Tapukïkuna kaq

◼ ¿Imanirtaq mantsëpaq mana reqinakushqantsikkunawan Internetpa parlë?

Internetchöqa atska sitiokunanömi kan, tsëpam nunakunawan reqinakuyan y parlayampis. Wakin Internetchöqa, fötokunata y kikinkuna imanö kayanqantapis churayänampaq kanmi. Tsëkunaman wakin yëkurïkurmi piwampis parlayan. Internetcho sitiokunaqa alläpa reqishqam kanan jovenkunapaq, congregacionchö wakin jovenkunapis tsëkunata inshiyanmi testigom kä neq nunakunawan parlayänampaq.

Internetcho reqenqantsikkunapaqqa alërullam ulikuyänampaq, pï kayanqanta, imata munayanqanta o Jehovapa kaqcho imanö kayanqantapis (Sal. 26:4). Itsa huk nuna expulsado këkar, Jehovapa chikeqnin këkar, hina mana testigo këkarpis, ardëllam Jehovapa testigonmi kä nimashwan (Gál. 2:4). Noticiakunapa wiyanqantsiknömi, wambrata violaq nunakunaqa ashiyan wambrakunata Internetpa.

Congregacionnincho alli portakonqanta nimanqantsikta creishqapis, Internetchöqa ichikllapa ichikllapam apamashwan mana alli parlëkunaman. Këqa pasakun internetllapa reqinakuyaptinmi, tsëmi mantsakuyantsu ima parlëtapis. Hinamampis niyanmi, Internetpa parlakonqätaqa manam ni pï musyanqatsu, ni papänïpis ni ancianokunapis. Llakikïpaqmi wakin cristianokunapa tsurinkuna kë mana allikunaman ishkiyashqa y rakchakunatapis parlayashqa (Efe. 5:3, 4; Col. 3:8). Wakinkunanam qarankunapis rikakïkaq fötonkunata, rakchapa ashayänan shutinkunata y rakcha qotsukunatapis churayashqa Internetman.

Tsëmi, teyta mamakuna alleq rikäyänan tsurinkuna computadorachö imata rurayanqantapis (Pro. 29:15). Mantsëpaqchi kanman mana reqenqantsikkunata wayintsikman invitëqa y wambrantsikkunatawan wayicho haqiriqa. Tsënö mantsëllapaqmi kanman noqantsikpaq y jovenkunapaqpis mana reqinakushqantsikkunawan Internetchö parlë, Jehovapa testigonmi kä nimashqapis (Pro. 22:3).