¿Shumaq Patsachö kawanapaqqa imatatan ruranantsik?

Yachakunqantsiknöpis Teyta Diosqa ichikllachönam llapan mana allikunata y problëmakunata ushakätsimunqa. ¿Rasumpaku tsënö kanqa? Awmi, Diospa Palabran Bibliachömi këkunata änimantsik:

“Mana cäsukoq nunakunaqa pasarëkäyanllam” (1 JUAN 2:17).

Nunakunaqa manam ushakäyanqatsu, Bibliachömi kënö nin:

“Diospa munëninta ruraq kaqqa, imëyaqpis këkanqam”.

Imëyaqpis kawakunapaqqa Teyta Diostam cäsukunantsik. Y tsëpaqqa puntataqa pë mandamanqantsikkunatam alli yachakunantsik.

IMËYAQPIS KAWAKUNAPAQQA TEYTA DIOSPITA YACHAKUSHUN

Fötukuna: 1. Hospitalchömi juk enfermëra patsaman llakishqa täkun. 2. Jamayanqan höranam juk trabajaq mayin revistata leyir kushishqa këkaqta rikan. 3. Tsë trabajaq mayinqa Bibliachö juk textutam leyipun y jw.org tarjëtatapis qararishqam.

Jesusmi kënö nirqan: “Këmi imëyaqpis kawakïman chätsikun, qam japallan rasumpa kaq Diosta reqikäyäshunqëki” (Juan 17:3). Mana allikuna ushakäyaptin salvakunapaq y imëyaqpis kawakunapaqqa, Teyta Diostam reqinantsik. Y manam “Diosmanmi creï” ninantsikllatsu, sinöqa pëtam alli reqinantsik y amïgunmi kanantsik. Piwampis amïgu këta munarqa pëwanmi mas parlantsik, purintsik y imëkata rurantsik. Kananqa Teyta Dioswan mas amïgu kanapaq imakuna yanapamänantsikpaq kaqta yachakurishun.

Bibliachö ima ninqan

Teyta Diosqa Shumaq Huertachö kawakunatam imëpis munarqan.

Teyta Diosnintsikqa punta nunakuna Adantawan Ëvatam Eden huertaman churarqan. Pëkunaqa jutsannaqmi kayarqan, y Teyta Diosqa imëkankunam kushishqa kawakuyänampaq qararqan. Teyta Diosnintsikta cäsukurqa mana wanurmi kawakuyanman karqan. Peru mandanqan fäcil këkaptimpis manam cäsukuyarqantsu.

Imanirtan sufrintsik y problëmakuna kan.

Adanqa mana wiyakoq karmi mana wanur imëyaqpis kawëta puëdirqannatsu, ni pë ni wamrankunapis. Bibliachömi kënö nin: “Juk nunarëkurllam llapan nunakunaman jutsa yëkurqan, y jutsarëkurnam pëkunaman wanï charqan, y tsënömi wanïqa llapan nunakunaman chärirqan” (Romänus 5:12). Imanömi teytankuna ima qeshyawampis kayaptinqa wamrankunapis tsënölla yuriyan, tsënömi Adan mana cäsukunqampita llapan nunakuna jutsayoq yurintsik, tsëmi awkinyantsik y wanuntsik.

Salvamänapaqmi Diosnintsikqa Tsurinta mandamurqan.

Bibliachömi kënö nin: “Nunakunata alläpa kuyarninmi Diosqa japallan Tsurinta pëkunarëkur qorqan, tsënöpa pëman markäkuyanqanta rikätsikoqkuna mana ushakätsishqa kayänampaq, sinöqa imëyaqpis kawëyoq kayänampaq” (Juan 3:16). Teyta Diosqa Tsurintam kë Patsaman mandamurqan noqantsikrëkur wanunampaq. India nacionpita 86 watayoq Prabhakar jutiyoq nunam kënö nirqan: “Noqantsikrëkur Jehoväa Tsurin Jesusta mandamunqanta yarparqa alläpa kuyamanqantam rikä. Y mana wanurna kawakuytam shuyarëkä”.

Teyta Dios noqantsikpaq ruramunqampita agradecikushun.

Bibliachömi nimantsik ‘mandakïninkunata wiyakurnin’ Teyta Diosta agradecikunqantsikta rikätsikunqantsikta (1 Juan 2:3). Jehoväqa shumaqmi yachatsimantsik kanan witsampis alli kawakunapaq (Isaïas 48:17, 18). Teyta Diosqa manam sufrinantsikta munantsu, tsëmi pë mandamanqantsikta cäsukurqa kanan y shamoq tiempuchöpis kushishqa kawakushun.

CADA JUNAQ BIBLIATA LEYISHUN

Almorzanqan höram juk enfermëra Bibliata leyirir tsëman pensëkan. — Ushakë junaqchö salvakunapaqqa Teyta Dios munanqannömi kawanantsik. Tsëpaqqa pëtam yanapamänapaq mañakunantsik.

Mana wanuyta munarqa cada junaqmi mikunantsik. Peru Jesusmi kënö nirqan: “Nunaqa manam tantallawantsu kawanan, sinöqa Jehovä llapan ninqankunawanmi” (Mateu 4:4).

Jehovä Dios nimanqantsiktaqa Palabran Bibliachömi tarintsik. Bibliata estudiarmi yachakuntsik Teyta Dios unë witsan imakunata ruranqanta, kanan imata rurëkämunqanta, y shamoq tiempuchö imata ruramunampaq kaqta.

YANAPAMÄNAPAQ TEYTA DIOSTA MAÑAKUSHUN

Teyta Diosta cäsukuyta munarqa, ¿imatatan rurashwan fäcil mana kaptimpis mana alli rurëkunata dejanapaq? Pëta alli reqinqantsikmi yanapamäshun.

Sakura jutiyoq warmita pasanqanta rikärishun. Pëqa jukwan jukwan lluta kawakoq warmim karqan, peru Bibliapita yachakur qallëkurmi musyarirqan Diosnintsik kënö mandakunqanta: “¡Rakcha rurëkunapita escapakuyë!” (1 Corintius 6:18). Mana alli rurëninkunata dejanampaqqa Teyta Diostam mañakurqan yanapanampaq. Tsënö kaptimpis cada junaqmi mana allikunata manana ruranampaq kallpachakun. Pëmi kënö nin: “Mana alli rurëkuna yarpënïman chämuptinmi Jehoväman mañakü yanapamänampaq. Kikïllapitaqa manam tsarakuyta puëdïmantsu. Y tsënö mañakunqämi Dioswan mas amïgu kanäpaq yanapamashqa”. Sakura warminömi mëtsikaq nunakuna Teyta Diospita yachakuykäyan, tsëmi yanapëkan mana alli rurëkunata dejarnin Diosnintsik munanqannöna kawakuyänampaq (Filipensis 4:13).

Teyta Diosta mas reqishqaqa masmi pëqa kuyamäshun (Gälatas 4:9; Salmus 25:14). Tsënöpam ushakë junaqchö salvakushun y änimanqantsik Shumaq Patsachö kawakushun. ¿Imanöraq Shumaq Patsa kanqa? Qateqnin kaqchömi tsëta yachakurishun.

a Diospa jutin Jehovä kanqantam Bibliaqa yachatsikun.