Diosman mañakuypaqqa, ¿imatatan nunakuna niyan?
“Mañakurninqa Teyta Dios noqawan këkanqantanö, makïpita jancharkur pushamanqantanö y oqrakashqa këkaptï yanapamaqtanömi sientï” (MARÏA).
“Warmïqa 13 watapa cancer qeshyawan sufrirmi wanukurqan. Llapan junaqkuna mañakunqäta Teyta Dios wiyamanqantam cuentata qokurqä, tsëmi yamëna sientikurqä” (RAUL).
“Teyta Diosman mañakuyta puëdinqantsikqa kushikuypaqmi” (ARNOL).
Wakin nunakunapaqpis Marïa, Raul y Arnol niyanqannömi Teyta Diosman mañakuyqa kushikuypaq. Teyta Diosman mañakurqa pëwan parlëta, agradecikuyta y yanapëkunampaq rowakuyta puëdiyanqantam niyan. Y rasumpam creiyan Bibliachö kënö ninqanta: “Munëninmannö kaqta imatapis mañakushqaqa, pëqa wiyamantsikmi” (1 Juan 5:14).
Tsënö kaptimpis mëtsikaq nunakunam Teyta Diosman mañakuypaq Biblia ima ninqanta creiyantsu. Estëbanmi kënö nin: “17 watayoq këkaptïmi kimaq o kimsaq amïgukuna wanukuykuyarqan: juknin kaqqa cärruwan accidentichömi wanukurqan y ishkë kaqnam lamarchö wanukuyarqan. Tsëmi Teyta Diosman mañakurqä, peru pëqa manam contestamarqantsu. Tsëmi kënö nirqä: ‘Dios mana wiyëkämashqaqa, ¿imapaqtan mañakuntsik?’”. Estëbannöllam mëtsikaq nunakuna Teyta Diosman mañakuyqa imachöpis mana yanapakunqanta niyan.
Y wakin nunakunaqa niyan: “Llapan problëmantsikkunata Dios musyëkaptinnaqa, ¿imapaqnatan mañakushun?, ¡upachi kashwan Teyta Diosman mañakur sïguirqa¡”.
Juk nunakunanam niyan, unë rurayanqan jutsankunarëkur mañakuyanqanta Dios mana wiyanqanta. Jenim kënö nin: “Mana väleqnömi sientikü. Unë Jutsata ruranqäpita Dios mana wiyamänampaq kaqtam pensä”.
Qampis itsa pensanki mañakunqëkita Teyta Dios mana wiyanqanta. Tsëqa mañakuypaqa Biblia ima ninqanta musyanqëkiqa alläpachi kushitsishunki. Bibliachömi tarintsik kë tapukuykunapa respuestankunata:
¿Rasumpaku mañakunqantsikkunata Teyta Dios wiyan?
¿Imanirtan wakin mañakunqantsikkunataqa Teyta Dios wiyantsu?
¿Imanötan mañakunantsik Teyta Dios wiyamänapaq?
¿Imanötan yanapakun Diosman mañakunqantsikqa?
a Bibliachömi tarintsik Teyta Diospa unë sirweqninkuna mañakuyanqanta, y Jesus mañakunqantapis tarintsikmi. Antiguo Testamentuchöqa 150 kutipitapis masmi mañakuyanqan yurin.