Yachatsikunapaq Diospa Escuëlan
Imapaqtaq kë escuela: Diospita shumaq willakuyänampaq y alli yachatsikuyänampaq publicadorkunata yanapanampaqmi.
Ëka tiempotaq: Tsë escuëlaqa llapan semänakunam rurakan.
Mëchötaq rurakan: Yachatsikuyänan Wayikunachömi.
Pikunataq tsë escuëlamanqa ëwayan: Reunionkunaman mana dejëta ëwaqkuna, Bibliapa yachatsikïninkunata wiyakoqkuna y Biblia ninqannö kawaqkunam.
Imanötaq matriculäkuyan: Yachatsikunapaq Diospa Escuëlanta rikaq wawqiwanmi parlayänan.
Esclerosis lateral amiotrófica qeshyawan kar Parälisisyoq Shäronmi kënö nin: “Yachatsikunapaq Diospa Escuëlanqa, yachatsimashqa tukï publicacionkunapita ashïkur alli yachakunäpaq y imanöpis imanö kanqanta shumaq yachatsikunäpaqmi, jina Diospa kaqchö wakinkunapis noqanölla alli kayänanman yarpachakunäpaqmi”.
Atska watakunapana watukakur pureq Arnie jutiyoq wawqim kënö nin: “Wamra kanqä witsanqa parlarmi watakaq kä y nunakunapa cärankunata rikëtam mantsaq kä. Kë escuëlawan Jehová yanapamashqa kaptinmi, kananqa alläpa mantsakönatsu y imapaqpis mana väleqtanö rikäkönatsu, jina yachatsikurnin imanö shütanäpaq kaqta y yachatsikurnin mana pantanäpaq kaqtam yachakurqö. Alläpam agradecikö congregacionchö Diosta alabanäpaq y alli yachatsikunäpaq shumaq yachatsiyämanqampita”.
Betelman Tsëraq Yëkoqkunapaq Escuela
Imapaqtaq kë escuela: Mushoq betelïtakuna Diospa wayinchö kushishqa yanapakuyänampaqmi.
Ëka tiempotaq: 16 semänakunam, cada semänam 45 minütokuna yachakuyan.
Mëchötaq rurakan: Betelchö.
Pikunataq tsë escuëlamanqa ëwayan: Nombrashqa betelïtakuna y juk watapa o más watakunapa trabajayänampaq invitashqa kaqkunam.
Imanötaq matriculäkuyan: Mushoq betelïtakunaqa manam precisantsu matriculäkuyänan.
1980 watakunachö tsë escuëlaman ëwaq Demetrius jutiyoq wawqin kënö nin: “Tsë escuëlaqa yanapamarqan más alli estudianäpaq y Betelchö atska watakunapa yanapakunäpaqmi. Tsëchö yachatsikoqkuna, yachatsiyämanqan y shumaq consëjokunata chaskinqäqa chipyëpam Jehová kuyamanqanta y Betelchö trabajar alli kanäta munanqanta rikätsimarqan”.
Kaitlyn panim kënö willakun: “Jehoväpa kaqchö alli kanäpaq yarpachakunäpaqmi yanapamarqan. Betelman Tsëraq Yëkoqkunapaq Escuëlaqa Jehoväta, wayinta y markanta más kuyanäpaq y reqinäpaqmi yanapamarqan”.
Anciänokunapaq y Siervo Ministerialkunapaq
Escuela Imapaqtaq kë escuela: Watukakur pureq anciänokunata, congregacionchö anciänokunata, y höraqa siervo ministerialkunatam congregacionchö y Diospa markanchö cargonkunata imanö rurayänampaq yachatsin (Hech. 20:28). Kanan witsan problëmakunapaq, congregacionkuna imanö kayanqampaq y imakunata necesitäyanqankunapaqmi yachakuyan. Kë escuëlataqa cada wallka watakuna rurakänampaqmi Jehoväpa Testïgonkunata Pushaqkuna patsätsiyan.
Ëka tiempotaq: Kë qepa watakunataqa rurakashqa ishkë junaq o ishkë junaq y pullanmi watukakur pureqkunapaq, juk junaq y pullanmi anciänokunapaq y juk junaqmi siervo ministerialkunapaq.
Mëchötaq rurakan: Höraqa Yachatsikuyänan Wayichömi y höraqa Asambleakunata Rurayänan Wayichömi.
Pikunataq tsë escuëlamanqa ëwayan: Watukakur pureq anciänokuna, congregacionchö anciänokuna y siervos ministerialkunam.
Imanötaq matriculäkuyan: Anciänokunata y siervo ministerialkunatam congregacionkunata watukaq wawqi invitan. Watukakur pureq anciänokunataqa kikin sucursalmi invitan.
“Tsë escuëlachö wallka tiempollachö mëtsikata yachakurpis, kushishqa kayänampaq y Biblia ninqannö Jehoväta sirwirnin portakuyänampaqmi anciänokunata yanapan. Mushoq anciänokuna o mëtsika watapana anciänokunapis Diospa üshankunata cuidëta y ‘juc yarpellana y juc shonqunolla’ kayänampaqmi yachakuyan.” (Quinn, urachö.)
“Kë escuëlaqa Diospa kaqta más kuyanapaq, tukï peligrokunapita cuidakunapaq y Diospa üshankunata shumaq cuidanapaqmi chipyëpa yanapakun. Jehoväqa alläpa kuyakoqmi.” (Michael.)
Precursor Regularkunapaq Escuela
Imapaqtaq kë escuela: Precursor regularkuna Diospita alli yachatsikuyänampaqmi (2 Tim. 4:5).
Ëka tiempotaq: Ishkë semana.
Mëchötaq rurakan: Mëchö rurakänampaq kaqtaqa sucursalmi patsätsin, pero masqa Yachatsikuyänan Wayikunachömi rurakan.
Pikunataq tsë escuëlamanqa ëwayan: Juk wata o más watakunana Precursor regularnö yanapakïkaqkunam.
Imanötaq matriculäkuyan: Precursor regularnö alli këkaqkunaqa manam precisantsu matriculäkuyänan, congregacionkunata watukaq wawqim invitashqa kayanqanta willan.
Lily (derecha lädochö) jutiyoq cristiänam kënö nin: “Tsë escuëlaqa Diospita yachatsikunqächö y kawënïchö problëmäkunata altsanäpaqmi yanapamashqa. Masmi alliyarqö estudianqächö, yachatsikunqächö y Bibliata utilizanqächö. Nuna mayïkunata yachatsinäpaq, anciänokunata y congregación miranampaq yanapakunäpaq listo këkanqätam sientekö”.
Ishkë kutina tsë cläseman ëwaq Brenda jutiyoq cristiänam kënö nin: “Diospa kaqchö alli yanapakunäpaq, concienciäta sinchiyätsinäpaq y nuna mayïkunata yachatsinäpaqmi chipyëpa yanapamashqa. ¡Imanö alläpa kuyakoqmi Jehoväqa!”.
Congregacionchö Anciänokunapaq Escuela
Imapaqtaq kë escuela: Congregacionchö cargonkunata alli atiendeyänampaq y Diospa kaqta más entiendeyänampaqmi yanapakun.
Ëka tiempotaq: Pitsqa junaq.
Mëchötaq rurakan: Sucursalmi patsätsin, pero masqa rurakan Yachatsikuyänan Wayichö o Asamblëakunata Rurayänan Wayichömi.
Pikunataq tsë escuëlamanqa ëwayan: Anciänokunam.
Imanötaq matriculäkuyan: Sucursalmi invitan.
Estados Unïdoschö 92 kaq cläseman ëwaqkuna ima niyanqanta rikärishun:
“Tsë escuëlaqa, kikï imanö këkanqäta rikänapaq y Jehoväpa üshankunata imanö cuidanäpaqmi yanapamashqa.”
“Kananqa Bibliapa más precisaq yachatsikïninkunawanmi wakinkunata más alli yanapashaq.”
“Yachakunqäqa imëkamayaqpis yanapamanqam.”
Watukakur Pureq Anciänokunapaq y Warminkunapaq Escuela
Imapaqtaq kë escuela: Congregacionkunata watukaqkuna y Watukakoqkunata rikaqkuna “Diosnintsicpaq willapäcur” congregacionkunata más alli atiendeyänampaqmi yanapan (1 Tim. 5:17; 1 Ped. 5:2, 3).
Ëka tiempotaq: Ishkë killa.
Mëchötaq rurakan: Sucursalmi patsätsin.
Pikunataq tsë escuëlamanqa ëwayan: Congregacionkunata watukaqkuna y Watukakoqkunata rikaqkunam.
Imanötaq matriculäkuyan: Sucursalmi watukakur pureqkunata y warminkunata invitan.
“Kananqa, Diospa markanta Jesus pushaq kanqampitam más agradecikuyä. Cristiano mayïkunata kallpata qoy y congregacionpa jukllëllanö këninta sinchiyätsinan alläpa precisanqantam alleq entiendeyä. Masqa yarpäyä, watukakur pureq consejakuptin y piñapäkuptimpis, más precisaq rurëninqa cristiano mayinkunata Jehová alläpa kuyanqanta yarpätsïmi” (1999 watachö punta kaq cläsepita, Joel.)
Soltërokuna Bibliapita Yachakuyänampaq Escuela
Imapaqtaq kë escuela: Jehoväpa markanchö anciänokuna y siervo ministerialkuna más cargoyoq kayänampaqmi yanapan. Tsë escuëlapita yarqoqkunataqa nacionninchö más necesitäyanqan sitiokunamanmi mandayan. Wakinkunataqa juk nacionkunamampis mandëta puëdeyanmi ëwëta munayaptinqa. Wakinqa, karu markakunachö mana fäcil-lla chänan markakunachö Diospita yachatsikur qallayänampaqmi precursor especialnö yanapakuyänampaq mandayan.
Ëka tiempotaq: Ishkë killa.
Mëchötaq rurakan: Sucursalmi patsätsin, pero masqa rurakan Yachatsikuyänan Wayichö o Asamblëakunata Rurayänan Wayichömi.
Pikunataq tsë escuëlamanqa ëwayan: 23 watapita hasta 62 watayaq alli saludyoq y majannaq ollqukunam, pëkunaqa necesitäyanqan sitiokunachö yanapakuyänampaqmi listo këkäyänan (Mar. 10:29, 30). Ishkë watapam mana dejëta precursor regularnö sirwikäyänan y anciänonö o siervo ministerialnömi ishkë watapa mana dejëta yanapakïkäyänan.
Imanötaq matriculäkuyan: Ishkë junaq kaq asamblëachömi tsë escuëlaman ëwëta munaqkunapaq juk reunión rurakan.
Estados Unïdospita 23 kaq cläseman ëwaq Rick jutiyoq wawqin kënö nin: “Tsë escuëlachö këkar yachakunqäman chipyëpa yarpachakuptïmi, Jehoväpa espïritun pasëpa cambianäpaq yanapamarqan. Imatapis ruranëkipaq Jehová mandashuptikiqa yanapashunkim tsëta ruranëkipaq. Kikikillaman yarpachakunëkipa rantin o trukan Jehoväpa munëninta rurëpaq yarpachakuptikiqa, pëmi kallpata qoshunki.”
Alemaniachö yanapakïkaq Andreas jutiyoq wawqin kënö nin: “Diospa markanqa kanan witsan juk milagro kanqantam yachakurqö. Yachakunqäqa tukï rurëchö yanapakunapaqmi yanapamashqa. Jina Bibliachö këkaq mëtsika willakïkunam, cristiano mayintsikta y Jehoväta sirwinqantsikpita rasumpa kushikï shamunqanta yachatsimashqa”.
Casakushqakuna Bibliapita Yachakuyänampaq Escuela
Imapaqtaq kë escuela: Casado cristiänokunata Jehová y markan más alli utilizäyänampaq yachatsikïta chaskiyänampaqmi. Tsë escuëlapita yarqoqkunataqa nacionninchö más necesitäyanqan sitiokunamanmi mandayan, wakinkunataqa juk nacionkunamampis mandëta puëdeyanmi ëwëta munayaptinqa. Wakintaqa, karu y fäcil-lla mana chänan markakunachö Diospita yachatsikur qallayänampaqmi precursor especialnö yanapakuyänampaq mandayan.
Ëka tiempotaq: Ishkë killa.
Mëchötaq rurakan: Estados Unïdoschö, y 2012 wata septiembre killapita patsëmi wakin nacionkunachö, tsë escuëlaqa rurakan Yachatsikuyänan Wayichö o Asamblëakunata Rurayänan Wayichömi.
Pikunataq tsë escuëlamanqa ëwayan: Alli saludyoq 25 watayoqkunapita hasta 50 watayoqkunam, más necesitäyanqan sitiokunachö yanapakïta puëdeqkuna y Isaïasnöpis “¡Këchömi noqa këqa! Noqata kachamë” neqkunam (Is. 6:8). Ishkë watapam casado kayänan y mana dejëtam llapan tiemponkunawan sirwikäyänan. Ollqu kaqqa ishkë watapanam mana dejëta anciänonö o siervo ministerialnö yanapakïkänan.
Imanötaq matriculäkuyan: Jatun kaq asamblëachömi ëwëta munaqkunapaq juk reunión rurakan. Tsë reunión nacionnikipa asamblëankunachö mana rurakaptinqa, ëwëta munayanqëkitam sucursalman qellqëta puëdeyanki.
“¡Kë puwaq semänakunaqa majayoq cristiänokunapa kawënintam chipyëpa cambiaratsin Jehoväta sirwiyänampaq! Chipyëpam churapakäyarqö jatun cösaskunaman mana yarpachakushpa Jehoväta imëpis sirwiyänäpaq.” (Eric y Corina, urachö; 2011 wata punta kaq clase.)
Watchtowerpa Galaad Escuela
Imapaqtaq kë escuela: Mëtsika nunakuna täräyanqan markakunachö, misionëronö, watukakur pureqnö o betelïtanö yanapakuyänampaqmi yachatsin. Tsë llapan yachatsikïtaqa chaskiyan Diospita yachatsikïchö y sucursalkunachö más yanapakuyänampaqmi.
Ëka tiempotaq: Pitsqa killa.
Mëchötaq rurakan: Centro Educativo de la Watchtower (Patterson, Nueva York) nishqanchömi.
Pikunataq tsë escuëlamanqa ëwayan: Tsë escuëlaman mana ëwashqa misionërokuna, precursor especialkuna, watukakur pureq anciänokuna o betelïtakunam. Majanwanmi mana dejëta kima watapa mëqan kaqchöpis sirwikäyänan, jina inglés idiömatam alleq parlayänan, leiyänan y qellqayänan.
Imanötaq matriculäkuyan: Majayoq cristiänokuna tsë escuëlaman ëwayänampaq mañakuyänampaqmi Sucursalta Rikaqkuna invitayan.
Estados Unïdospita Lade y Monique cristiänokunam Africachö yanapakïkäyan. Ladem kënö willakun: “Më nacionmampis yanapakoq ëwayänäpaqmi y makïkunata ‘remangarkur’ kuyashqa cristiano mayïkunawan trabajayänäpaqmi Galaad Escuela yanapayämashqa”.
Moniquenam kënö nin: “Diospa Palabrampita yachakunqämannö ruranqämi yanapakïkanqä markachö kushishqa kanäpaq yanapaman. Kushishqa kanqäqa rikätsiman Jehová alläpa kuyamanqantam”.
Sucursalta Rikaqkunapaq y Warminkunapaq Escuela
Imapaqtaq kë escuela: Sucursalta Rikaqkunatam yanapan Betel wayikunata shumaq rikäyänampaq y congregacionkunata, congregacionta watukaqkunata, watukakoqkunata rikaqkunata, juk idiömaman tikratseqkunata, publicacionkunata imprimimoqkunata y publicacionkunata apatseqkunata yanapayänampaq.
Ëka tiempotaq: Ishkë killa.
Mëchötaq rurakan: Centro Educativo de la Watchtower (Patterson, Nueva York) nishqanchömi.
Pikunataq tsë escuëlamanqa ëwayan: Ollqu kaqmi Sucursalta Rikaqnö o Diospa kaqta juk Nacionchö Rikaqnö yanapakïkänan o tsënö yanapakunampaq invitashqa kayänan.
Imanötaq matriculäkuyan: Jehoväpa Testïgonkunata Pushaqkunam tsë wawqikunata y warminkunata invitan.
Nigeria nacionchö yanapakïkaq 25 kaq cläseman ëwaq Lowell y Cara. Löwellmi kënö nin: “Tsë escuëlam yarpätsimarqan, mëtsika trabäjoyoq kar o ima trabäjota ruranäpaq niyämashqa kaptimpis, Jehoväpa kaqchö alli këkanqä pëta kushitsinampaq más alli kanqanta. Jina yarpätsimarqanmi sirweqninkunata Jehová kuyanqannölla noqapis kuyakunäpaq”.
Cäranam këta nin: “Kënö niyämanqanmanmi alläpa yarparä: juk yachatsikïpita entiendeyänampaqnölla yachatsikïta mana yacharqa, puntata kikikim alleq entiendenëki wakinkunata yachatsinëkipaq”.