Romänus
11 Tsëqa, ¿sirweqninkunata Teyta Dios dejanqantaku rikätsikun?+ ¡Manam tsënötsu! Noqapis Abrahanpa kastan y Benjaminpa kastampita israelïta nunam kä. 2 Teyta Diosqa manam puntata akranqan sirweqninkunata dejarqantsu.+ ¿Manaku musyayanki Teyta Diospa Palabranchö Elïaspaq ima ninqanta? Pëqa Israel nunakunapitam Teyta Diosman quejakurqan. 3 Kënömi nirqan: “Teyta Jehovä,* pëkunaqa altarnikikunatapis juchuratsirmi* willakoqnikikunata wanutsiyashqa, y noqallanam quedarqö. Tsëmi wanutsiyämëta munayan”.+ 4 Tsënö kaptimpis, ¿imanö nirtan Teyta Dios contestarqan? “Siëti milraqmi cäsumaqnïkuna kayan, pëkunaqa manam Baal santuman qonqurikuyashqatsu”.+ 5 Tsënöllam kanan witsampis, alläpa alli kar akranqan wallka grüpu nunakuna kan.+ 6 Tsëmi alläpa alli karnin pëkunata akrashqa kaptinqa,+ manam rurayanqampitanatsu.+ Mana tsënö kaptinqa, alläpa alli kanqanqa manachi alläpa alli këtsu kanman.
7 Tsëqa, ¿ima nishuntan? Israelqa manam imëkanöpa ashinqanta lograrqantsu, peru akrashqa kaqkunaqa lograyarqanmi.+ Wakin kaqkunaqa chukru shonqum tikrayarqan,+ 8 kënö nir qellqarëkanqannö: “Teyta Diosqa kanan junaqyaqmi, punukashqanö kayänanta,+ rikëkarpis mana rikaqnö kayänanta y wiyëkarpis mana wiyaqnö kayänanta permitishqa”.+ 9 Davidpis kënömi nin: “Alli allita mikuyänampaq juntakäyanqampis trampa cuenta, trompizatsikoq ruminö* y pëkunapaq castïgu katsun. 10 Ama nawinkunapis rikätsunnatsu, y waqtankunachö imëpis lasaq cargayoq kayätsun”.+
11 Tsëqa, ¿pëkuna trompizar mana sharkoqpaq ishkiyanqantaku rikätsikun? ¡Manam tsënötsu! Peru leyta mana cäsukuyanqampitam,* juk nacion nunakuna salvakuyta puëdiyan, y tsëqa pëkuna cölerakuyänampaqmi.*+ 12 Leyta mana cäsukuyanqan kë munduchö nunakunapaq atska bendicionkunata apëkämuptinqa, y wallkayäyanqan juk nacion nunakunapaq atska bendicionkunata apëkämuptinqa,+ ¡completakäriyaptinnäqa mëtsika mas bendicionkunaraq kanqa!
13 Kananqa qamkunata, awmi, juk nacion nunakunatam parlapäyaq. Nacionkunachö nunakunapaq apostol karmi,+ Teyta Diospaq ruranqäta väleqpaq churä,+ 14 tsënöpa judïu mayïkunata imanöllapis cöleratsinäpaq, y pëkunapita wakinllatapis salvanäpaq. 15 Teyta Dios pëkunata dejashqa kaptin kë munduchö nunakuna Dioswan amishtëta puëdikäyaptinqa,+ ¿imanöraq kanqa pëkuna chaskishqa kayaptinnäqa? Tsëqa wanushqa këkar yapë kawamoqnöchi kanman. 16 Masapita ichikllata jipiyanqan punta masa sagrädu këkaptinqa, llapan masapis sagrädum, y plantapa watsin o matsun* sagrädu këkaptinqa, llapan rämakunapis sagrädum.
17 Tsënö kaptimpis, wakin rämakuna wallushqa kayaptin, qam lluta olïvu plantapita këkar pëkunaman injertashqa këkarqa, y olïvu plantapa watsimpita o matsumpita* imëka allikunata chaskikarqa, 18 ama rämakunata allish tupëtsu. Y allish tuparqa,+ yarpë, manam qamtsu matsuta o watsita* tsaranki, sinöqa watsim qamta tsaräshunki. 19 Tsëqa capaz kënö ninki: “Noqa injertashqa kanäpaqmi wakin rämakunata walluyashqa”.+ 20 ¡Tsëqa rasunmi! Mana markäkoq o yärakoq karmi pëkunaqa wallushqa kayarqan,+ peru qamqa markäkoq karmi shëkanki.*+ Tsëqa allish tukunëkipa rantin cuidädu kë. 21 Kikin plantapa rämankunatapis Teyta Dios mana perdonëkarqa, manam qamtapis perdonashunkitsu. 22 Tsëmi Teyta Dios alli kanqanta+ y castigakoq kanqanta yarpë. Pëqa ishkishqa kaqkunatam castigan,+ peru qamwanqa allim y tsëpaqqa qamwan imëpis alli kanampaqnömi portakunëki, sinöqa qampis wallushqam kanki. 23 Mana markäkoq o yärakoq kayanqanta dejarqa, pëkunapis injertashqam kayanqa.+ Awmi, Teyta Diosqa yapëpis injertëta puëdinmi. 24 Qam lluta olïvu plantapita wallushqa këkar, mana rurana këkaptin, plantayanqan olïvu plantaman injertashqa këkaptikiqa, ¡kikin olïvu plantapita roqushqa rämakunanäqa masraqchi tsë plantaman yapë injertashqa kayanqa!
25 Wawqikuna y panikuna, rikënikikunallapaq yachaq mana kayänëkipaqmi, Teyta Dios kananyaq pakarätsinqan sagrädu noticiata musyayänëkita munä,+ y tsëqa këmi: juk nacion nunakuna completashqa kayanqanyaqmi, Israelpita wakin nunakunaqa chukru shonqu tikrayashqa, 26 tsënömi llapan Israel+ nunakuna salvashqa kayanqa. Kënö nir qellqarëkanqannö: “Salvakoqqa Sionpitam yarqamunqa,+ y Jacobpa kastankunatam yanapanqa Teyta Diosta mana respetar rurayanqanta dejayänampaq. 27 Y jutsankunata* perdonarmi+ pëkunawan acuerduta rurashaq”.+ 28 Rasunmi, alli noticiakunata mana wiyakuyanqanrëkurmi, pëkunaqa biennikikunapaq Teyta Diospa chikeqninkuna kayan; peru unë kastankunata äninqanrëkurmi Teyta Diosqa pëkunapita wakinta amïgun kayänampaq akrashqa.+ 29 Teyta Diosqa manam pësakunqatsu imatapis qarakunqampita y pitapis akranqampita. 30 Juk tiempuqa manam qamkuna Diosta cäsukuyarqëkitsu,+ peru kananqa pëkuna mana cäsukoq kayaptinmi+ llakipashqa* kayarqunki.+ 31 Tsënöllam kanampis pëkuna mana cäsukoq kayaptin qamkuna llakipashqa* kayarqunki, tsënöpa pëkunapis kananqa llakipashqa kayänampaq. 32 Awmi, Teyta Diosqa mana cäsukoq kar llapankunapis prësunö kayänantam permitishqa,+ tsënöpa llapankunata llakipänampaq.*+
33 ¡Imanö espantëpaqmi Teyta Diospa bendicionninkuna! ¡Pëqa alläpa yachaqmi y imëkatam musyan! ¡Pë imanö juzganqantaqa manam entiendita puëdintsiktsu, y llapan ruranqantapis manam musyëta puëdintsiktsu! 34 “¿Pitan Teyta Jehovä* pensanqanta musyëta puëdin? ¿O pitan consejaqnin tikrashqa?”.+ 35 O “¿pitan imallatapis pëta puntata qarashqa, pë imallatapis kutitsinampaq?”.+ 36 Imëkapis pëpitam shamun, përëkurmi kan y pëpaqmi. Pë imëyaqpis alabashqa katsun. Tsënö kallätsun.*