Levïticu
17 Tsëpitanam Teyta Jehoväqa Moisesta kënö nirqan: 2 “Aaronta, tsurinkunata y israelïtakunatam këta ninëki: ‘Këtam Teyta Jehovä mandakushqa:
3 “Manam mëqëkipis campamentuchö o campamentupita karuchö töruta, mallwa carnëruta o cabrata pishtayänëkitsu, 4 tsëpa rantinqa, noqa Jehoväpaq pishtar rupatsiyänampaqmi noqa Jehoväpa rikënïchö carpa* wayipa puntanman apayämunëki. Pï nunapis campamentuchö o campamentupita karuchö pishtarninqa, yawarpaq mandakunqäta mana cumplinqampitam culpayoq kanqa. Tsëqa tsë nunata wanutsiyänëkim. 5 Y manam animalkunata pampakunachö pishtayänëkitsu, tsëpa rantinqa carpa* wayipa puntanmanmi apayämunëki, noqa Jehoväpa rikënïchö sacerdötita entregayänëkipaq. Tsëqa, noqa Jehoväwan amïgu kayanqëkita rikätsikur apayämunqëki qarëmi kanqa.+ 6 Carpa* wayipa puntanchömi, sacerdötiqa tsë animalpa yawarninwan noqa Jehoväpa altarnïta pillchitsinan.* Tsëpitanam tsë animalpa wiranta altarchö rupatsinan. Ninawan rupanqanqa, noqa Jehoväta alläpam gustamanqa.+ 7 Tsëmi qamkunaqa, cabra niraq santukunapaq qarëkunata apayänëkinatsu,+ tsëta rurarqa jukwan jukwan kakoq* cuentam traicionëkäyämanki.+ Kë mandakunqätaqa, qamkuna y tsëpita yurikoq kastëkikunapis cumpliyänanmi”’.
8 Këtapis ninëkim: ‘Mëqëkipis o qamkunawan këkaq forastërukuna, noqapaq ushakanqanyaq rupatsina qarëta o juk qarëkunata apamurqa, 9 carpa* wayipa puntanmanmi noqa Jehoväpaq apayämunëki, tsëta mana ruraqtaqa wanutsiyänëkim.+
10 Mëqëkipis o qamkunawan këkaq forastërukuna, ima animalpa yawarnintapis mikuyaptinqa,+ tsë nunawan cölerakurmi ushakätsishaq. 11 Llapan kawaqkunaqa yawaryoq karmi kawayan.+ Y noqaqa jutsata* rurayanqëkipita perdonashqa kayänëkipaqmi altarman pillchitsiyänampaq* mandakurqö.+ Yawar kawënin kaptinmi, yawarqa jutsata rurayanqëkipita perdonashqa kayänëkipaq kanqa.+ 12 Tsëmi israelïtakunata nirqä: “Manam mëqëkipis o qamkunawan këkaq forastërukunapis+ yawartaqa mikuyänëkitsu”.+
13 Mëqëkipis o qamkunawan këkaq forastërukuna, chukaru animalta o mikuna pishquta wanutsirqa, tsë animalpa yawarninta patsaman jichëkurmi+ allpawan pampayänëki. 14 Llapan kawaqkunapa kawëninqa yawarninmi. Tsëmi israelïtakunata nirqä: “Llapan kawaqkunapa kawënin yawar kaptinmi, yawarnintaqa mikuyänëkitsu. Pillapis mikuptinqa wanutsiyänëkim”.+ 15 Mëqëkipis o qamkunawan këkaq forastërukuna, wanushqa animalta o chukaru animal katunqan ëtsata mikurqa,+ röpëkikunatam taqshayänëki y bañakuyänëkim, y tardiyanqanyaqmi rikënïpaq limpiutsu kayanki.+ Tsëpitaqa limpiunam kayanki. 16 Peru röpëkikunata mana taqsharnin y mana bañakurninqa, castigashqam kayanki’”.+