan y manam rikëta puëdintsiktsu.

2 KAQ: ¿Jehoväqa imanö Diostan?

Jehoväta mana rikëta puëdirnimpis alläpa kuyakoq y llakipäkoq kanqanta musyanqantsikmi yanapamantsik pëta kuyanapaq. Bibliachömi kënö nin: “Teyta Jehovätaqa gustanmi allikunata rurayanqan, y pëta kuyaqkunataqa manam dejantsu” (Salmus 37:28). Jehoväqa, mana allikunapa pasar sufreqkunataqa alläpam kuyan y llakipan (Santiägu 5:11). Y “alläpa llakishqa këkaqkunapa lädunchömi këkan. Llakishqa karnin ima rurëtapis mana puëdeqkunatam yanapan” (Salmus 34:18). Bibliachömi nin nunakuna mana cäsukur mana allikunata rurayaptinqa alläpa llakikunqanta (Salmus 78:40, 41), peru cäsukur allita rurayaptinqa kushikunqanta (leyi Proverbius 27:11).

3 KAQ: ¿Imanirtan nintsik Jehovä kuyamanqantsikta?

Jehovä kuyakoq kanqanmi imëkapitapis masqa rikakun. Tsëmi Bibliachö nin: “Diosqa kuyakuymi” (1 Juan 4:8). Jehovä kuyamanqantsiktaqa Palabran Bibliachömi yachakuntsik, y kamanqankunachömi rikantsik (leyi Hëchus 14:17). Kushishqa kawanata munarmi Jehoväqa imëka mikuykunata kamashqa, y müsicata wiyanapaq y colorkunata rikänapaqmi kamamarquntsik.

MASLLA YACHAKUSHUN

4 KAQ: Santu espïrituqa Diospa poderninmi

Noqantsikqa makintsikwanmi imatapis rurantsik, y Jehoväqa, ¿imawantaq llapanta kamashqa? Santu espïritunwanmi. Bibliachömi nin santu espïrituqa Diospa podernin kanqanta, peru wakinqa niyan santu espïrituqa Dios kanqantam. Leyiyë Lücas 11:13 y Hëchus 2:17 ima ninqanta y këpaq parlayë:

• Diosqa santu espïritunwanmi pëman mañakoqkunata yanapan. Qampaqqa imatan santu espïritu, ¿Diosku o Diospa poderninku?

Jehoväqa poderninwanmi imëkata rurashqa. Leyiyë Salmus 33:6 y 2 Pëdru 1:20, 21 ima ninqanta y këpaq parlayë:

• ¿Jehoväqa imakunatataq poderninwan rurashqa?

5 KAQ: Jehoväqa yachanëpaq Diosmi

Moisesqa unëpanam Jehoväta sirwikarqan, peru tsënö karpis kënömi Jehoväta nirqan: “Imatapis imanö ruranqëkita yachëkatsillamë, tsënöpa qamta mas reqinaqpaq” (Exodu 33:13). ¿Ima nirqantan Moisesta Jehovä? Leyiyë Exodu 34:4-6 ima ninqanta y këkunapaq parlayë:

• ¿Imakunatataq Moisesta Jehovä nirqan?

• ¿Jehovä imanö kanqantan mas gustashunki?

6 KAQ: Jehoväqa noqantsikpaq yarpachakunmi

Israelïtakuna esclävu kar Egiptuchö sufreqta rikar, ¿imanötan Jehovä sientikurqan? Wiyayë GRABASHQATA o leyiyë Exodu 3:1-10 ima ninqanta y këkunapaq parlayë:

GRABACION: Jehovä alläpam llakikurqan israelïtakuna sufriyaptin (2:45)

• Nunakuna sufreqta rikarnin Jehovä llakikunqanqa, ¿imatataq yachatsishunki? (Rikäyë 7 y 8 kaq versïculukunata).

• ¿Rasumpatsuraq nunakunata Jehoväqa yanapëta munan? ¿Puëdinmantsuraq yanapëta?

7 KAQ: Jehoväpitaqa kamanqankunachöpis yachakuntsikmi

Llapan kamanqankunachöpis Jehovä imanö kanqantaqa rikantsikmi. VIDEUTA rikäyë, tsëpitana leyiyë Romänus 1:20 ima ninqanta y këpaq parlayë:

VIDEU: Kuyamarnintsikmi Jehoväqa këta kamarqan: cuerpuntsikta (1:57)

• ¿Jehovä imanö kanqantataq kamanqankunachö rikanki?

KËTAM YACHAKURQUNKI

Jehoväqa juk espïritum, tsëmi rikëta puëdintsiktsu. Peru alläpa kuyakoq y llakipäkoq kanqanta musyarmi mas reqita munantsik.

¿Yarpankiku?

• ¿Imanirtan Jehoväta rikëta puëdintsiktsu?

• ¿Imatan santu espïrituqa?

• ¿Jehovä imanö kanqantataq Bibliachö nin?

MASTA YACHAKUY

Jehovä puëdeq, yachaq, allita ruraq y kuyakoq kanqanta maslla yachakuy.

“¿Imanötaq Diosqa?” (Täpakoq, 1 kaq 2019)

Jehoväpaqqa mëtsëchö këkanqantam niyan, peru tsënö niyanqan mana rasumpa kanqanta yachakuy.

“Teyta Diosqa ¿më tsëchöku këkan?” (jw.org päginachö yarqamoq)

Bibliachö santu espïritupaq parlar Diospa “makinwan” imanir igualatsinqanta yachakuy.

“¿Santu espïrituqa nunaku?” (jw.org päginachö yarqamoq)

Rikëta mana puëdeq nunash pensaq Jehoväqa pëpaq mana yarpachakunqanta. Tsënö manana pensanampaq ima yanapanqanta leyi.

“Kananqa yanapakïta puëdinqätam sientï” (Täpakoq, 1 de noviembri 2015)