Romänus
10 Wawqikuna y panikuna, noqaqa llapan shonqüwan pëkuna salvakuyänanta munarmi Teyta Diosman rogakü.+ 2 Noqaqa musyämi* Teyta Diospaq alli trabajayanqanta,+ peru manam rasumpa kaq ninqannötsu rurayan. 3 Diospa rikëninchö pikuna allita ruraqnö rikashqa kayanqanta mana musyar,+ y imëkata rurar alli kaqta ruraq kayanqanta rikätsikuyta munarmi,+ Diospa rikëninchö allita ruraqnö rikashqa kaqkuna rurayanqanta rurayantsu.+ 4 Markäkoq o yärakoq kaqkuna allita ruraqnö rikashqa kayänampaqmi,+ Cristu cumplishqana kaptin, Leyqa välinnatsu.+
5 Ley ninqanta rurar allita ruraqnö rikashqa kaqkunapaq parlarmi Moisesqa kënö qellqarqan: “Tsëkunata ruraq nunaqa, tsëkunata ruranqampitam kawanqa”.+ 6 Peru markäkoq o yärakoq kar allita ruraqnö rikashqa kaqkunapaqmi kënö nin: “Ama shonquykichö kënö nitsu:+ ‘¿Piraq ciëluman ëwanqa?’,+ awmi, ¿piraq ciëluman ëwanqa Cristuta urätsimunampaq?. 7 Ama kënöpis nitsu: ‘¿Piraq mankarëkaq uchkuman uranqa?’,+ awmi, ¿piraq mankarëkaq uchkuman uranqa Cristuta wanunqampita witsätsimunampaq?”. 8 Sinöqa, ¿ima nintan qellqarëkaqchö? “Tsë palabraqa shimikikunachö y shonquykikunachömi këkan”,+ awmi, tsëqa markäkoq o yärakoq kaqkuna shumaq chaskikuyanqan willakunqantsik ‘palabram’. 9 Jesus Señor+ kanqanta nunakuna puntanchö shimikiwan musyatsikurqa y wanushqampita Teyta Dios kawatsimunqanman shonquykichö markäkurqa o yärakurqa salvakunkim. 10 Pï nunapis allita ruraqnö rikashqa kanampaqqa, llapan shonqunwanmi markäkunan o yärakunan, peru salvashqa kanampaqqa, nunakunapa puntanchömi tsë markäkunqampita shiminwan musyatsikunan.+
11 Teyta Diospa Palabranchömi, “pëman markäkoqkunaqa o yärakoqkunaqa manam imëpis llakikuychötsu ushayanqa”+ nin. 12 Judïu nunakunawan griëgu nunakunaqa manam imachöpis jukläyatsu kayan.+ Llapankunam tsë Señoryoqlla kayan. Pëqa, pëman confiakoqkunatam imëkawan bendicin. 13 Awmi, “Teyta Jehoväpa* jutinman confiakoqkunaqa salvashqam kayanqa”.+ 14 Tsënö kaptimpis, ¿imanöraq pëman confiakuyanqa, pëman manaraq markäkurqa o yärakurqa? ¿Imanöraq pëman markäkuyanqa pëpita mana wiyashqa karqa? ¿Imanöraq pëpita wiyayanqa mana ni pï willaptinqa? 15 ¿Imanöraq willakuyanqa mana ni pï mandashqa këkaptinqa?+ Kënö qellqarëkanqannö: “¡Alli noticiakunata apamoq nunakunapa chakinkunaqa alläpa shumaqmi!”.+
16 Tsënö kaptimpis, manam llapantsu alli noticiakunata wiyakuyarqan, tsëmi Isaïasqa, “Teyta Jehovä,* ¿pitan markäkushqa o yärakushqa noqakuna willakuyanqäman?” nin.+ 17 Tsëmi pï nunapis willakuyanqanta wiyakur-raq markäkoq o yärakoq tikran y tsë willakuytaqa wiyakuyan,+ pillapis Cristupita parlaptinmi. 18 Tsëqa, ¿Israel nunakuna tsëta mana wiyayanqantaku rikätsikun? Manam tsënötsu. Rasumpa kaqchöqa, “entëru patsachömi willakuyashqa, y patsapa juknin kuchumpita juknin kuchunyaqmi musyatsikuyashqa”.+ 19 Tsëqa, ¿Israel nunakuna mana musyayanqantaku rikätsikun?+ Manam tsënötsu. Puntataqa Moisesmi kënö nirqan: “Juiciunnaq y mana imapaqpis väleq nunakunawanmi pëkunata alläpa cöleratsishaq”.+ 20 Peru Isaïasqa mana mantsakushpam kënö nin: “Noqata mana ashimaqkunam tariyämashqa.+ Noqapaq mana tapukoqkunam reqiyämashqa”.+ 21 Peru Israel nunakunapaqqa kënömi nin: “Mana wiyakoq y chukru shonqu nunakunamanmi entëru junaq makïta kamararqö”.+