AMA CHIKIKOQ KASHUNTSU
2 | Ama vengakushuntsu
Bibliachömi nin:
“Pipis mana allita rurayäshoqnikikunata ama mana allipa kutitsiyëtsu […]. Llapan nunakunawan yamë kawakuyë. Ama vengakuyëtsu, kuyashqa wawqikuna y panikuna […]. ‘Noqam vengakushaq; noqam rurëninkunamannö pagashaq’, ninmi Jehovä” (ROMÄNUS 12:17-19).
¿Ima ninantaq tsëqa?
Pillapis mana allita ruramashqaqa llakikuntsikmi o cölerakuntsikmi, tsënö kaptimpis Diosnintsikqa manam munantsu pitapis mana allipa kutitsinantsikta. Ichikllachönam Diosnintsikqa mana alli ruraqkunata ushakätsimunqa, y tsëyaqqa pacienciawan shuyaränapaqmi nimantsik (Salmus 37:7, 10).
Këta rurë:
Mana alli tratayäshuptikiqa ama vengakuytsu, tsëqa mas chikinakuymanmi chätsikun. Tsëmi pillapis ofendishuptiki o ima mana allitapis rurashuptikiqa, ama ras cölerakur imatapis nitsu ni rurëtsu (Proverbius 19:11). Peru juk cäsukunachöqa puëdintsikmi autoridäkunaman o policïakunaman denunciakuyta, juk cäsuqa capaz kanman pipis mana allita ruramashqa o vïdantsik peligruchö kaptin.
Vengakurninqa kikintsikllam mana allichö ushashun.
Capaz juk problëmata shumaqlla altsëta puëdirqunkitsu o shumaqlla altsanëkipaq imëkatana rurashqa këkaptikipis altsakashqatsu. Tsënö kaptimpis ama mana allipa kutitsita pensëtsu. Mana allipa kutitsirqa mas problëmamanmi chanki. Chikinakuyta shonquykipita ushakätsi y Diosnintsik tsëkunata altsamunampaq kaqman confiakuy. Salmus 37:3-5 kënö nin: “[Diosman] markäkuptikiqa yanapashunkim”.