¿Musyarqëkiku?

Felïpiwan tinkuyanqan junaq, ¿imanö carrëtachötan Etiopïa cortichö trabajaq nuna viajëkarqan?

‘CARRËTA’ neq palabrata griëgu idiömapita traduciyanqantaqa, Mushoq Patsachö Kawaqkunapaq Bibliachöqa, jukläya jukläya carrëtapaqmi parlan (Hëch. 8:28, 29, 38). Etiopïa cortichö trabajaq nunaqa, manam carrërata rurayänan carrëtachötsu ni soldädukunapa carrëtanchötsu viajarqan, sinöqa mas jatunchömi. ¿Imanirtan tsënöqa nintsik? Wakinllata rikärishun.

Etiöpi nunaqa alli puestuchömi trabajaq y alläpa karutam viajashqa karqan. “Pëqa Etiopïa nunakunata gobernaq Candäci jutiyoq warmipa sirweqninmi karqan y imëka väleqninkunatam rikaq” (Hëch. 8:27). Etiopïaqa karqan, kanan witsan Sudan nacion y Egiptupa entëru sur kaq lädunmi. Etiöpi nunaqa, manachi tsë carrëtallawantsu viajarqan. Alläpa karuta viajëkarqa atska bultutachi aparqan. Punta cristiänukuna kawayanqan tiempuchöqa, tukuyläya carrëtakunatam utilizäyaq viajayänampaq. Juk cläsi carrëtaqa chusku ruëdayoq y toldushqam karqan. Bibliapita maslla musyatsikoq libruchömi kënö nin: “Tsënö jatusaq carrëtakunachöqa mas bultutam apëta puëdiyaq, mas allim viajayaq y capazchi mas karuta viajayaq” (Acts An Exegetical Commentary).

Etiöpi nunataqa leyikaqtam Felïpi rikärirqan. Bibliachömi kënö nin: “Tsënam Felïpiqa tsë carrëtapa lädunman cörrir Diospa willakoqnin Isaïas qellqanqanta leyikanqanta wiyar[qan]” (Hëch. 8:30). Tsë carrëtataqa manam cörrinampaqtsu rurashqa kayarqan. Tsëmi despaciulla ëwaptin etiöpi nunaqa leyir viajëkarqan, tsënam Felïpiqa cörripa ëwar taripärirqan.

Etiöpi nunam, “Felïpita rogarqan” carrëtanman jamakunampaq (Hëch. 8:31). Carrërata rurayänan carrëtachöqa, manejaqkunaqa shëkarmi o ichirëkarmi ëwayaq. Peru pasajëruta apaq carrëtachöqa, jamakuyänampaqmi asientukuna kaq. Tsëmi Felïpiqa etiöpi nunapa lädunman jamakurqan.

Hëchus librupa 8 kaq capïtulunchö ninqanta y yachaq nunakuna niyanqanta cuentaman churarmi, kananqa publicacionkunachö, etiöpi nunata dibujayämü jatun carrëtachöna y manam carrërata rurayänan carrëtachönatsu ni soldädukunapa carrëtanchönatsu.