Adanwan Ëvaqa manam Diosta cäsukuyarqantsu

Juk kutim Ëva japallan këkarqan, y juk culebram kënö tapurqan: “¿Rasumpaku Diosqa niyäshurqunki ni mëqan plantapa frütantapis mana mikuyänëkipaq?”. Tsënam Ëvaqa kënö nirqan: “Juk plantapa frütanllatam mikuyta puëdiyätsu, tsëta mikurqa wanuyäshaqmi. Peru, wakin plantapitaqa mikuyta puëdiyämi”. Tsënam tsë culebraqa kënö nirqan: “Manam wanuyankitsu. Tsëta mikurqa Diosnömi kayanki”. Peru ¿rasunku tsëqa karqan? Manam. ¡Tsë culebraqa engañëkarqanmi! Y Ëvaqa creirirqanmi. Tsëmi tsë frütata munapar mikurirqan, y Adantapis qararqanmi. Adanqa musyarqanmi Diosta mana cäsukurqa wanuyänampaq kaqta, peru tsëta musyëkarpis mikurqanmi.

Tsë tardillam Jehoväqa Adantawan Ëvata parlaparqan, y imanir mana cäsukuyanqantam tapurqan. Ëvaqa culebratam culpatsarqan, y Adannam Ëvata culpatsarqan. Mana cäsukushqa kayaptinmi Jehoväqa huertapita ishkanta qarqurirqan. Y manana kutiyänampaqmi angelkunata y ninayoq espädata tsë huertapa yëkunanman churarqan.

Jehoväqa nirqanmi Ëvata engañaqtapis castiganampaq kaqta. Rasumpa kaqchöqa, manam culebratsu Ëvataqa parlaparqan. Culebrakunataqa manam parlayänampaqtsu Jehoväqa kamarqan, tsë culebrataqa juk mana alli angelmi parlatsirqan. Y tsëtaqa rurarqan Ëvata engañëta munarmi. Tsë angelqa Satanas Diablum karqan. Jehoväqa ichikllachönam Satanasta ushakätsinqa, y mananam nunakunata engañanqanatsu ni mana allikunata ruratsinqanatsu.