Exodu
14 Tsëpitanam Teyta Jehoväqa Moisesta kënö nirqan: 2 “Israelïtakunata mandë Migdolpa y lamar lädunchö këkaq Pihahirotpa frentinman tumayämunampaq, y lamar lädunchö Baal-Zefon+ sitiupa frentinchö carpankunata* armayänampaq. 3 Tsënam Egiptuchö gobernaqqa israelïtakunapaq ninqa: ‘Wakpa këpa purirmi tsunyaq sitiuchö oqrakashqa këkäyan’. 4 Y chukru shonqu kananta permitiptïmi+ Egiptuchö gobernaqqa qatipayäshurniki shamunqa, pëtawan soldädunkunata ushakätsiptïmi nunakunaqa alläpa puëdeq kanqäta rikäyanqa.+ Tsënöpam egipciukunaqa musyayanqa noqa Jehovä kanqäta”.+ Israelïtakunaqa Moises ninqannöllam llapanta rurayarqan.
5 Tsëpitanam, israelïtakuna ëwakushqana kayanqanta Egiptuchö gobernaqta willayarqan. Tsënam pëwan sirweqninkunaqa israelïtakuna ëwakuyänanta dejayanqampita pësakur+ kënö niyarqan: “¿Imatataq rurarquntsik? ¿Imanirtan sirwimaqnintsik israelïtakuna ëwakuyänanta dejarquntsik?”. 6 Tsëpitanam Egiptuchö gobernaqqa guërrapaq carrëtankunata alistayänampaq mandakurqan, y soldädunkunawanmi israelïtakunapa qepanta ëwayarqan.+ 7 Guërrapaq mas alli carrëtankunatam seiscientusta aparqan, tsënöllam wakin carrëtankunatapis aparqan, y cada carrëtachömi soldädukuna ëwayarqan. 8 Chukru shonqu kananta Teyta Jehovä permitiptinmi Egiptuchö gobernaqqa israelïtakunata qatipar ëwarqan. Peru israelïtakunaqa mana mantsakushpam Egiptu nacionpita ëwakuykäyarqan.+ 9 Tsëpitanam Baal-Zefon sitiupa frentinchö y Pihahirot sitiupa lädunchö këkaq lamar kuchunman chäyarqan. Tsëchö këkäyaptinmi egipciukunaqa cawallunkuna montashqa, guërrapaq carrëtankunawan y soldädunkunawan yurirkuyarqan.+
10 Tsënam israelïtakunaqa, Egiptuchö gobernaqwan soldädunkuna qatipëkäyanqanta rikarnin alläpa mantsakäyarqan, tsëmi salvëkunampaq Teyta Jehoväman rogakuyarqan.+ 11 Tsëpitanam Moisesta niyarqan: “¿Egiptuchö pampayämänampaq sitiu mana kaptinku, kë sitiuchö wanuyänäpaq pushayämarqunki?+ ¿Imanirtaq Egiptupita këman apayämarqunki? 12 ¿Manaku Egiptuchö këkashqallaraq, ‘allim egipciukunata sirwir këkäyä, ama inkitayämëtsu’ niyarqaq? Noqakunaqa manam kë sitiuchö wanuyta munayätsu, tsëpa rantinqa egipciukunata sirwitam munayä”.+ 13 Tsënam Moisesqa israelïtakunata nirqan: “¡Ama mantsakäyëtsu,+ valienti kayë! Kananmi Teyta Jehovä Diosnintsik imanö salvamanqantsikta rikäshun,+ y kanampitaqa manam egipciukunata rikäshunnatsu.+ 14 Kikin Teyta Jehovä Diosnintsikmi noqantsikrëkur pelyamunqa,+ y noqantsikqa manam imatapis rurashuntsu”.
15 Tsënam Teyta Jehoväqa Moisesta kënö nirqan: “¿Imanirtan alläpa yarpachakur noqaman rogakamunki? Israelïtakunata mandë carpankunata* paskapakuyänampaq. 16 Y lamar ishkëman rakikänampaq tukruykita lamarman kamë, tsënöpa israelïtakuna tsaki patsapa pasayänampaq. 17 Noqa permitiptïmi egipciukunaqa chukru shonqu kayanqa, y qepëkikunatam shayämunqa. Tsëmi Egiptuchö gobernaqta, soldädunkunata, guërrapaq carrëtankunata y cawallun montashqa soldädunkunata ushakätsiptï nunakuna alläpa puëdeq kanqäta rikäyanqa.+ 18 Y Egiptuchö gobernaqta, guërrapaq carrëtankunata y cawallun montashqa soldädunkunata ushakätsiptïmi, egipciukunaqa musyariyanqa noqa Jehovä kanqäta”.+
19 Tsëpitanam israelïtakunata pushëkaq Teyta Diospa angelninqa+ israelïtakunapa qepanman churakarqan, y puntankunata ëwëkaq pukutëpis qepankunamanmi churakarqan.+ 20 Tsë pukutëqa egipciukunapa y israelïtakunapa chowpinmanmi* churakarqan.+ Egipciukuna këkäyanqan lädupaqa pasëpam* ampirqan o tsakarqan,* peru israelïtakuna këkäyanqan lädupaqa shumaqmi atsikyarqan.+ Tsëmi egipciukunaqa entëru paqaspa israelïtakunata rikëta puëdiyarqantsu.
21 Tsëpitanam Moisesqa tukrunta lamarman kamarqan,+ tsënam Teyta Jehoväqa inti o rupay yarqamunan lädupita entëru paqas vientutsirqan, y lamarqa ishkëmanmi rakikarqan.+ 22 Y ishkan lädupa perqa cuenta quedariptinmi israelïtakunaqa tsaki patsapa pasayarqan.+ 23 Tsënam egipciukunaqa guërrapaq carrëtankunawan y cawallun montashqa soldädunkunawan israelïtakunapa qepanta yëkuyarqan.+ 24 Waräninqa, paqasllaraq këkaptinmi* Teyta Jehoväqa ninapa y pukutë rurimpita egipciukunapa campamentunman rikëkurqan,+ tsënam egipciukunaqa shonqunkunachö alläpa mantsakäyarqan. 25 Y guërrapaq carrëtankunapa ruëdankunatam yarqutsir usharqan, tsëmi egipciukunaqa carrëtankunata apëta mana puëdir kënö ninakuyarqan: “Teyta Jehovämi israelïtakunata yanapar noqantsikwan pelyëkan, ¡ama qatipar ëwashunnatsu!”.+
26 Tsënam Teyta Jehoväqa Moisesta nirqan: “Egipciukunata, guërrapaq carrëtankunata y cawallun montashqa soldädunkunata yaku tsaparkunampaq tukruykita lamarman kamë”. 27 Tsënam Moisesqa jinan höra tukrunta lamarman kamarqan, y patsa warëkaptinnam lamarqa rakikashqa këkanqampita juntakärirqan. Egipciukuna qeshpita munëkäyaptimpis Teyta Jehoväqa lamarchömi ushakätsirqan.+ 28 Y yaku juntakarninqa, egipciukunapa guërrapaq carrëtankunata, cawallun montashqa soldädunkunata y Egiptuchö gobernaqpa llapan soldädunkunatam tsaparkurqan. Tsënömi israelïtakunata qatipaq egipciukunaqa ushakäyarqan,+ y manam ni jukllëllapis salvakurqantsu.+
29 Peru israelïtakunaqa lamarpa ishkan lädun perqa cuenta quedariptinmi tsaki patsapa pasayarqan.+ 30 Tsënömi Teyta Jehoväqa israelïtakunata egipciukunapita salvarqan.+ Tsëpitanam israelïtakunaqa egipciukunapa ayankunata lamar kuchunchö jitarëkaqta rikäyarqan. 31 Teyta Jehoväqa egipciukunata ushakätsirmi alläpa puëdeq kanqanta rikätsikurqan. Tsëta rikarmi israelïtakunaqa llapan shonqunkunawan Teyta Jehoväta respetar qallëkuyarqan. Y Teyta Jehoväman y sirweqnin Moisesmanmi masraq markäkuyarqan o yärakuyarqan.+