10 KAQ YACHAKUNËKIPAQ
¿Imanirtan ëwankiman Jehoväpa testïgunkunapa reunionninkunaman?
Imëllaqa Testïgukuna reunionninkunaman invitayäshurqunkiku. Capazchi ni imëpis mana ëwashqa karqa mantsapakunki o kënö ninki: “¿Testïgukunaqa imataraq reunionninkunachö rurayan? ¿Imanirtan imëpis reunionninkunaman ëwayan? ¿Noqapis ëwämanku?”. Këchömi yachakunki tsë reunionkunaman ëwanqëki alli kawakunëkipaq y Dioswan amïgu kanëkipaq imanö yanapashunëkipaq kaqta.
1 KAQ: ¿Imanirtan Testïgukunaqa reunionninkunaman ëwayan?
Bibliata qellqaq juk nunam nirqan: “Sirwishoqnikikuna juntakäyanqanchömi alabashqëki Teyta Jehovä” (Salmus 26:12). Tsëmi kanan witsampis, entëru Patsachö Jehoväpa testïgunkuna, Jehoväta alabayänampaq y pëman mañakuyänampaq cada semäna reunionninkunaman ëwayan, y tsëqa pëkunata alläpam kushitsin. Y asamblëankunachöqa mas atskaqmi juntakäyan.
2 KAQ: ¿Testïgukunapa reunionninkunachöqa imatataq yachakunki?
Tsë reunionkunachöqa Diospa Palabranchö ninqankunatam cläru entienditsikuyan (leyi Nehemïas 8:8). Reunionkunaman ëwarqa Jehoväpitam mas yachakunki, y kuyashunqëkita musyarmi reqita munanki, y amïgun këtam puëdinki. Reunionkunachö yachakunqëkiqa kushishqa kawanëkipaqpis yanapashunkim (Isaïas 48:17, 18).
3 KAQ: Reunionkunachö reqinqëki nunakunaqa, ¿imanötan yanapayäshunkiman?
Jehoväqa munan imëpis juntakarnin juknintsik juknintsik alli reqinakunata, kuyanakunata y allikunata rurar yanapanakunatam (Hebrëus 10:24, 25). Tsë reunionkunachöqa kuyakoq nunakunatam reqinki. Pëkunaqa qamnöllam Diospita mas yachakuyta munayan, y Bibliapita shumaq yachatsikayämunqampis yanapashunkim (leyi Romänus 1:11, 12). Tsëchöqa soltërukunawan y casädukunawanmi parlakuyta puëdinki. Pëkunaqa problëmakunapa pasarpis allim tsarakuykäyan. Rikanqantsiknöpis, reunionkunaqa yanapamantsikmi, tsëmi Jehoväqa imëpis ëwanata munan.
MASLLA YACHAKUSHUN
Jehoväpa testïgunkunapa reunionninkuna imanö kanqanta y imanir tsë reunionkunaman ëwanapaq kaqtam yachakushun.
4 KAQ: Jehoväpa testïgunkunapa reunionninkuna
Punta cristiänukunaqa Jehoväta adorayänampaqmi juntakäyaq (Romänus 16:3-5). Leyiyë Colosensis 3:16 ima ninqanta y këpaq parlayë:
Punta cristiänukunaqa, ¿imatataq rurayaq Jehoväta adorayänampaq juntakarnin?
Kanan witsampis Jehoväpa testïgunkunaqa, Jehoväta adorayänampaqmi juntakäyan. Reunionninkuna imanö kanqanta, VIDEUCHÖ rikäyë. Tsëpitana juk reunionchö këkäyanqan dibüjuta rikäyë, y këkunapaq parlayë:
Colosensis 3:16 ninqannöpis, ¿Testïgukunapa reunionninkunachöqa imatataq rurayan?
Videuchö rikanqëkipitaqa, ¿imatan mas gustashunki?
Leyiyë 2 Corintius 9:7 ima ninqanta y këpaq parlayë:
¿Imanirtan Testïgukunapa reunionninkunachöqa qellëta mañakuyantsu?
Kë semäna reunionchö yachatsikayämunampaq kaqpita parlayë.
Reunionchö yachatsikayämunampaq kaqpitaqa, ¿mëqantaq mas gustashunki?
¿Musyarqëkiku?
jw.org päginachömi Jehoväpa testïgunkunapa reunionninkuna mëchö y imë kanqanta tarinki.
Reunionkunachöqa puntaman yarqurir parlamurnin, actuarnin y videukunawanmi Bibliapita yachatsikayämun. Qallayänampaq y ushayänampaqqa juk canciontam cantayan y Jehovämanmi mañakuyan.
Reunionkunachöqa llapankunam yachakuyanqankunapita parlakurita puëdiyan.
Reunionkunachöqa llapan shamoqkunatam kushishqa chaskiyan.
Testïgukunapa reunionninkunachöqa manam qellëta mañakuyantsu, y yëkunëkipaqpis manam cobrayäshunkitsu.
5 KAQ: Reunionkunaman ëwanapaqqa kallpachakunantsikmi
Jesuswan familianqa Nazaretchömi täkuyaq, y Nazaretpita Jerusalenyaqqa kima junaqtaran chäyaq. Tsënö kaptimpis cada watam Jehoväta adorayänampaq ëwayaq. Leyiyë Lücas 2:39-42 ima ninqanta y këkunapaq parlayë:
¿Jehoväta adorayänampaq Jerusalenyaq ëwayänanqa fäciltsuraq karqan?
Y qampaqqa, ¿imanirtan fäciltsu kanman reunionkunaman ëwanëkipaq?
¿Imanirtan reunionkunaman ëwanëkipaq kallpachakunkiman?
Bibliachömi nin juntakëkur Jehoväta adoranantsikpaq. Leyiyë Hebrëus 10:24, 25 ima ninqanta y këpaq parlayë:
¿Imanirtan reunionkunamanqa imëpis ëwanantsik?
WAKIN IMA NIYANQAN: “Diosta adoranapaqqa manam juntakänantsikraqtsu nï religionchöraqtsu kanantsik”.
¿Peru Bibliachöqa imatataq Jehovä mandamantsik?
KËTAM YACHAKURQUNKI
Testïgukunapa reunionninkunaman ëwarqa Jehoväpitam mas yachakunki, pëtam mas kuyanki y wakinkunawan juntum Jehoväta adoranki.
¿Yarpankiku?
¿Imanirtan Jehoväqa reunionkunaman ëwanata munan?
Testïgukunapa reunionninkunachöqa, ¿imatatan yachakunki?
Reunionkunaman ëwanqëkiqa, ¿imanötan yanapashunkiman?
MASTA YACHAKUY
¿Reunionkunaman ëwëta penqakunkiku? Juk nunata reunionkunaman ëwë imanir gustanqanta rikë.
¡Imanö saludayämanqantaqa manam imëpis qonqayäshaqtsu! (4:16)
Reunionkuna alläpa gustaptin imëpis ëwanampaq juk jövin imata ruranqanta rikë.
Reunionkunapaq wakinkuna ima niyanqanta leyï.
“¿Imanirtan Jehoväpa testïgunkunapa reunionninkunaman ëwanantsik?” (jw.org päginachö yarqamoq)
Suwakoq y mana alli geniuyoq nuna geniunta cambianampaq Testïgukunapa reunionninkunaman ëwanqan imanö yanapanqanta leyi.
“Mëpapis ëwaq kä illapäwanmi” (Täpakoq, 1 de septiembri 2014)