“¡Kananqa Diospita yachatsikuy gustamannam!”

MANAM KUSHISHQANATSU DIOSPITA YACHATSIKURQÄ

Shipashyarninnam Jehovätaqa Teytätanönatsu rikaq kä. Estudiaq mayïkunaqa munayanqantam rurayaq, y noqapis pëkunanö këtam munarqä. Tsëmi papänïkuna niyämanqanta, Biblia ninqanta, reunionkunaman y Diospita yachatsikoq ëwëtapis alläpa aja o sasatanöna rikaq kä. Jehovälla Dios kanqantaqa imëpis musyarqämi, peru manam unënönatsu kushishqa sirwirqä.

Diospita yachatsikuytaqa manam dejarqätsu, peru wakinkuna rikäyämänanllapaqmi höra höra yarqoq kä. Diospita yachatsikunäpaq mana preparakuptïmi, nunakunawan parlëqa fäciltsu karqan. Tsëmi pitapis watukaq kuteqtsu kä, ni Bibliapita estudiatseqtsu kä y Diospita yachatsikuyqa manam gustamaqnatsu. Tsëmi, ¿imanöraq wakinqa semäna semäna killa killa yachatsikur puriyan? nir tapukoq kä.

17 watayoq këkarqa, japallä täkuytam munarqä. Tsëmi, imëkäkunata alistarir Australia nacionta ëwakurqä. Teytäkunaqa, yarpachakurpis Australia nacionchö Diosta sirwir sïguinäpaq kaqmanmi confiakuyarqan.

Australiachöqa, Jehoväpita mas rakikarmi qallëkurqä. Noqanö këkaq jövinkunawanmi juntakoq kä, tsëmi reunionkunaman faltaq kä. Reunionman ëwarpis waränin paqasqa upyaq y tushoqmi ëwayaq kayä. Kë munduchö nunakuna rurayanqanta rurar y reunionkunachö karpis, manam kushishqatsu kaq kä. Diosta sirwikarpis mana allikunata rurëkanqätam kananraq cuentata qokü.

JUK NANAPITA YACHAKÜ

Ishkë wata pasarinqanchömi, juk nanata reqirirqä y pë ruranqanta rikanqämi yanapamarqan imata ruranäpaq kaqman pensanäpaq. Pitsqa soltëra nanakunawanmi tärarqä. Congregacionkunata watukaq turitawan warmintam, wayïkunachö juk semäna quedakuyänampaq invitayarqä. Y congregacionchö asuntukunata turi rikanqanyaqmi, noqakunaqa warmin Tamärawan parlakur asikuyaq kayä. Tsëmi alläpa kushikoq kä. Qowanwan ishkan Jehoväta sirwiyanqanchö imëka rurëyoq karnimpis, kushi kushi y yachanëllapaq kanampaq kaqtaqa manam pensarqätsu.

Tamärataqa Diospita yachatsikuyqa alläpam gustaq. Pëqa llapan puëdinqanmannömi Jehoväta sirweq y kushishqam kaq. Peru noqaqa masta rurëta puëdikarpis, wallkallata rurarmi kushishqatsu kaq kä. Tsëkunata rurar kushishqa kanqanta rikanqämi, alläpa yanapamarqan. Tsënö kanqanta rikanqämi, llapantsikpis kushishqalla sirwinata Jehovä munanqanta yarpätsimarqan (Sal. 100:2).

DIOSPITA KUSHISHQA YAPË YACHATSIKUR QALLËKÜ

Noqapis Tamäranö kushishqa këtam munarqä, peru tsëpaqqa, imëkataraqmi ruranä karqan. Tsëta rurëqa manam fäciltsu karqan, peru ichikllapa ichikllapam rurar qallëkurqä. Diospita yachatsikunäpaqmi preparakoqna kä, y höra höraqa precursor auxiliarmi kaq kä. Y tsëmi yanapamarqan alläpa mantsakoq mana kanäpaq. Bibliata yachatsikur mas utilizarmi, mas kushishqa kaq kä. Tsëmi llapan killakunana precursor auxiliar kanäpaq churapakarqä.

Jehoväta kushishqa sirweqkunawanmi ima edä kayaptimpis yanasa tikrarqä. Imakunata mas puntaman churanäpaq y Bibliata mas estudianäpaqmi, pëkunapita yachakurqä. Diospita yachatsikuy mas gustamaptinmi precursöra regular tikrarirqä. Yapëmi mëtsika watakuna pasanqanchö, turi nanakunawan kushishqa këkarqä.

JUK PRECURSORWAN CASAKÜ

Tsëpita juk watallatanam, alli tratakoq, Jehoväta kuyaq y pëpita yachatsikuy gustaq turi Älexta reqirirqä. Pëqa creikoqkunata rikaqkunapa yanapaqnin y joqta watapana precursormi karqan. Diospita yachatsikoqkunata necesitäyanqan sitiukunachömi, Maläui nacionchö juk ishkë killakuna yachatsikushqa karqan. Tsëchö këkaq misionërukunawanmi karqan, y pëkunaqa Diosta sirwita puntaman churanampaqmi niyarqan.

2003 watachömi Älexwan casakuriyarqä. Y llapan tiempükunawanmi Jehoväta sirwir sïguikäyä. Imëkatam yachakuyarqö y Jehoväqa imëkachömi bendeciyämashqa.

MAS BENDICIONKUNATA CHASKIYÄ

2009 watam Timor Oriental nacionchö misionëru kayänäpaq nirayämarqan, tsëqa Indonesia nacionpa amänunchömi këkan. ¡Tsëtaqa manam shuyaräyarqätsu! Alläpa kushishqa këkarpis, mantsakuyarqämi. Tsëpita pitsqa killataqa, Dili markamanmi chäriyarqä.

Tsëchöqa costumbrinkunaman, parlayanqan idiömaman, mikuyninkunaman y imanö kayanqanmanmi yachakäyäna karqan. Diospita yachatsikurqa waktsa nunakunata, alläpa leyita mana yachaqta y llakishqa këkaq nunakunatam tariyaq kayä. Y guërrachö kashqa y imëka mana allikunapa pasashqa nunakunatam reqiyarqä.a

¡Diospita yachatsikuyqa alläpa kushikuypaqmi karqan! Juk kutim, 13 watayoq Marïa jutiyoq wamrata alläpa llakishqa këkaqta taririrqä.b Mamanqa tsë watakunallaraqmi wanushqa kanaq, y papäninwanqa höra hörallatam tinkuyaq. Winë mayin wamrakunanömi, Marïaqa imata ruranampaq kaqtapis musyaqtsu. Juk kutichö alläpa waqarnin imanö këkanqanta willamanqantam yarpä. Peru noqaqa tsë idiömata alliraq mana parlarmi, ima nimanqanta entiendirqätsu. Tsëmi shumaq parlapänäpaq Jehovä yanapamänampaq mañakurqä. Tsëmi shoqanäpaq Biblia ninqanta leyipurqä. Watakuna pasanqanmannömi alli portakunampaq, shumaq altsapäkunampaq y alli kawakunampaq Diospita yachakunqan yanapanqanta rikarqä. Tsëpitaqa bautizakurirqanmi, y kikinnam nunakunata Bibliapita estudiatsin. Kananqa, mëtsikaq nana turikunam familiantanö kuyayan.

Timor Oriental nacionchöqa, mëtsikaq nunakunam Jehoväpita yachakuykäyan. Kë qepa chunka watakunallataraq mëtsikaq bautizakushqa kayaptimpis, mëtsikaqmi precursor, creikoqkunata rikaqkunapa yanapaqnin o creikoqkunata rikaqkuna kayan. Y wakinnam, publicacionkunata Juk Idiömaman Tikratsiyanqan Oficïnakunachö yanapakuyan. Alläpam kushikoq kä reunionkunachö cantaqta, kushishqa këkaqta y Diospita mas yachakoqta rikarnin.

KANAN KUSHISHQA KANQÄNÖQA MANACHI IMËPIS KÄMANTSU

Timor Oriental nacionchö kawëqa manam Australia nacionchö kawakuynötsu karqan. Peru juk läduchöqa, manachi kanannö kushishqa kämantsu karqan. Höraqa tsakishqa pescäduta y mëtsika verdürakunata rantipakushqa nunakunawanmi cärruchö viajayaq kayä. Juk ishkë junaqkunaqa mëtsika wallpakunayoq, allpallapita pïsuyoq y alläpa achachaq ichisaq wayikunachömi nunakunata Bibliapita estudiatsiyaq kayä. Ima problëmakuna kaptimpis, “¡këchö këqa alläpa kushikuypaqmi!” neqmi kä.

Wamra kanqäman yarparqa, Jehoväpita yachatsiyämanqampita y jövin kënïchö yanapayämanqampitam teytäkunata alläpa agradecikü. Bibliachö Proverbius 22:6 ninqanqa, noqachömi cumplikashqa. Mamänïwan papänïqa, Jehoväta sirwirnin imëkachö yanapakuyanqäpitam Älexpitawan noqapita alläpa kushikuyan. 2016 watapitam, Australasia Betel rikanqan nacionkunachö congregacionkunata watukarnin yanapakuyä.

Manam creïtsu Diospita yachatsikuy mana gustamashqa kanqanta. Kananraqmi musyä, imëka problëmakunapa pasarnimpis, llapan shonquntsikwan Jehoväta sirwirninraq rasumpa kushishqa kanqantsikta. Kë qepa 18 watakunachö Älexwan juntu Jehoväta sirwiyanqänöqa, manam imëpis kushishqatsu karqö. Kananmi noqapaqqa mas cläruraq këkan, Jehoväta David kënö ninqan: “Qamman markäkamuqkunaqa kushikuyätsun. Alli cuidashqëki rëkur imëpis alabëkulläyäshï. Kuyashuqnikikunaqa imëpis kushishqa kawakuyätsun” (Sal. 5:11).