Hëchus
15 Tsëpitanam Judëa provinciapita nunakuna urämur wawqikunata kënö yachatsir qallëkuyarqan: “Moises qellqanqan+ Ley ninqannö ishpakuyänëkipa puntanchö mana señalakurqa, manam salvakuyta puëdiyankitsu”. 2 Peru Pabluwan Bernabëqa manam pëkunawan acuerdutsu kayarqan y tsëpaq unë discutïkurmi, Pabluta, Bernabëta y maskunata niyarqan Jerusalenchö apostolkunaman y anciänukunaman*+ ëwar tsë asuntupita parlayänampaq.
3 Tsënam congregacionchö wawqikuna y panikunaqa, nänipa ichik karuyaq pëkunawan ëwayarqan. Tsëpitanam pëkunaqa Feniciapa y Samariapa pasayarqan, y juk nacion nunakuna Diosman creikoq tikrayanqanta willarmi, llapan wawqikunata y panikunata alläpa kushitsiyarqan. 4 Jerusalenman chäriyaptinqa, congregacionchö wawqikuna y panikuna, apostolkuna y anciänukunam* shumaq chaskiyarqan. Tsënam chaqkunaqa Teyta Dios pëkunawan imëkata ruranqanta willayarqan. 5 Peru fariseukunapa sectampita creikoq tikraqkunam, tëkäyanqampita sharkur* kënö niyarqan: “Pëkunataqa ishpakuyänampa puntanchömi señalatsinantsik y Moises qellqanqan Leyta cäsukuyänampaqmi mandanantsik”.+
6 Tsëmi apostolkuna y anciänukunaqa,* tsë asuntupita parlayänampaq juntakäyarqan. 7 Tsë asuntupaq alli parlëkurnam, Pëdruqa sharkur kënö nirqan: “Wawqikuna, qamkunaqa allim musyayanki, noqa willakunqä alli noticiakunata wiyakur juk nacion nunakuna creikuyänampaq, puntallapitana qamkunapita Teyta Dios akramanqanta.+ 8 Y nunakunapa shonqunta reqeq Teyta Diosqa,+ noqantsikwan ruranqannölla pëkunamampis santu espïritunta churarmi,+ pëkunata chaskinqanta musyatsikurqan. 9 Pëqa manam rikätsikushqatsu noqantsikpita jukläya kayanqanta,+ sinöqa markäkoq o yärakoq kayaptinmi, pëkunapa shonqunkunata limpiuyätsishqa.+ 10 Tsëqa, ¿imanirtan unë kastantsikkuna y noqantsikpis apëta mana puëdinqantsik,+ alläpa lasaq cargata Jesuspa qateqninkunaman churar Diosta pruëbaman churayanki?+ 11 Tsëpa rantinqa, pëkunanöllam noqantsikpis, Señor Jesus+ alläpa alli kanqarëkur salvashqa kanqantsikman markäkuntsik o yärakuntsik”.+
12 Tsëta wiyëkurnam tsëchö këkaqkunaqa upälla quedayarqan, y juk nacion nunakunachö, mëtsika milagrukunata y imëka espantëpaqkunata Teyta Dios pëkunawan ruranqanta willakuyaptinmi, Bernabëtawan Pabluta shumaq wiyakuyarqan. 13 Parlar ushariyaptinnam, Santiäguqa kënö nirqan: “Wiyarayämë wawqikuna. 14 Symeonqa+ shumaqmi willakamushqa, juk nacion nunakunata yarpar, pëkunapita wakin nunakunata jutinta apayänampaq Teyta Dios imanö akrar qallanqanta.+ 15 Tsëqa Diospa Willakoqninkuna Qellqayanqanchö kënö ninqanwanmi igualan: 16 ‘Tsëkuna pasariptinmi kutimur Davidpa ishkishqa wayinta* yapë rurashaq. Ishkishqa këkaq wayikunatam yapë rurashaq y altsashaq. 17 Tsënöpam quedaq nunakunaqa, llapan nacionkunachö jutïpa reqishqa kaqkunawan juntu, llapan shonqunkunawan Teyta Jehoväta* sirwiyanqa. Tsë llapanta ruraq Teyta Jehovämi* tsënö nin.+ 18 Tsëkunaqa unë witsampitam musyë kashqa’.+ 19 Tsëmi noqaqa pensä, Diosta sirwita munëkaq juk nacion nunakunapaq ima atäjutapis mana churanapaq.+ 20 Sinöqa cartata apatsir, santukunapaq apayanqan qarëkunapita,+ oqllanakur melanëpaqkunata rurëpita,*+ jurkashqa* animalkunata mikuypita y yawarpita cuidakuyänanllapaq nishun.+ 21 Unë witsampitanam Moises qellqanqanta willakoqkunaqa cada markachö kayashqa. Awmi, llapan säbadukunam tsëtaqa Diosta adorayänan wayikunachö fuertipa leyiyan”.+
22 Tsëmi apostolkuna y anciänukunaqa,* congregacionchö kaqkunawan juntu, pëkunapita ollqukunata akrëkur Pablutawan Bernabëta Antioquïaman mandayänampaq decidiyarqan. Tsënömi wawqikunachö alli cargukunayoq Barsabas jutiyoq Jüdasta y Sïlasta,+ pëkunatawan juntu mandayarqan. 23 Këkunata qellqëkurmi pëkunawan apatsiyarqan:
“Apostolkunapita y anciänukunapita,* Antioquïachö,+ Siriachö y Ciliciachö këkaq juk nacionpita wawqikunapaq:* ¡Salüdükunata chaskiyë! 24 Noqakuna mana mandëkäyaptï, noqantsikpita wakinkuna qamkunaman shamur, pantatsiyäshuynikita munar imëkata niyäshunqëkitam+ musyayarqö. 25 Tsëmi llapäkuna juntu decidiyarqö, ishkë ollqukunata akrëkur, kuyë wawqintsikkuna Bernabëtawan Pabluta qamkunaman mandayämunäpaq. 26 Pëkunaqa Señor Jesucristupa jutinrëkurmi vïdankunata peligruman churayashqa.+ 27 Tsëmi Jüdasta y Sïlasta qamkunaman mandëkäyämü, pëkunapis tsë asuntupita willayäshunëkipaq.+ 28 Santu espïritupaq+ y noqakunapaqqa alli kashqa këkunapita mastaqa imatapis mana mandayänaqpaq: 29 santukunapaq apayanqan qarëkunapita,+ yawarpita,+ jurkashqa* animalkunata mikuypita+ y oqllanakur melanëpaqkunata rurëpita*+ cuidakuyë. Tsëkunapita cuidakurqa allim kawakuyanki. ¡Yamëlla këkäyë!”.*
30 Despidikurirnam tsë ollqukunaqa Antioquïa markaman ëwayarqan. Tsëchönam Jesuspa llapan qateqninkunata juntëkur, apayanqan cartata entregayarqan. 31 Cartata leyiriyaptinqa, tsëchö ninqanwan kallpata tarirmi alläpa kushikuyarqan. 32 Diospa willakoqnin karmi Jüdaswan Sïlaspis, wawqikunata y panikunata imëkata yachatsir kallpayoq kayänampaq y alli tsarakuyänampaq yanapayarqan.+ 33 Tsëchö atska tiempu kariyaptinnam, wawqikuna y panikunaqa yamë chäyänanta munar mandamoqninkunaman despachëkuyarqan. 34 * 35 Tsënö kaptimpis, atskaq wawqikunawan juntu Teyta Jehoväpa* palabrampita alli noticiakunata willakur y yachatsikurmi, Pabluwan Bernabëqa Antioquïa markachö quedakuyarqan.
36 Tsëpita juk ishkë junaq pasariptinnam, Pabluqa Bernabëta kënö nirqan: “Kananqa imanö këkäyanqanta musyanapaq, Teyta Jehoväpa* palabranta willakunqantsik markakunachö wawqikunata y panikunata watukaq kutishun”.*+ 37 Bernabëqa Marcus jutiyoq Juantam pëkunawan pushëta munarqan.+ 38 Peru Pabluqa, Panfiliachö pëkunapita rakikar rurayanqanman pëkunawan mana ëwashqa kaptinmi, pëta pushëtaqa allitanötsu rikarqan.+ 39 Tsëmi feyupa discutir cada ünu lädunkunapa ëwakuyarqan. Bernabëqa+ Marcusta pusharkurmi Chipri islata barcuwan ëwakurqan. 40 Pablunam Sïlasta akrarqan y Teyta Jehovä* pëwan alläpa alli këkunampaq wawqikuna mañakuriyaptinmi ëwakurqan,+ 41 Siriapa y Ciliciapa pasarmi tsë kinrë congregacionkunachö kaqkunata alli aguantayänampaq yanaparqan.