13 KAQ YACHAKUNËKIPAQ
Mana alli religionkunachöqa Diosnintsiktam mana allichö quedatsiyan
Diosnintsik kuyakoq këkaptinqa, ¿imanirtan Diosta adoraq tukoq religiösukunaqa imëka mana allikunata rurayan? Mana alli religionchö karmi. Tsëmi mana kaqta yachatsikurnin y mana alli portakurnin Diosta mana allichö quedatsiyan. Këchömi yachakunki mana alli religionkuna imakunata rurayanqanta, rurayanqanwan Diosnintsik imanö sientikunqanta y pëkunata ima pasanampaq kaqta.
1 KAQ: Mana rasumpa kaqta yachatsikuyanqanqa, ¿imanötan Diosnintsikta mana allichö quedatsin?
Mana alli religionkunachöqa ‘Diospita rasumpa kaqman creiyänampa rantinmi, [...] engañakuyanqanta creiyan’ (Romänus 1:25). Bibliachöqa nin Diosnintsikta jutimpa qayanapaqmi. Peru mana alli religionkunachöqa manam Diospa jutinta nunakunata yachatsiyantsu (Romänus 10:13, 14). Desgraciakuna pasaptinqa Diospa castïgun o pë munaptin tsë mana allikuna pasanqantam niyan. Peru Bibliachö ninqannöpis, mana allikuna pasanqanqa manam Diospa culpantsu (leyi Santiägu 1:13). Tsënö mana rasun kaqta yachatsikuyaptinmi nunakunaqa Diosnintsikman mañakuyta nï pëman confiakuyta munayantsu.
2 KAQ: Mana alli portakuyanqanqa, ¿imanötan Diosnintsikta mana allichö quedatsin?
Mana alli religionkunachöqa manam Jehovä munanqannötsu nunakunata tratayan. Tsëmi Bibliachö nin: “Jutsankunaqa ciëluman chanqanyaqmi montonakashqa” (Apocalipsis 18:5). Polïticaman y guërrakunaman mëtikurmi mana alli religionkunachö kaqkunaqa imëka problëmakunata rurayan, y culpankunarëkurmi mëtsika nunakuna wanuyan. Tsë religionkunachö mandakoqkunaqa imëkayoqmi kayan, y tsëpaqqa iglesiankunaman ëwaqkunatam qellëta mañayan. Tsënö mana allikunata rurayanqanmi rikätsikun Diosnintsikta mana reqiyanqanta y sirweqnin mana kayanqanta (leyi 1 Juan 4:8).
3 KAQ: Mana alli religionkuna rurayanqanta rikarnin, ¿imanötan Jehovä sientikun?
Mana alli religionkunachö rurayanqankunaqa manam pitapis gustantsu, Jehovä Diostapis manam gustantsu. Mana rasun kaqta yachatsikuyaptin y nunakunata sufritsiyaptinmi Diosqa mana alli religionkunachö mandakoqkunapaq alläpa cölerashqa këkan. Tsëmi ushakätsinampaq kaqta willakur Bibliachö kënö nin: “Manam yapëqa ni pï rikanqanatsu” (Apocalipsis 18:21). Diosnintsikqa ichikllachönam mana alli religionkunata ushakätsinqa (Apocalipsis 18:8).
MASLLA YACHAKUSHUN
Mana alli religionkunapaq Jehovä ima ninqanta, mana allikunata rurayanqanta y Diospita yachakuyta mana dejanëkipaq kaqtam yachakushun.
4 KAQ: ¿Llapan religionkunaku Diospaqqa alli kayan?
Wakinkunaqa niyan llapan religionkuna allilla kayanqantam, ¿peru Bibliachöqa imatataq nin? Leyiyë Mateu 7:13, 14 ima ninqanta y këpaq parlayë:
Bibliachö ninqannöpis, ¿imanötan kawëman chätsikoq näniqa?
VIDEUTA rikäyë y këpaq parlayë:
¿Llapan religionkuna Diospaq allilla kanqantaku Bibliachöqa nin?
5 KAQ: Mana alli religionkunachö mandakoqkunaqa Dios kuyakoq kanqanta manam rikätsikuyantsu
Mana alli religionkunachöqa rurayanqankunawanmi Diosnintsikta mana allichö quedatsiyan. Pëkunaqa guërrakunamanmi imëpis mëtikuyashqa. VIDEUTA rikäyë y këkunapaq parlayë:
Mana alli religionkunachö mandakoqkunaqa, ¿imatataq rurayarqan guërra witsan?
¿Ima ninkitan guërraman mëtikuyanqampaq?
Leyiyë Juan 13:34, 35 y 17:16 ima ninqanta y këkunapaq parlayë:
¿Imanöraq Jehoväqa sientikun religionkuna guërrakunaman mëtikuyaptin?
Diosnintsik mandakunqankunata mana cäsukurmi, mana alli religionkunachö kaqkunaqa imëka mana allikunata rurayashqa. ¿Imakunata rurayanqanchötan mana cäsukoq kayanqanta rikarqunki?
Mana alli religionkunachö mandakoqkunaqa Dios kuyakoq kanqanta manam rikätsikuyantsu.
6 KAQ: Mana alli religionkunapita yarqukuyänantam Diosnintsikqa munan
Leyiyë Apocalipsis 18:4a ima niyanqanta y këpaq parlayë:
Mana alli religionkunapita yarqukuyänantam Diosnintsikqa munan. ¿Ima ninkitan Diosnintsik tsëta munanqampaq?
7 KAQ: Diospita yachakur sïgui
Mana alli religionkunachö rurayanqankunaqa manam Diospa culpantsu. Këllaman pensarishun: juk wamra papäninta mana cäsukur wayimpita ëwakuptin y mana allikunata rurar kawakuptinqa, ¿papänin culpayoq kanqantatsuraq nishwan? Manam.
¿Allitsuraq kanman mana alli religionkunachö rurayanqan Diospa culpan kanqanta pensanqantsik y tsërëkur Diospita yachakuyta dejanqantsik?
WAKIN IMA NIYANQAN: “Religionkunachöqa imëka mana allikunatam rurayan, tsëmi Diospaqqa imatapis musyëta munätsu”.
¿Qamqa ima ninkitan?
Mana alli religionkunachö rurayanqankunapitaqa, ¿imanirtan Diospaq mana allita pensashwantsu?
KËTAM YACHAKURQUNKI
Mana alli religionkunaqa mana rasumpa kaqta yachatsikurnin y mana allita rurayanqankunawanmi Diosnintsikta mana allichö quedatsiyashqa, tsëmi Diosnintsik ichikllachöna ushakätsinqa.
¿Yarpankiku?
¿Ima ninkitan mana alli religionkunachö mana rasumpa kaqta yachatsikuyanqampaq y mana allikunata rurayanqampaq?
¿Ima nintan Jehoväqa mana alli religionkunapaq?
Mana alli religionkunataqa, ¿imatataq Diosnintsik ruranqa?
MASTA YACHAKUY
Mana alli religionkuna Diosnintsikpaq imanir mana alli kanqanta yachakuy.
“¿Llapan religionkunaku yanapakun Diosnintsikta alli adoranapaq?” (jw.org päginachö yarqamoq)
¿Imanirtan Jehoväqa munan pëta adoranapaq alli religionchö kanata?
“Diosta alli adoranapaqqa, ¿ima religionchöpis kanantsikraqku?” (jw.org päginachö yarqamoq)
Juk cüram religionninchö imëka mana allikunata rikarqan, peru tsëpitaqa rasumpa kaqtam yachakurqan.
“Religionninta juk cüra dejan” (¡Musyatsikoq!, febrëru 2015)
Mana alli religionkunachöqa Diospaq mana rasumpa kaqta yachatsikurmi nunakunata creitsiyashqa Dios castigakoq kanqanta. Imanir tsënö yachatsikuyanqanta leyi.
“Diospita rakimaqnintsik ulikïkuna” (Täpakoq, 1 de enëru 2014)