1 Rëyes

15 Nebatpa tsurin Jeroboan+ Israelchö dieciöchu watapa gobernëkaptinmi, Rehoboampa tsurin Abiyamqa Judächö gobernar+ qallëkurqan. 2 Kima watapam Jerusalen markachö mandakurqan. Mamanqa Abisalompa willkan Maacä jutiyoq warmim+ karqan. 3 Abiyamqa papänin ruranqannöllam imëka mana allikunata rurarqan. Manam Davidnötsu Jehovä Diosta llapan shonqunwan sirwirqan. 4 Tsënö kaptimpis Teyta Jehoväqa Davidta kuyarmi,+ Davidpa kastankuna Jerusalenchö mandakuyänanta permitirqan.+ Tsëmi Abiyampa tsurinta mandakunampaq churarqan. 5 Davidqa Jehovä Dios munanqannömi imëkatapis rurarqan y llapan mandakunqantam cäsukurqan. Pëpa jutsanqa* karqan Bat-Sëbawan karir hitïta+ Urïasta wanutsinqanllam. 6 Rehoboamwan Jeroboanqa imëpis guërrachömi kayarqan.+

7 Abiyam ruranqankunapitaqa, Judächö gobernaqkunapaq+ willakoq librum masllata willakun. Abiyamwan Jeroboanqa imëpis guërrachömi kayarqan.+ 8 Abiyam wanuriptinnam unë kastankuna pamparäyanqan David Markaman pampayarqan. Tsëpitanam Asä jutiyoq tsurin+ gobernar qallëkurqan.+

9 Veinti watapa Israelchö Jeroboan gobernëkaptinmi, Asäqa Judächö gobernar qallëkurqan. 10 Cuarenta y ünu watapam Jerusalen markachö mandakurqan. Awilanqa Abisalompa willkan Maacä jutiyoq+ warmim karqan. 11 Gobernanti Asäqa unë kastan Davidnömi Jehovä Diosta cäsukur+ allikunata rurarqan. 12 Entëru markachö këkaq templukunapitam ollqupura kakoqkunata qarqurqan.+ Y unë kastankuna rurayanqan melanëpaq santukunatapis ushakätsirqanmi.+ 13 Awilan Maacämi,+ sagrädu postita* adorayänampaq melanëpaq santuta ruratsirqan, tsëtam Asäqa Cedron pampachö rupatsir+ ushakätsirqan.+ Tsëpitanam awilan Maacäta mandakoq* kënimpita qarqurqan. 14 Peru sagrädu altu sitiukunataqa+ manam ushakätsiyarqantsu. Tsënö karpis Asäqa Jehovä Diostam llapan shonqunwan wanukunqanyaq o wañukunqanyaq sirwirqan. 15 Y kikin rakinqan y papänin rakinqan* pläta metalta, öruta y mas cösaskunatam+ Jehovä Diospa templunman aparqan.

16 Asäwan Israelpa gobernaqnin Baasäqa+ imëpis guërrachömi kayarqan. 17 Israelchö gobernaq Baasäqa, Judäman+ yëkuyänanta mana munar y Judäpita yarquyänanta mana munarmi Ramä markata seguratsir qallëkurqan.+ 18 Tsënam gobernanti Asäqa Teyta Jehoväpa wayinchö y palaciu wayichö quedaq pläta metalta y öruta, Siria nacionpa gobernantin+ Ben-Hadadman apatsirqan. Ben-Hadadqa karqan Tabrimonpa tsurin y Hezionpa willkanmi. Y Damascu markachömi täkurqan.* Kënömi Ben-Hadadta nirqan: 19 “Papänïwan papäniki yanapanakuyänampaq acuerduta rurayanqannöllam noqantsikpis acuerduta rurarqantsik. Tsëmi qamta qaranaqpaq pläta metalta y öruta apëkätsimü. Kananqa ëwakunampaq Israelpa gobernaqnin Baasäwan ruranqëki acuerduta amana cumplinatsu”. 20 Asä ninqanta cäsurmi Ben-Hadadqa soldädunkunapa mandaqninkunata nirqan Israelchö Ijon markata,+ Dan markata,+ Abel-Maim markata, Kinëretchö y Neftalïchö këkaq markakunata atacanampaq. 21 Tsëta musyarirnam Baasäqa, Ramä markata segurëkätsinqanta dejarirqan y Tirzä markachömi quedakurqan.+ 22 Tsënam gobernanti Asäqa, Judäpita llapan nunakunata qayatsimurqan. Tsëpitanam Ramä markata seguratsinampaq Baasä utilizanqan qerukunata y rumikunata apëkur Benjaminchö Guëba+ markata y Mizpä markata+ seguratsirqan.

23 Gobernanti Asä llapan ruranqankunapita, puëdeq kanqampita y markakunata altsatsinqampitaqa Judächö gobernaqkunapaq willakoq librum masllata willakun. Awkinna këkarmi Asäqa chaki nanëwan qeshyarqan.+ 24 Y wanuriptinnam unë kastankuna pamparäyanqan David Markaman pampayarqan. Tsëpitanam Jehosafat jutiyoq tsurinna+ gobernar qallëkurqan.

25 Judäpa gobernantin Asä ishkë watapa mandakuykaptinmi, Jeroboanpa tsurin Nadab+ Israelchö gobernar qallëkurqan. 26 Pëqa Jehovä Diosta mana cäsurmi imëka mana allikunata rurarqan y papänin Jeroboan ruranqannöllam+ Israel nunakunata jutsata* ruratsirqan.+ 27 Filisteukunapa Guibeton+ markanta Nadabwan israelïta soldädukuna ataquëkäyaptinmi, Ahïyapa tsurin Baasäqa Nadabpa contran shärir tsëchö wanuskatsirqan. Baasäqa Isacarpa kastampitam karqan. 28 Judäpa gobernantin Asä kima watapa gobernëkaptinmi, Baasäqa Nadabta wanuratsir Israelchö gobernar qallëkurqan. 29 Y gobernar qallëkurmi Jeroboanpa llapan familianta wanutsirqan, manam ni jukllëllatapis kawëkaqtaqa dejarqantsu. Tsënömi cumplikarqan Silö markapita+ willakoqnin Ahïyawan Jehovä Dios willakunqan. 30 Tsëqa pasakurqan imëka mana allikunata rurarnin Israelpa Diosnin Jehoväta Jeroboan cöleratsinqampita y israelïtakunata jutsata* ruratsinqampitam. 31 Gobernanti Nadab llapan ruranqankunapitaqa Israelchö gobernaqkunapaq willakoq librum masllata willakun. 32 Asäwan Israelpa gobernaqnin Baasäqa+ imëpis guërrachömi kayarqan.

33 Judäpa gobernantin Asä kima watapa gobernëkaptinmi, Ahïyapa tsurin Baasäqa Israelchö gobernar qallëkurqan. Tirzä markapitam veinticuatru watapa mandakurqan.+ 34 Pëqa Jehovä Diosta mana cäsurmi imëka mana allikunata rurarqan+ y Jeroboan ruranqannöllam Israel nunakunata jutsata* ruratsirqan.+