¿Imatataq yachakuntsik tentacionkunachö Jesus tsarakunqampita?

Bautizakurinqanllachömi Diospa santu espïritun Jesusta pusharqan Judëapa tsunyaq sitiunman. Imëkamanraq yarpänan karqan, porqui “ciëlum kichakärirqan” bautizakurinqan höra (Mateu 3:16). Tsë hörapita patsëqa ciëluchö yachakunqankunata y ruranqankunatam yarpëta puëdirqan. Alläpachi precisarqan tsë asuntukunaman yarpakachänanqa.

Jesusqa 40 junaq y 40 paqasmi tsunyaq jirkachö karqan. Y ni imatapis mana mikushqa karmi alläpa mallaqëkarqan. Tsëmi Diabluqa pëman witirir tentëta tïrarnin kënö nirqan: “Diospa tsurinkunapita karqa, kë rumikunata niri tantaman tikrariyänampaq” (Mateu 4:3). Jesusqa musyarqanmi kikimpa munënimpaq poderninwan imatapis rurëqa mana alli kanqanta, tsëmi Diablu tentanqanmanqa ishkirqantsu.

Peru Diabluqa juknöpam jina yapë tentëta tïrarqan. Jerusalenchö templupa mas rara janampita jeqakurkunampaqmi nirqan, tsënöpa angelkuna salvayänampaq. Peru Jesusqa manam tsë tentacionman ishkirqantsu. Tsëpa rantinqa, tsëta rurarnin Diosta pruëbaman churë mana alli kanqantam Biblia ninqampita yarpätsirqan.

Tsëpitanam Diabluqa Jesusta yapë tentëta tïrarqan. “Patsachö llapan gobiernukunata y riquëzankunata[m] rikäratsirqan”, tsëpitam kënö nirqan: “Qonqurïkur juk kutilla adorëkamaptikiqa, kë llapantam qoykushqëki”. Peru tsëmanqa manam ni ichikllapis Jesusqa pensarqantsu. Tsëmi, “¡këpita ëwakï Satanas!” nirqan (Mateu 4:8-10). Jesusqa musyarqanmi Jehovällata adoranampaq kaqta, y pëqa tsëta ruranampaqmi decidïdu këkarqan.

Diablupa tentacionninkunapita y tsëkunachö Jesus imanö tsarakunqampita, ¿imatataq yachakuntsik? Tsëqa yachatsimantsik, tsë tentacionkuna rasumpa kanqanta y Diabluqa nunapa mana alli munëninlla mana kanqantam. Mana rikakoq kaptimpis, Diabluqa rasumpam kan. Jina Patsachö llapan gobiernukuna Diablupa kanqanta y pë controlanqantam yachakuntsik. Tsënö mana kaptinqa, ¿Satanas tsëkunata Jesusta äninmantsuraq karqan?

Jinamampis, juk kutilla adorëkuptinqa, patsachö llapan gobiernukunata qoykunampaq kaqtam Diabluqa Jesusta nirqan. Jina noqantsiktapis tsënöllam tentamënintsikta tïranman, itsa atska qellëyoq, autoridäyoq o reqishqa kanantsikpaq imatapis ruranman. Ima tentacion kaptimpis, Jesusnö tsarakunqantsik y Diosllata mana jaqipa sirwinapaq churapakanqantsikmi mas alliqa kanqa. Jina yarpäshun, Diabluqa Jesusta jaqirirqan yapë tentanampaq “mas alli tiempu kanqanyaq[mi]”, y noqantsikwampis itsa tsëta ruranqa (Lücas 4:13). Tsëmi alläpa precisan imëpis mäkoq mäkoqlla këkänantsik.