Angelkuna imanö kayanqampita yachakushun

1, 2. (1) ¿Imakunachötan angelkunaqa noqantsikpita jukläya kayan? (2) ¿Imakunachötan angelkunawan igual kantsik?

SIRWEQNIN kanëkipaq Jehovä chaskishurnikiqa, alläpa kuyakoq familianchö kanëkipaqmi chaskishurqunki. Tsë familiankunaqa manam kë Patsachö sirweqnin nunakunallatsu kayan, sinöqa mëtsika millon angelkunapis kayanmi (Dan. 7:9, 10). Peru angelkunapaq parlarqa, capaz pensarinki nunakunapita alläpa jukläya kayanqanta, y tsëqa rasunmi. Pëkunataqa nunakunapitapis mas unënam Jehovä kamarqan (Job 38:4, 7). Pëkunaqa alläpa poderösu y jutsannaqmi kayan. Jutsasapa nunakunaqa manam pëkunanö këta puëdintsiktsu (Lüc. 9:26).

² Peru noqantsikpita alläpa jukläya karpis, angelkunaqa wakin wakinchöqa noqantsikwan igualmi kayan. Këllaman pensarishun: noqantsiknöllam angelkunapis Jehoväpita kuyakoq këta y alli këta yachakuyashqa. Noqantsiknöllam imatapis decidiyänampaq libri kayan, jukläya jukläya kayan, Jehovä Diosnintsikta adorëta munayan, Jehoväta sirwir imëka rurëchö yanapakuyan, y noqantsikpanömi jutinkunapis kan (1 Pëd. 1:12).

3. ¿Imatataq angelkunapita yachakuntsik?

³ Rikärinqantsiknömi angelkunaqa wakin wakinchöqa noqantsiknö kayan. Peru ¿imakunatataq pëkunapita yachakuntsik? Humildi këta, nunakunata kuyëta, problëmakunapa pasarpis alli aguantëta y Jehoväpa markan limpiu kanampaq yanapakuytam. Tsëkunata yachakurishun.

ANGELKUNAQA HUMILDIM KAYAN

4. (1) ¿Imanötan angelkunaqa humildi kayanqanta rikätsikuyan? (2) ¿Imanirtan angelkunaqa humildi kayan? (Salmus 89:7).

⁴ Angelkunaqa humildim kayan. Imëka rurëta alli yacharpis, poderösu karpis o imëkata musyarpis, pëkunaqa Jehovä mandanqankunatam cäsukuyan (Sal. 103:20). Jehovä mandanqankunata rurarqa, manam alabakuyantsu ni manam nunakunapita mas poderösu kayanqampita gälakuyantsu. Jutinkunata nunakuna mana musyayaptimpis, Jehoväta sirwirmi kushishqa kayan (Gen. 32:24, 29; 2 Rëy. 19:35).a Y manam munayantsu Jehoväta alabayänampa rantin pëkunata alabayänanta. ¿Imanirtan angelkunaqa humildi kayan? Jehoväta kuyar y alläpa respetarmi (leyi Salmus 89:7).

5. ¿Imanötan juk angel humildi kanqanta rikätsikurqan apostol Juanta corregirnin? (Dibüjuta rikäri).

⁵ Angelkuna humildi kayanqanta maslla rikärishun. 96 wata witsanchömi, apostol Juanta juk angel rikätsirqan imakuna pasakunampaq kaqta. Tsë angelpa jutintaqa manam musyantsiktsu (Apo. 1:1). ¿Imatataq apostol Juan rurarqan pasakunampaq kaqkunata rikärir? Angelta adoranampaqmi qonqurikurqan. Peru angelqa jinan höram kënö nirqan: “¡Cuidädu! ¡Ama tsëta rurëtsu! Noqaqa qampa y [...] wawqikikunapa sirweq mayikikunallam kä. ¡Teyta Diosta adorëqa!” (Apo. 19:10). Tsë angelqa, ¡rasumpa humildim karqan! Manam munarqantsu Jehoväta alabanampa o adoranampa rantin pëta adoranantaqa. Tsëpitanam nirqan Jehoväta adoranampaq. Y Juanta corregirqa, manam pëpita mas alli kanqantatsu rikätsikurqan. Mëtsika tiempupana Jehoväta sirwirpis y Juanpita mas poderösu karpis, humildim karqan y kënömi nirqan: “Sirweq mayikikunallam kä”. Y Juanta corregirpis manam qayaparqantsu, sinöqa respëtuwanmi parlaparqan. Capazchi cuentata qokurqan pasakunampaq kaqkunata rikärir alläpa kushikur Juan adorëta munanqanta.

6. ¿Imanötan angelkunapita humildi këta yachakushwan?

⁶ ¿Imanötan angelkunapita humildi këta yachakushwan? Imatapis rurarqa, manam alabakunantsiktsu ni manam wakinkunapita mas yachaq kanqantsiktaqa rikätsikunantsiktsu (1 Cor. 4:7). Ni manam Jehoväta mas tiempupa sirwinqantsikpita o mas carguyoq kanqantsikpitaqa pensanantsiktsu, wakinkunapita mas alli kanqantsiktaqa. Mas carguyoq karqa, mas humildim kanantsik (Lüc. 9:48). Noqantsikqa angelkunanömi wakinkunapa sirweqnin këta munantsik, y manam munantsiktsu wakinkunapita mas alli kanqantsikta pensayänantaqa.

7. ¿Imanötan humildi kanqantsikta rikätsikushwan pitapis corregirnin o consejarnin?

⁷ Tsënöllam juk wawqita, juk panita o wamrantsikkunata corregirpis o consejarpis, humildi kanqantsikta rikätsikunantsik. Capazchi höraqa pitapis firmi y cläru consejashun. Peru consejarpis, apostol Juanta kuyëllapa angel correginqannömi, kuyëllapa firmi correginantsik y manam llakitsinantsiktsu. Wakinkunapita mas alli kanqantsikta mana pensarqa, respëtuwan y kuyëllapam Bibliawan consejashun (Col. 4:6).

ANGELKUNAQA NUNAKUNATAM KUYAYAN

8. (1) Lücas 15:10 ninqannö, ¿imanötan angelkunaqa nunakunata kuyayanqanta rikätsikuyan? (2) ¿Imanötan angelkunaqa nunakunata yachatsinqantsikchö yanapakuyan? (Rikäri fötuta).

⁸ Angelkunaqa alläpam nunakunata kuyayan, tsëmi imapa pasayanqantapis alkäbu këkäyan. Alläpam kushikuyan juk jutsa ruraq nuna arrepentikurir Jehoväta yapë sirwir qallëkuptin o juk nuna rasumpa kaqta yachakurir Jehoväta sirwinampaq cambiukunata rurar qallëkuptin (leyi Lücas 15:10). Tsënöllam angelkunaqa Diospita yachatsikushqa alläpa yanapakuyan (Apo. 14:6). Rasunmi, pëkunaqa manam nunakunata parlapäyantsu, peru Jehoväpita yachakuyta munaq nunakunaman chänapaqmi yanapamantsik. Tsënö kaptimpis manam, “kë asuntuchömi juk angel yanapamashqa” nita puëdishwantsu ¿Imanir? Jehoväqa nunakunata yanapanampaq o nunakunaman chänapaqqa imëkatam utilicëta puëdin, hasta santu espïrituntapis (Hëch. 16:6, 7). Peru angelninkunatapis Jehoväqa allipam utilizan voluntäninta rurayänampaq. Tsëmi yachatsikurninqa, següru këkantsik angelkuna yanapëkämanqantsikta. (Leyi “Mañakuyanqantam Dios wiyarqan” neq recuadruta).b

9. ¿Imanötan angelkunanö, nunakunata kuyanqantsikta rikätsikushwan?

⁹ ¿Imanötan angelkunanö, nunakunata kuyanqantsikta rikätsikushwan? Congregacionpita rakishqakuna kutiyämuptinqa kushikunantsikmi, shumaqmi chaskinantsik y kuyanqantsiktam ninantsik (Lüc. 15:4-7; 2 Cor. 2:6-8). Tsënöllam angelkunanöpis, Diosnintsikpita yachatsikuychö alli yanapakunantsik (Ecl. 11:6). Imanömi yachatsikushqa angelkuna yanapamantsik, tsënömi noqantsikpis wawqi panintsikkunata yachatsikuyaptin yanapanantsik. Këllaman pensarishun: allim kanman tsëllaraq publicador tikrashqakunawan, qeshyëkaqkunawan o mayor kaqkunawan yachatsikushqaqa.

10. ¿Imatataq yachakuntsik Särata pasanqampita?

¹⁰ Y unënö yachatsikuyta mana puëdirqa, ¿imatataq rurashwan? Tsënö kaptimpis, angelkunataqa tukuynöpam yanapëta puëdintsik. Parlarishun India nacionpita Särac jutiyoq panintsikta ima pasanqampaq. Pëqa, 20 watapana precursöra këkarmi grävi qeshyarirqan y mananam cämapita sharkuyta puëdirqannatsu, tsëmi alläpa llakikurqan. Peru kuyakoq wawqi panikuna yanapayaptin y Bibliata seguïdu leyiptinmi, yachatsikunampaq gänasnin yapë yurirqan. Peru wayin wayin yachatsikuyta mana puëdir ni cartatapis qellqëta mana puëdirmi, telëfunullapa yachatsikunampaq decidirqan. Tsëmi unë watukanqan nunakunata qayar qallëkurqan, y tsë nunakunanam willayarqan Bibliapita pikuna yachakuyta munayanqanta. ¿Y imatan pasakurqan? Juk ishkë killallachömi 70 nunakunata Bibliapita yachatsir qallëkurqan. Peru alläpa atskaq kayaptinmi, llapantaqa yachatsita puëdirqantsu. Tsëmi congregacionchö wawqi panikunata nirqan tsë nunakunata wakinta yachatsiyänampaq. Tsë yachakoq nunakunapitaqa atskaqmi reunionman ëwëkäyan. Angelkunaqa mëraq kushishqa sientikuyan, Säratanöpis wawqi panikunata Diosnintsikpita yachatsikuyänampaq yanaparnin.

ANGELKUNAQA MANA ALLIKUNA PASANQANTA RIKARPIS ALLIM AGUANTAYAN

11. Mana allikunapa pasarnin alli aguantanapaqqa, ¿imatataq angelkunapita yachakuntsik?

¹¹ Mana allikunapa pasarnin alli aguantanapaqqa, angelkunapitam yachakuyta puëdintsik. Angelkunaqa clärum rikäyarqan Satanaspis y pëta yanapaq angelkunapis Diosta sirwikarnin contran churakäyanqanta (Gen. 3:1; 6:1, 2; Jüd. 6). Juk kutim Diospa voluntäninta ruranampaq juk angel ëwëkaptin, juk poderösu demoniu michäkur tsapararqan (Dan. 10:13). Tsënöllam angelkunaqa mëtsika watakunapa rikäyashqa juk ishkë nunakunalla Jehoväta sirwiyanqanta, peru cäsi llapan nunakuna sirwita mana munayanqanta. Tsë llapanta rikëkarpis, angelkunaqa Jehovä Diosnintsiktam kushishqa sirwikäyan. Y musyayanmi tiempuwanqa tsë mana alli ruraqkunata Diosnintsik ushakätsinampaq kaqta.

12. ¿Imaraq yanapamäshun problëmakunapa pasarpis alli aguantanapaq?

¹² ¿Imanötan mana allikunapa pasarnin angelkunanö aguantashwan? Capazchi nunakuna imëka mana allikunata ruramäshun o Diosnintsikta sirwinantsikta michämäshun, tsënö kaptinqa yarpänantsikmi mana alli nunakunata Diosnintsik ushakätsinampaq kaqta. Tsëmi angelkunanöpis, alli kaqkunata rurëtaqa dejanantsiktsu (Gäl. 6:9). Y Jehovä Diosnintsikmi, mana allikunapa pasanqantsik hörakuna yanapamänapaq änimantsik (1 Cor. 10:13). Tsëmi santu espïritunta mañakunantsik, tsënöpam pacienciakoq kashun y kushishqa sirwir sïguishun (Gäl. 5:22; Col. 1:11). ¿Imatataq rurankiman Diosnintsikta sirwinëkita michäyäshuptiki? Manam mantsakänëkitsu, tsëpa rantinqa Jehovämanmi llapan shonquykiwan confiakunëki. Pëqa imë hörapis yanapashunëkipaqmi läduykichö këkanqa y kallpayoqtam tikratsishunki (Heb. 13:6).

ANGELKUNAQA CONGREGACION LIMPIU KANAMPAQMI YANAPAKUYAN

13. ¿Ima trabäjuyoqtan angelkuna kayan kë ushanan tiempukunachö? (Mateu 13:47-49).

¹³ Jehovä Diosnintsikqa angelkunatam churashqa kë ushanan tiempukunachö juk trabäjuta rurayänampaq (leyi Mateu 13:47-49). Nunakunata yachatsishqaqa, tukuyläya nunakunam yachakur qallëkuyan; wakinkunam Jehoväta sirwiyänampaq cambiukunata rurayan, peru wakinkunaqa manam. Tsëmi angelkunaqa, “allita ruraq nunakunapita, mana allita ruraqkunata” rakiyänampaq carguyoq kayan. Tsënöpam congregaciontaqa limpiuta katsiyan. Tsënö nirqa, ¿Bibliata estudiëta dejashqakuna o reunionkunaman manana shamoqkuna kutimuyta mana puëdiyänampaq kaqtaku nikantsik? Y ¿congregacionchöpis ni ima problëma manana kanampaq kaqtaku nikantsik? Manam. Tsënö mana kaptimpis, angelkunaqa allim trabajayan congregacion limpiu kanampaq.

14, 15. ¿Imanötan angelkunanöpis yanapakushwan congregacion limpiu kanampaq? (Fötukunata rikäri).

¹⁴ ¿Imanötan noqantsikpis angelkunanö yanapakushwan congregacion limpiu kanampaq? Jehovä Diosnintsiktam munanqannö adoranantsik, jutsa rurëkunapitam cuidakunantsik y wakinkunatapis Jehoväta mana dejayänampaqmi yanapanantsik. Peru tsëpaqqa, alli amïgukunatam akrëta yachanantsik y Jehoväpita rakimaqnintsik rurëkunataqa manam ruranantsiktsu. Tsëta rurarllam congregacion limpiu kanampaq yanapakushun (Sal. 101:3). Tsënöllam wawqi panintsikkunatapis yanapanantsik Jehovä Diosnintsikta mana dejayänampaq. Këllaman pensari: ¿imataraq rurankiman juk wawqi o juk pani jutsata rurashqa kanqanta musyarqa? Tsë wawqita o panitam ninkiman anciänukunata willanampaq. Peru mana willakuptinqa, kikikim anciänukunata willanëki. Tsë jutsa ruraq panintsik o wawqintsik alli kanantam munantsik, tsëmi yanapayänampaq anciänukunata willanantsik (Sant. 5:14, 15).

¹⁵ Jutsa ruraqkunataqa wakintaqa, mana arrepentikuyaptinmi congregacionpita rakiyan. Y pëkunawanqa mananam juntakantsiknatsu (1 Cor. 5:9-13).d Tsënö rakiyaptinmi congregacionqa imëpis limpiulla këkan. Tsënöllam congregacionpita rakishqakunawanqa juntakantsiktsu pëkunata kuyarnin. Manana juntakushqam, rurayanqankunaman alli pensayanqa y Jehovä Diosnintsikta yapë sirwir qallëkuyanqa. Tsëta rurayaptinqa, Jehovänö y angelkunanömi alläpa kushikuntsik (Lüc. 15:7).

16. ¿Imatataq angelkunapita yachakurquntsik y imanö kanëkipaqtan kallpachakuyta pensëkanki?

¹⁶ Angelkuna imakunata rurayanqanta musyanqantsik y pëkunawan juntu trabajanqantsikqa alläpa shumaqmi. Tsënö këkaptinqa, angelkunanö humildi kanapaq, nunakunata kuyanapaq y imëka mana allikunata rikarpis aguantanapaq kallpachakushun. Tsënölla congregacion limpiu kanampaq Diosnintsikta munanqannö adorashun, ama jutsa rurëman ishkishuntsu y Jehoväta mana dejayänampaq wawqi panintsikkunata yanapashun. Angelkuna imanö kayanqampita yachakurqa, Jehoväpa familianmi imëyaqpis kashun.