Wanushqakunaqa kawariyämunqam

¿Yarpankiku Gail warmipaq parlanqantsikta? Qowan wanunqanta mana qonqanampaq kaqtaqa manam musyantsu. Tsënö kaptimpis, Dios änikunqan mushoq Patsachö qowanta rikänampaq kaqtaqa kushishqam shuyaran. Gailmi kënö nin: “Apocalipsis 21:3, 4 textum alläpa gustaman, tsë versïculukunachömi kënö nin: ‘Pëllam Diosnincunapis canqa. Cananqa mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu’”.

Gailqa kënöpis ninmi: “Kë textuqa alläpa shumaqmi. Wanupakushqakunataqa alläpam llakipä porqui pëkunaqa manam musyayantsu kawarimï kanampaq kaqta”. Creinqanta rikätsikunampaqmi, Gailqa llapan tiempunta utilizan shamoq tiempuchö mananam “wanuyanqanatsu” nishpa Dios änikunqanta vecïnunkunata yachatsinampaq.

Tsë änikï mana creipaqnö kaptimpis, yarpë alläpa grävi qeshyawan Job këkanqanman (Job 2:7). Wanukïkïta munarnimpis, pëqa markäkurqanmi Dios kawaritsimunampaq kaqman. Tsëchi nirqan: “Wanushqakuna këkanqanman pakëkamankiman. Qammi qayaramanki, y noqam contestashqëki. Makikiwan ruranqëkitaqa manam qonqankitsu” (Job 14:13, 15). Rikanqantsiknömi Dios kawaritsimunampaq kaqmanmi markäkurqan.

Jobwan millonyëpa nunakunapaqwanmi Diosqa tsëta ruranqa, wallka tiempullachöna kë Patsata juk mushoq huertaman tikratsimunqan junaq (Lücas 23:42, 43). Wanushqakuna kawariyämunampaq kaqtam Bibliaqa nin (Hëchus 24:15). Jesuspis nirqanmi: “Tse nishqäcunata ama espantacuyëtsu, porqui chämonqam junaqcuna parlashqäcunata wanushqacuna wiyarirnin, cawariyämunan” (Juan 5:28, 29). Tsë änikï cumplikaqtam Jobqa rikanqa, tsëchömi ‘kallpampis jövin kanqan witsanman kutikanqa’ y ëtsampis ‘wamra kanqan witsanmanmi kutinqa’ (Job 33:24, 25). Tsënöllam pasanqa nunakunata kawaritsimunampaq Dios änikunqanman markäkoqkunawampis.

Pïnikillapis wanuptin sufrishqa kaptikiqa yachakunqantsikmi yanapashunki. Tsënö kaptimpis, Bibliachö Dios änikunqankuna këkaqman yarpachakunqëkim shuyäkïta y valorta qoshunki kallpachakur sïguinëkipaq (1 Tesalonicensis 4:13).

¿Musyëta munankimantsuraq llakikïnikita vencinëkipaq ima masta ruranëkipaq kaqta? Itsa kënö tapukushqanki: ¿imanirtaq mana allikuna pasananta y sufrinantsikta Dios permitin? nishpa. Tsëqa, Internetchö jw.org neq päginäkunaman yëkï, tsëchömi tapukïnikipa respuestanta y Bibliapa shumaq consëjunkunata tarinki.