Ezequiel

38 Teyta Jehoväqa yapëmi parlapämarqan y kënömi nimarqan: 2 “Nunapa tsurin, Mesecpa y Tubalpa+ mas mandaqnin Magog markachö këkaq Gogta+ mana mantsëpa ima pasanampaq kaqta parlapë.+ 3 Kënö nï: ‘Llapanta Gobernaq Teyta Jehovämi kënö nishunki: “Mesecpa y Tubalpa mas mandaqnin Gog, kananqa noqam contrëki këkä. 4 Juk lädupa ëwëkaqtam, shimikiman ganchuta churarkur tumatsimushqëki.+ Mëtsika soldäduykikunatawan,+ cawalluykikunatawan, cawallunkuna montashqa soldäduykikunatawan, jatusaq y taksha escüduyoq* y mëtsika espädayoq chipapäkoqraq röpayoq mëtsika soldäduykikunatawanmi guërraman apamushqëki. 5 Tsë soldäduykikunawanmi Persia, Etiopïa y Put nunakunapis+ taksha escüdunkunawan y cascunkunawan shayämunqa. 6 Tsënöllam pëkunawan shayämunqa Gömerwan llapan soldädunkuna y Togarmäpa kastan nunakuna+ y llapan soldädunkuna. Togarmäpa kastan nunakunaqa, mas karuchö këkaq norti lädupitam shayämunqa. Awmi, mëtsë markachö këkaq nunakunam qamtaqa yanapayäshunki.+

7 Qampis y soldäduykikunapis alistakuyë listu këkäyänëkipaq, y qammi mandaqninkuna kanki.

8 Mëtsika junaqkuna pasariptinmi qayatsimushqëki. Mëtsika watakuna pasariptinmi, mëtsë markakunapita kutimushqa nunakunapa tsëllaraq altsashqa markankunata atacanki. Tsë nunakunapa markankunataqa espädawanmi ushakätsiyarqan, y imannaqtam dejayarqan. Tsënömi mëtsika watapa kakurqan, y tsëchö täkoq* nunakunatanam mëtsë nacionkunaman qarquyarqan. Kananqa tsë nunakunam, mëtsë nacionkunapita Israel jirkakunaman kutiyämushqa y imatapis mana mantsapakuypam kawayan.+ 9 Y qamqa tsë nunakunata atacanëkipaqmi, mëtsika soldäduykikunawan y yanapayäshoqniki mëtsika nunakunawan tamyanöraq shamunki y patsatapis yana pukutënöran tsaparkunki”’.

10 Llapanta Gobernaq Teyta Jehovämi kënö nishunki: ‘Tsë junaqqa, alläpa mana allita ruranëkipaqmi shonquykichö pensanki. 11 Kënömi ninki: “Defendikuyta mana puëdeq nunakunapa markankunamanmi ëwashaq.+ Tsë nunakunaqa imatapis mana mantsapakuypam kawakuyan, y manam ni pï abusapantsu. Markankunapaqa manam ni murällankuna, ni trancayoq punkunkunapis kantsu. Tsë nunakunaqa manam defendikuyta puëdiyantsu”. 12 Puntata ushakätsiyanqan markakunachöqa, kananqa mëtsika nunakunam kayan.+ Tsë nunakunaqa mëtsë nacionkunapitam kutiyämushqa,+ rïcuyëkäyannam y imëkayoqmi kayan. Patsapa chowpinchömi* kawayan, tsë nunakunamanmi imëka riquëzankunata apakunëkipaq shamunki.+

13 Säba,*+ Dedan+ y Tarsispita+ negociantikuna y llapan soldädunkunam* kënö tapuyäshunki: “¿Tsë markakunataqa atacanki imëkankunata apakunëkipaqku? ¿Llapan soldäduykikunawanqa shamunki pläta metalta, öruta, riquëzankunata y imëkankunata mëtsikata apakunëkipaqku?”’.

14 Tsëmi kananqa nunapa tsurin, Gogta kënö ninëki: ‘Llapanta Gobernaq Teyta Jehovämi kënö nishunki: “Tsë junaqmi musyanki sirwimaqnï israelïtakuna, imatapis mana mantsapakuypa kawakuyanqanta.+ 15 Tsëta musyarmi, mas karu kaq norti lädupita+ cawallunkuna montashqa mëtsika nunakunawan, y mëtsika soldädukunawan shamunki.+ 16 Entëru nacionta tsaparkoq pukutënöran, sirwimaqnïkuna israelïtakunata atacanëkipaq shamunki. Ushanan junaqkunachömi, qamta Gog marka, atacanëkipaq apamushqëki.+ Y qamta imëkata ruranqaqta rikarmi, llapan nacionkuna musyayanqa limpiu Dios kanqäta”’.+

17 Llapanta Gobernaq Teyta Jehovämi kënö nishunki: ‘Unëpitanam willakurqä markäta atacanëkipaq pushamunäpaq kaqta. Tsënö ninqätaqa Israelchö willakoqnïkunam willakuyarqan’.

18 ‘Llapanta Gobernaq Teyta Jehovämi kënö nin: “Israel markakunata Gog atacanqan junaqmi alläpa cölerashaq.+ 19 Alläpa cölerashqam parlashaq. Tsë junaqmi Israel markakunachöqa patsa alläpa kuyunqa. 20 Noqa cöleraptïmi lamarchö pescädukuna, volaq* animalkuna, chukaru animalkuna, lätëpa pureq animalkuna y entëru patsachö nunakuna karkaryäyanqa.+ Jirkakunapis, qaqakunapis y markakunapa murällankunapis ishkirmi ushanqa”’.

21 ‘Llapanta Gobernaq Teyta Jehovämi kënö nin: “Entëru jirkäkunachömi Gogwan guërra kanqa,* y kikinkunapuram espädankunawan wanutsinakuyanqa.+ 22 Pëta, llapan soldädunkunata y mëtsë markapita yanapaqnin llapan nunakunatam wanutsishaq.+ Raslla o saslla wanutsikoq qeshyawan,+ fuerti tamyawan, runtuwan,+ ninawan+ y azufriwanmi+ llapankunata ushakätsishaq. 23 Y llapan nacionkunam musyayanqa poderösu y limpiu Dios kanqäta. Llapankunam musyariyanqa noqa Jehovä kanqäta”’.