9 KAQ YACHAKUNËKIPAQ
Diosman mañakunqëkim amïgun kanëkipaq yanapashunki
Imatapis alli decidinëkipaq, problëmakunapa pasar alli ruranëkipaq, mana alläpa llakikunëkipaq y Jehoväta mas reqinëkipaqmi pëman mañakunqëkiqa yanapashunki. Peru ¿imanöraq mañakushwan? ¿Llapan mañakuyanqantatsuraq Dios wiyan? Y qamqa ¿imatataq rurankiman mañakunqëkita Dios wiyanampaq? Tsëkunatam këchö yachakunki.
1 KAQ: ¿Pimantan mañakushwan? Y, ¿imakunapaqtan mañakushwan?
Ciëluchö këkaq Teytantsik Jehoväman mañakunapaqmi Jesusqa yachatsikurqan. Pëqa Jehovämanmi imëpis mañakurqan, tsëmi qatiraqnin discïpulunkunata kënö nirqan: “Qamkunaqa kënömi Teyta Diosman mañakuyänëki: ‘Ciëluchö këkaq Teytalläkuna...’” (Mateu 6:9). Jehoväwan mas amïgu kanapaqqa pëmanmi imëpis mañakunantsik.
Imata mañakunantsikpaq kaqtaqa kikintsikmi rikänantsik. Peru Diosnintsikqa, ¿imakunapaq mañakunatataq munan? Bibliachömi nin: “Munanqanmannö imatapis mañakushqaqa, pëqa wiyamantsikmi” (1 Juan 5:14). Jesusmi nirqan imakunapaq mañakunantsikpaq kaqta (leyi Mateu 6:9-13). Yanapëkamänapaq Diosman mañakurpis, ama qonqashuntsu yanapamanqantsikpita agradecikuyta y jukkunatapis yanapëkunampaq mañakuyta.
2 KAQ: ¿Imanötan mañakushwan Diosnintsik wiyamänapaq?
Bibliachömi nin: “Llapan shonquykikunawan [Diosman] mañakuyë” (Salmus 62:8). Mañakunqantsikta Dios wiyanampaqqa llapan shonquntsikwanmi mañakunantsik. Diosqa manam nintsu fuertiparaq o shonquntsikllachö mañakunantsikpaq kaqtaqa. Y manam nintsu qonqurïkur, shëkur o jamëkur mañakunantsikpaq kaqtaqa. Tsënö kaptimpis, Diosmanqa respëtuwanmi mañakunantsik. Mëchö këkar o imë hörapis Diosmanqa mañakuyta puëdintsikmi.
3 KAQ: ¿Imanötan mañakunqantsikta Diosnintsik contestamantsik?
Diosnintsikqa mañakunqantsikta contestamantsikmi. Juknöpaqa Palabran Bibliawanmi. Tsëchömi tarintsik llapan musyëta munanqantsikta y consëjunkunata. Diospa Palabranqa ‘mana yachaqkunatam yachaqta tikratsin’ (Salmus 19:7, leyi Santiägu 1:5). Mana allikunapa pasarnin mañakushqaqa mana alläpa yarpachakunapaqmi yanapamantsik. Y sirweqninkunawampis yanapamantsikmi.
MASLLA YACHAKUSHUN
Llapan shonquntsikwan mañakunapaq y Diosman mañakunqantsik imanö yanapamanqantsiktam yachakushun.
4 KAQ: Diosnintsik munanqannö mañakushun
Mañakunqantsikta Diosnintsik wiyanampaqqa, ¿imakunatataq cuentachö katsinantsik? VIDEUTA rikäyë.
Jehoväqa pëllaman mañakunatam munan. Leyiyë Salmus 65:2 ima ninqanta y këpaq parlayë:
¿Diosnintsikqa qam mañakunëkita munantsuraq?
Mañakunqantsikta Diosnintsik wiyanampaqqa pë mandakunqannömi imatapis rurar kallpachakunantsik. Leyiyë Miquëas 3:4 y 1 Pëdru 3:12 ima ninqanta y këpaq parlayë:
Mañakunqantsikta Diosnintsik wiyanampaqqa, ¿imatataq ruranantsiktsu?
Ishkë grüpu soldädukuna guërrachö ganëta munar Diosman mañakuyaptin, ¿mañakuyanqanta Dios wiyanmantsuraq?
5 KAQ: Diosmanqa shonqupitam mañakunantsik
Wakinkunaqa Diosman mañakurnin tsë palabrakunallatam kutin kutin niyan. ¿Tsënötsuraq Diosman mañakushwan? Leyiyë Mateu 6:7 ima ninqanta y këpaq parlayë:
¿Imataraq rurashwan Diosman mañakurnin tsë palabrakunallata “kutin kutin” mana ninapaq?
Cada junaq ima bendicionta chaskinqëkiman pensë, y Jehoväta agradecikuy. Tsënö rurarqa semänachöqa qanchis bendicionkunapitam Diosman mañakur agradecikunki, tsënömi juk mañakunqëkillataqa kutin kutin mañakunkitsu.
Wamrayoqkunaqa munayan imanö sientikuyanqanta wamrankuna imëpis willayänantam. Tsënömi Jehoväpis shonqupita parlapänantsikta munan.
6 KAQ: Diosman mañakunqantsikqa yanapakunmi
Mana allikunapa pasanqantsik höraqa, ¿imanötan yanapamantsik Diosman mañakunqantsik? VIDEUTA rikäyë.
Bibliachömi nin Diosman mañakunqantsikqa imëkapa pasashqapis yanapamänapaq kaqta. Leyiyë Filipensis 4:6, 7 ima ninqanta y këkunapaq parlayë:
Problëmantsikkuna mana ushakaptimpis Diosman mañakunqantsikqa, ¿imanötan yanapamantsik?
¿Imakunapaqtan Diosman mañakushwan?
¿Musyarqëkiku?
Amen ninanqa “tsënö kallätsun” ninanmi. Bibliachömi willakun Diosman mañakur usharirnin unë witsampis “amen” niyanqanta (1 Crönicas 16:36).
7 KAQ: Diosman mañakunëkipaq tiempuykita patsätsi
Imëka rurëyoq karmi höraqa Diosman mañakuytapis qonqarishwan. Jesusqa Diosman mañakuyta manam imëpis dejarqantsu. Leyiyë Mateu 14:23 y Marcus 1:35 ima ninqanta y këkunapaq parlayë:
¿Jesusqa imatataq rurarqan Diosman imëpis mañakunampaq?
¿Qamqa imataraq rurankiman Diosman mañakunëkipaq tiempuyki kanampaq?
WAKIN IMA NIYANQAN: “Diosman mañakuyqa envänum”
¿Qamqa ima ninkitan?
KËTAM YACHAKURQUNKI
Jehovä Diosman shonqupita mañakunqantsikqa yanapamantsik amïgun kanapaq, yamë kanapaq y mana fäcil kaptimpis pë munanqannö kawanapaqmi.
¿Yarpankiku?
¿Pimantan mañakushwan?
¿Imanötan mañakushwan?
¿Imanötan yanapamantsik Diosman mañakunqantsikqa?
MASTA YACHAKUY
Diosman mañakuypaq nunakuna musyëta munayanqanta leyi.
Diosman imanir y imanö mañakunëkipaq kaqta yachakuy.
“¿Imanirtan Teyta Diosman mañakunantsik?” (jw.org päginachö yarqamoq)
¿Pimantan mañakunantsik? Tsëpaq Bibliachö ima ninqanta yachakuy.
“¿Santukunaman mañakushwantsuraq?” (jw.org päginachö yarqamoq)
¿Mëchötan y imë höratan Diosman mañakushwan? Tsëta musyanëkipaq kë müsicayoq videuta rikë.