¿Imatataq Diosqa rurashqa?

Pitapis alli reqita munarqa imakunata ruranqanta musyanantsikmi alläpa precisan. Tsënöllam, Diosnintsikta reqita munarpis imakunata ruranqanta musyanantsik. Alläpam espantakunki llapan ruranqankuna kanan witsan yanapëkamanqantsikta musyarirqa, y shamoq tiempuchöpis tsëta musyanqantsikqa yanapamäshunmi.

NOQANTSIKRËKURMI DIOSQA IMËKATAPIS KAMASHQA

Jehoväqa Alläpa Puëdeq Kamamaqnintsikmi, y mana rikakoq imanö këninqa “munduta kamanqampita patsëmi cläru rikakun, porqui rurashqa cösaskunachömi tsëkunaqa rikakun” (Romänus 1:20). “Pëmi poderninwan Patsata kamashqa, jina alläpa yachëninwanmi Patsata alli patsätsishqa, y yachëwanmi ciëluta kamashqa” (Jeremïas 10:12). Llapan kamanqankunam, Dios alläpa kuyamanqantsikta rikätsimantsik.

Jehoväqa “kikin niraqtam” kamamarquntsik, tsëqa yanapamantsik alli y kushishqa kawakunantsikpaqmi (Genesis 1:27). Tsëmi noqantsikpis wakin ruranqantsikchöqa, Diospa imanö këninta rikätsikïta puëdintsik. Jinamampis, pë imanö pensanqanta y mandakunqankunata entiendinapaqmi yachëta qomarquntsik. Y Dios mandamanqantsiknö rurarqa, mas kushishqam kawakushun y atska bendicionkunatam chaskishun; jina Dioswampis amïgun kashun.

Kë Patsachö imëkakunata ruranqanmi, Diosnintsik alläpa kuyamanqantsikta rikätsimantsik. Tsëmi apostol Pabluqa, Diospaq parlarnin kënö nirqan: “Manam jaqishqatsu imanö këninta rikätsikïtaqa, tsëmi alli kaqta rurarnin ciëlupita tamyata y tiempunchö alli cosëchata qoyäshurniki, mëtsika mikïwan pachëkikunata juntatsin y shonqïkikunata alläpa kushitsin” (Hëchus 14:17). Kë Patsata rurarninqa, manam wananqantsikllatatsu Diosqa qomarquntsik, sinöqa kushishqa kawakunantsikpaqmi imëkata qomarquntsik. Y shamoq tiempuchöqa, këkunapitapis mastam qomäshun.

Jehoväqa kë Patsata rurarqan, nunakuna imëyaqpis kawakuyänanta munarmi. Bibliachömi nin, ‘patsataqa nunakunapa tsurinkunata’ qoshqa kanqanta, jina “tsëchö kawayänampaq” rurashqa kanqantam nin (Salmus 115:16; Isaïas 45:18). Kë Patsachöqa, ¿pikunataq y ëka tiempupataq kawayanqa? Bibliachömi kënö nin: “Alli kaqta ruraq nunakunallam täräyanqa, y tsëchömi imëkamayaqpis kawayanqa” (Salmus 37:29).

Mana wanushpa kawakuyänampaqmi, Jehoväqa Adanwan Ëvata kamarqan. Y juk shumaq huertamanmi pëkunata churarqan, ‘shumaq cuidayänampaq y imëkata rurar trabajayänampaq’ (Genesis 2:8, 15). Juk shumaq cargutam Diosqa pëkunata jorqan, y kënömi nirqan: “Wamrëkikuna katsun y atskaqyäyë y patsa juntanqanyaq mirayë y dominayë” (Genesis 1:28). Awmi, Adanwan Ëvaqa kë Patsachö mana wanushpa y kushishqa kawakïtam puëdiyanman karqan. Peru Dios mandakunqanta mana cäsukurninmi, kë Patsachö kushishqa kawakïta oqrariyarqan. Tsënö kaptimpis, nunakunapaq y kë Patsapaq Jehovä rurëta pensanqanqa manam cambiashqatsu. Peru ¿imatataq qomanqantsik? Tsëtaraq puntata rikärishun.

DIOSQA PALABRAN BIBLIATAM QOMASHQANTSIK

¿Imanirtaq Jehoväqa Palabran Bibliata qomashqantsik? Palabrantaqa qomashqantsik pëta mas reqinapaqmi (Proverbius 2:1-5). Rasumpa kaqchöqa, Bibliaqa manam Diospaq llapan tapukunqantsiktatsu contestamantsik, tsëtaqa manam ni ima libruchöpis tarishwantsu (Eclesiastes 3:11). Tsënö kaptimpis, Bibliachö llapan ninqankunaqa mas reqinapaqmi yanapamantsik. Tsëchömi Diosnintsik nunakunata imanö tratanqanta y imanö amïgun këta puëdinqantsikta yachakuntsik (Salmus 15:1-5). Jina imanö sirwinantsikta munanqanta, imanö nuna kanantsikta munanqanta y kapoqyoq këta imanö rikanqantam yachakuntsik. Y Bibliachöqa nin, Tsurin Jesucristu parlanqankunachö y ruranqankunachö Kamakoq Teytantsikta mas reqita puëdinqantsiktam (Juan 14:9).

Jehoväqa Palabranta qomarquntsik kushishqa kawakunapaq y bendicionninkunata chaskinapaq imakunata ruranantsik precisanqanta musyanapaqmi. Jina familiachö kushishqa kanapaq, kikintsik kushishqa sientikunapaq y alläpa mana yarpachakunapaqmi alli consëjukunata tarintsik. Bibliachöqa kë precisaq tapukïkunapa respuestantam tarintsik: ¿imanirtaq alläpa sufrintsik? Y ¿imanöraq shamoq tiempuchö kawakushun? Tsë tapukïkunapitaqa, tsëpitaran yachakushun. Jina Bibliachöqa, änikunqankunata cumplinampaq Diosnintsik imakunata rurëkanqantam musyatsimantsik.

Biblia alläpa precisaq libru kanqanta y Diospita shamunqantaqa maskunaran rikätsikun. 1.600 watanömi atskaq nunakuna Bibliataqa escribiyarqan, peru tsënö kaptimpis juk willakïllapitam parlan. Tsëmi cläru rikätsimantsik Dios escribitsimushqa kanqanta (2 Timoteu 3:16). Unë librukunapitaqa, Bibliaqa alläpa jukläyam. ¿Imanirtaq jukläya? Porqui Biblia willakunqankunaqa manam cambiashqatsu, y tsënö kanqantaqa rikantsik waranqëpayan escribiyanqan unë röllukunachömi. Jina Bibliata traduciyänanta, më tsëman chänanta y leyiyänanta michäkïkäyaptimpis, cäsi llapan nunakunamanmi chëkan. Kanan witsanqa, Bibliatam wakin librukunapitapis masqa rantikuyan y traduciyan. Juk Bibliata katsinqantsikqa rikätsikun, Diospa Palabranqa imëpis mana ushakänampaq kaqtam (Isaïas 40:8).

DIOSQA ÄNIKUNQANTAM CUMPLIMUNQA

Änikunqankunata cumplinampaqmi, Diosqa juk alläpa precisaq qarëta qomashqantsik. Qallananchö ninqannöpis, nunakuna mana wanushpa kë Patsachö kawakuyänantam Diosqa munarqan. Mana cäsukunqanrëkur y jutsallakunqanrëkurmi, Adanqa mana wanushpa kawakïta oqrarirqan. Peru manam pëllatsu tsënö kawëtaqa oqrarirqan, Bibliachömi kënö nin: “Juk nunarëkurllam llapan nunakunaman jutsa yëkurqan, y jutsarëkurnam pëkunaman wanï charqan, y tsënömi wanïqa llapan nunakunaman chärirqan, llapankuna jutsata rurayashqa kayaptin” (Romänus 5:12). Kë pasakunqanqa, Dios änikunqanta mana cumplinampaq kaqtanömi rikätsikurqan. Peru ¿imatataq Jehoväqa rurarqan?

Alli ruraq karninmi, Jehoväqa Adantawan Ëvata mana cäsukoq kayanqanrëkur castigarqan. Peru alläpa kuyakoq karmi, änikunqanta cumplinampaq imëkata rurarqan. Jina alläpa yachaq karninmi, Jehoväqa tsë problëmata imanö altsanampaq kaqta raslla willakurqan (Genesis 3:15). Jutsapita y wanïpita libramänapaqqa, Tsurin Jesucristum wanunan karqan. Tsë cumplikänampaqqa, ¿imakunatataq Jesus ruranan karqan?

Adan mana alli ruranqankunata altsanampaqmi, Jehoväqa Jesusta kë Patsaman kachamurqan kawëman chätsikoq yachatsikïta yachatsikunampaq y ‘kawëninwan chaninta pagakur mëtsikaqta libranampaq’a (Mateu 20:28; Juan 14:6). Adannö jutsannaq nuna karninmi Jesusqa jutsapita y wanïpita libramënintsikta puëdirqan, porqui pëqa wanunqanyaqmi Diosta cäsukurqan. Jesusqa manam ima mana allitapis rurashqatsu karqan wanunampaq, tsëmi Jehoväqa kawariratsimurqan y ciëluta kutinampaq jaqirqan. Jina mana wanushpa kawakïta nunakuna tariyänampaqmi, Jesusqa yanapakushqa. “Porqui imanömi juk nunapa mana wiyakoq këninllawan, mëtsikaq nunakuna jutsasapa këman chäyarqan, jina tsënöllam juk nuna wiyakoq kanqanllawan mëtsikaq nunakuna alli kaqta ruraq këman chäyanqa” (Romänus 5:19). Nunakuna mana wanushpa kë Patsachö kawakuyänampaq änikunqantaqa, Jesus wanunqanrëkurmi Diosqa cumplimunqa.

Adan jutsallakunqanrëkurmi imëka mana allikunaman charquntsik, y tsëta imanö altsanqanta musyanqantsikmi Jehoväta mas alli reqinapaq yanapamantsik. Tsëta ruranqanqa yachatsimantsik, Jehoväqa llapan änikunqankunata y llapan ninqäkunata imëpis cumplinqantam (Isaïas 55:11). Jina alläpa kuyamanqantsiktam rikätsimarquntsik, tsëmi Bibliachöqa kënö nin: “Këchömi noqantsikpaqqa Diospa kuyakïnin rikakashqa karqan, japallanlla Tsurinta nunakunaman Dios kachamushqa kanqanchö, tsënöpa përëkur noqantsik imëyaqpis kawëta tarinapaq. Kuyakïqa këmi: manam noqantsik Diosta kuyanqantsiktsu, sinöqa noqantsikta pë kuyamanqantsik y jutsantsikkunarëkur Dioswan amishtatsikoq ofrendatanö Tsurinta kachamunqanmi” (1 Juan 4:9, 10).

Noqantsikrëkur wanunampaq Tsurinta mandëkämurqa, ¿manatsuraq “ankupäkoq këninchö Tsurinwan juntu llapan wakin kaq cösaskunata” qomäshun? (Romänus 8:32). Diosnintsikqa mas cösaskunata qomänantsikpaqmi änimarquntsik. Tsëpita yachakurishun.