Jehoväpaq ruranqantsikta gänas gänaslla rurashun

SHUMAQ consëjukunayoq cartëki kuyashqa amïguyki apatsimuptinqa, ¿manaku alläpa kushikunki? Tsënöllam Timoteupis kushikurqan apostol Pablu apatsinqan cartata chaskirnin. Kananqa tsë cartam Bibliachö këkan y Timoteupaq Ishkë kaq Carta nirmi reqintsik. Kuyashqa amïgun imata qellqanqanta musyëta munarchi, Timoteuqa japallan kanqan höra tsë cartata leyirqan. Itsa kënö tapukurqan: “¿Imanöraq Pablu këkan? ¿Cargükunata alli cumplinäpaqtsuraq consejëkäman? ¿Yanapamanqatsuraq Diospaq sagrädu rurënïchö mas alli kanäpaq y wakinta yanapanäpaq?”. Tsë cartaqa tsëkuna y juk tapukuykunapaqmi parlëkarqan. Tsëchö qellqarëkaq consëjukunapita wakinllata yachakurishun.

‘IMËKATA AGUANTARMI SÏGUIKÄ’

Tsë cartata leyir qallëkurllam, Timoteuqa pëpaq Pablu yarpachakunqanta y kuyanqanta musyarirqan. Kuyarmi, “kuyashqa tsurilläpaq” nir qellqar qallarqan (2 Tim. 1:2). Tsë cartataqa 65 watamampam chaskirqan. Tsë witsampaqqa, treinta watapita ichik masyoqnam Timoteuqa karqan y atska watapanam creikoqkunata rikarnin yanapakuykarqan. Pabluwan chunka watapitapis masna juntu viajashqa karmi, imëkata pëpita yachakushqa karqan.

Imëkapa pasëkarpis Pablu tsarakuykanqanta musyanqanqa, kallpata tsarinampaqchi Timoteu yanaparqan. Pabluqa Römachömi carcelarëkarqan y wanutsiyänampaqnam këkarqan (2 Tim. 1:15, 16; 4:6-8). Tsënö kaptimpis, Pablu valienti kanqantaqa Timoteu rikarqan, ‘imëkata aguantarmi sïguikä’ nir qellqanqanchömi (2 Tim. 2:8-13). Pablu alli tsarakunqanqa Timoteuta yanaparqanmi y tsënöllam noqantsiktapis yanapamäshun.

‘DIOSPITA CHASKINQËKI QARËTA, IMËKA NINATANÖ RAWRËKAQTA KATSI’

Diosta sirwinqanta alläpa väleqtanö rikänampaqmi, Timoteuta Pablu yarpätsirqan. Pëqa Diospita chaskinqan qarëta, “imëka ninatanö rawrëkaqta katsirnin” sïguinampaqmi nirqan (2 Tim. 1:6). ‘Qarëpaq’ parlarqa, griëgu idiömata parlayanqanchö khárisma palabratam Pabluqa utilizarqan. Tsë palabraqa, imatapis mana rurashqa këkar y grätislla chaskinqantsikpaqmi parlan. Timoteupaqqa, creikoqkunata rikaq kanampaq churayanqanmi tsë qarëqa karqan (1 Tim. 4:14).

Tsë qarëwanqa, ¿imatatan Timoteu ruranan karqan? ‘Imëka ninatanö rawrëkaqta katsirnin sïguinëkipaqmi’ yarpätseq neqta leyirqa, itsa wayikunachö ninapaq yarpëkarqan. Tsë ninaqa ichikllapa ichikllapam upireq y höraqa carbonllamannam tikrareq. Tsëmi mana upinampaq yamtawan wëkapäyaq. Juk diccionariuchö ninqannöpis, Pablu tsëta qellqarqa, griëgu idiöma parlayanqanchö anazōpyréō niyanqan palabratam utilizarqan, y tsëqa “yapë tsaritsi” ninanmi. Juk parlakuychöqa, gänas gänaslla y kushishqa yanapakunampaqmi nikarqan. Kënö neqnömi karqan: “Sagrädu rurënikita gänas gänaslla rurë”. Noqantsikpis tsënöllam ruranantsik: gänas gänaslla Diosta sirwinapaqmi kallpachakunantsik.

“KË ALLÄPA ALLI UMPAKÏTA CUIDË”

Pablu cartakunqanta leyikarmi, Timoteuqa Diospa sagrädu rurëninchö yanapanampaq consëjukunata tarirqan. Këtam Pablu qellqarqan: “Kë alläpa alli umpakïta [paytakuyta] cuidë, noqantsikchö këkaq santu espïrituwan” (2 Tim. 1:14). ¿Imatatan Timoteu cuidanan karqan? Qepa kaq versïculuchömi, Bibliachö këkaq “alli yachatsikïkunapita” parlarqan (2 Tim. 1:13). Timoteuqa Diospita yachatsikoq karmi, wawqi panikunata y juk nunakunatapis Diospita rasumpa kaqta yachatsinan karqan (2 Tim. 4:1-5). Y creikoqkunata rikaq kanampaq churashqa kayaptinmi, wawqi panikunata cuidanan karqan (1 Pëd. 5:2). Imëka qarë cuentata chaskinqan ‘alli yachatsikïkunataqa’, ¿imanötan cuidanan karqan? Palabran Bibliawan y poderninwan Jehovä yanapaptinmi (2 Tim. 3:14-17).

Nunakunata Diospita yachatsinqantsiktam, juk qarëtanö noqantsikpis chaskirquntsik (Mat. 28:19, 20). Y tsë rurënintsik alläpa väleq kanqantam imëpis yarpänantsik. Tsëpaqqa Diosmanmi imëpis mañakunantsik y Bibliatam seguïdu leyinantsik (Rom. 12:11, 12; 1 Tim. 4:13, 15, 16). Itsa qamqa, creikoqkunata rikar o Diospa kaqchö llapan tiempuykiwan yanapakunki. Tsënö yanapakurqa, Diosman confiakunapaq y humildi kanapaqmi kallpachakunantsik. Tsë chaskinqantsik qarëta cuidanapaqqa, väleqpaqmi churanantsik y Jehovä yanapamänapaq kaqmanmi confiakunantsik.

“MARKÄKÏPAQ NUNAKUNATA YACHATSI”

Timoteuqa wakintapis yachatsinanmi karqan. Tsëmi Pablu kënö nirqan: “Noqapita wiyanqëki kaqkunataqa, [...] markäkïpaq nunakunata yachatsi, tsënam pëkunaqa wakinkunata yachatsiyänampaq alli yachatsishqa kayanqa” (2 Tim. 2:2). Pabluqa, yachakunqankunata wakinta yachatsinampaqmi Timoteuta yarpëkätsirqan. Kanan witsampis, creikoqkunata rikaqkunaqa wakin wawqikunatam yachatsiyänan. Creikoqkunata rikaq alli wawqiqa, manam juk wawqi pëpitapis mas allita ruranampaq kaqta mantsartsu, rurëta yachanqankunata kikinllapaq katsikun. Tsëpa rantinqa, imatapis alli rurayänampaqmi, llapan yachanqanta wakinkunata yachatsin. Yachatsinqan wawqikuna, imatapis alli pensëkur y tantiëkur rurayänantam munan. Tsënö yachatsinqampitam, tsë confiakuypaq nunakunaqa congregacionchö alli yanapakuyanqa.

Pablu apatsinqan cartapitaqa, Timoteuqa alläpam agradecikurqan. Tsë kuyashqan amïgun apatsinqan cartataqa, kutin kutinchi leyirqan y tsëchö qellqarëkanqannö ruranampaqchi yarpachakurqan.

Noqantsikpis Pablu consejakunqannölla ruranapaqmi kallpachakunantsik. ¿Imanö? Rurëta yachanqantsikta imëka rawrëkaq ninatanö katsirnin, qarë cuenta chaskinqantsikta cuidarnin y yachanqantsikkunata jukkunata yachatsirninmi. Tsënö rurashqaqa, Timoteuta Pablu ninqannömi sagrädu rurënintsikta alli cumplishun (2 Tim. 4:5).