Jehovä perdonashunqëkitam següru kanëki

1, 2. ¿Imanötan sientikuntsik Jehovä perdonamanqantsikta musyarnin? (Rikäri dibüjuta).

GOBERNANTI Davidqa jutsata ruranqankunata yarparmi alläpa llakikurqan (Sal. 40:12; 51:3; 51 kaq capïtulupa qallanantapis leyi). Peru rasumpa arrepentikuriptinqa, Jehoväqa perdonarqanmi (2 Sam. 12:13). Y Jehovä perdonashqana kanqanta entiendirmi kushishqana y tranquïluna sientikurqan (Sal. 32:1).

² Noqantsikpis Davidnömi kushishqa y tranquïlu këta puëdintsik. Jehoväqa alläpa jutsata rurashqapis perdonamantsikmi. Peru tsëpaqqa shonqupitam arrepentikunantsik, jutsata ruranqantsiktam willakunantsik y mananam tsë jutsata ruranantsiknatsu (Prov. 28:13; Hëch. 26:20; 1 Juan 1:9). Jehovä perdonamarnintsikqa mananam jutsata ruranqantsikta yarpannatsu (Ezeq. 33:16). Tsënö perdonamanqantsikta musyarqa, kushishqa y tranquïlum sientikuntsik.

3, 4. ¿Imanötan panintsik Jennifer sientikurqan? ¿Imatataq këchö yachakushun?

³ Peru Jehovä perdonamanqantsikta creiqa, höraqa manam fäciltsu kanman. Tsëmi panintsik Jenniferta pasarqan. Pëtaqa wamra kanqampitam papäninwan mamänin Jehoväpita yachatsiyarqan, peru shipashyarkurqa pakëllapam mana allikunata rurar qallëkurqan. Tsënö karpis tiempuwanqa yapëmi Jehoväpita yachakurqan y bautizakurqan. Panintsik Jennifermi kënö nin: “Noqaqa qellërëkurmi alläpa trabajaq kä, jukwan jukwanmi kakoq kä, alläpam upyaq kä y imapitapis rasllam o sasllam cölerakoq kä. Tsëkunata ruranqäpitaqa arrepentikurqämi y Jesusrëkur Jehovä perdonamanqantaqa musyarqämi. Peru tsëta musyëkarpis, shonqüchöqa Jehovä Diosnintsik mana perdonamashqa kanqantam sienteq kä”.

⁴ Capazchi qampaqpis jutsata ruranqëkikunapita Jehovä perdonashunqëkita creiqa fäciltsu. Tsënö kaptinqa këtam yarpänëki: Jehoväqa munan perdonashunqëkita Davidnö següru kanëkitam. Tsëmi këchöqa yachakurishun Jehovä perdonamanqantsikta imanir següru kanapaq kaqta y ima yanapamänapaq kaqta.

¿IMANIRTAN SEGÜRU KANANTSIK JEHOVÄ PERDONAMANQANTSIKTA?

5. ¿Imatataq Satanasqa creitsimënintsikta munan? Juk ejempluwan willakaramuy.

⁵ Jehovä Diosnintsik perdonamanqantsikta següru karqa, manam Satanaspa trampanman ishkishuntsu. Pëqa tukuynöpam Jehoväpita rakimënintsikta munan. Tsëmi jutsata ruranqantsikpita Jehovä manana perdonamänapaq kaqta Satanas creitsimënintsikta munan. Pensarishun unë Corintu congregacionchö pasakunqanman. Juk wawqitam madrastanwan kakunqampita congregacionpita rakiriyarqan (1 Cor. 5:1, 5, 13). Y tiempuwanqa tsë wawqiqa arrepentikurqanmi. Peru Satanasqa manam munarqantsu, tsë wawqita cristiänu mayinkuna perdonayänanta ni congregacionman kutitsiyänanta. ¿Imaraq pasakunman karqan tsëta rurayaptinqa? Tsë wawqim pensanman karqan jutsata ruranqampita Jehovä manana perdonanampaq kaqta. Y ‘alläpa llakikurmi’ Jehoväta dejarinman karqan. Diabluqa kanampis tsëtam creitsimënintsikta munan. Peru noqantsikqa musyantsikmi Satanas ‘imakunata rurëta’ munanqanta, tsëmi cäsunantsiktsu (2 Cor. 2:5-11).

6. ¿Imaraq yanapamäshun jutsata ruranqantsikpita llakikurlla mana kakunapaq?

⁶ Jehovä perdonamanqantsikta següru karqa, kushishqam sientikushun. Jutsata rurarqa, alläpam llakikuntsik (Sal. 51:17). Y tsënö llakikunqantsikqa allillam, tsëmi yanapamantsik cambiukunata ruranantsikpaq y alli kaqtana ruranapaq (2 Cor. 7:10, 11). Peru jutsata ruranqantsikllaman alläpa yarparäkur llakikunqantsikqa mananam allinatsu kanman. Alläpa llakikurqa Jehovä Diosnintsikta sirwitapis dejarishwanmi. Peru Jehovä perdonamanqantsikta següru karqa, kushishqanam sientikushun y mananam jutsata ruranqantsikkunata yarparäkushuntsu. Tsënöpam Jehovä munanqannö kushishqana y tranquïluna sirwita puëdishun (Col. 1:10, 11; 2 Tim. 1:3). Kananqa yachakurishun Jehovä perdonamanqantsikta següru kanantsikpaq ima yanapamänapaq kaqta.

¿IMATATAQ RURANKIMAN JEHOVÄ PERDONASHUNQËKITA SEGÜRU KANËKIPAQ?

7, 8. ¿Imanö kanqantataq Jehovä Diosnintsik nirqan Exodu 34:6 y 7 textuchö? Y ¿imanirtan ninqanman confiakushwan?

⁷ Diosnintsik llakipäkoq kanqanman pensë. Pensarishun Sinaï jirkachö Moisesta Jehovä imata ninqanman (leyi Exodu 34:6, 7).a Moisesta parlaparqa, Jehoväqa kikimpaq nirqan “ankupäkoq [y] llakipäkoq” Dios kanqantam. Llakipäkoq këkarqa, ¿manatsuraq sirweqninkunata jutsata rurarir arrepentikuyaptin perdonanman? Mana perdonarqa, manachi kuyakoqtsu ni llakipäkoqtsu kanman. Peru musyanqantsiknöpis, Jehoväqa alläpa llakipäkoqmi.

⁸ Llakipäkoq y ankupäkoq kanqanta kikin Jehovä Diosnintsik nikämashqaqa creinantsikmi. Pëqa rasumpa kaqllatam imëpis nimantsik (Sal. 31:5). Peru Jehovä Diosnintsik perdonashunqëkita mana següru karqa, kënö tapukuy: “¿Noqaqa rasumpaku creï Teyta Dios ankupäkoq y llakipäkoq kanqanta y jutsa ruraqkunata arrepentikuyaptin perdonanqanta?”. Tsëta creirqa segürum kanëki Jehovä Diosnintsik qamtapis perdonashunqëkita.

9. ¿Imatataq Salmus 32:5 entienditsimantsik Jehovä Diosnintsik perdonakoq kanqampita?

⁹ Jehovä perdonakoq kanqanman pensë. Davidmi Jehoväta kënö nirqan: “Qamqa perdonamarqëkim” (leyi Salmus 32:5). Kë textuchö “perdonakoq” neq palabrapaqqa hebreu idiömachöqa entienditsikun “pallari” o “apë” ninantam. Tsëwanmi entiendintsik Davidta Jehovä perdonarninqa, hombrunchö këkaq qepita pallarkur apakoq cuenta, jutsata ruranqampita perdonashqa kanqanta. Tsënöpam Davidqa mas tranquïlu y kushishqa sientikurqan (Sal. 32:2-4). Noqantsikpis rasumpa arrepentikurqa, Davidnömi sientikushun. Jehovä perdonamashqantsik këkaptinqa, mananam jutsata ruranqantsikkunata yarparänantsiknatsu. Yarpararninqa, lasaq qepita apariraq cuentam këkashwan. Peru Jehovämi tsë qepita pallarirkur karuta apakoq cuenta, jutsata ruranqantsikpita perdonamarquntsik y manam ni ichikllapis yarpannatsu.

10, 11. ¿Jehovä imanö kanqantataq yachakuntsik Salmus 86:5 textuchö?

¹⁰ (Leyi Salmus 86:5). Kë versïculuchömi Jehoväta David kënö nirqan: “Perdonakoq kaptikim [qamman] mañakamü”. Tsënöqa nirqan imëpis perdonakoq kanqanta musyarmi. Jehoväqa sirweqninkuna jutsata rurayaptin manam rastsu o sastsu cölerakun. Tsëpa rantinqa, arrepentikuyänantam shuyarëkan perdonanampaq. ¿Imanirtan Jehoväqa perdonanampaq listu këkan? Tsë versïculullachömi kënö nin: “[Qamqa] llapan qayakamoqkunataqa alläpam kuyanki”. Punta kaq yachatsikuychömi yachakurqantsik Jehovä Diosnintsikqa sirweqninkunata alläpa kuyanqanta. Y tsënö kuyarnin lädunkunachö këkaqnö imëpis këkanqanta y mana dejanqanta. Tsënö kuyakoq karmi Jehovä Diosnintsikqa sirweqninkuna arrepentikuyaptinqa jinan höra perdonan (Is. 55:7). Tsëmi Jehovä Diosnintsik perdonashunqëkita mana següru karqa, kënö pensanëki: “Musyämi rasumpa arrepentikoqkunata Jehovä perdonanqanta. Tsëmi noqapis següru kanä perdonamashqana kanqanta”.

¹¹ ¿Imanir mastan Jehovä Diosnintsik perdonamantsik? Bibliachöqa nimantsik imanö rurashqa këkanqantsikta y jutsasapa kanqantsikta musyanqantam. Tsëta Jehovä cuentachö katsinqanta musyarqa alläpam kushikuntsik (Sal. 139:1, 2). Tsë asuntupaq David ninqanta masllata yachakurishun. Tsëmi yanapamäshun Jehovä Diosnintsik perdonamanqantsikpita següru kanantsikpaq.

¿IMANÖ KANQANTSIKTATAQ JEHOVÄ CUENTACHÖ KATSIN?

12, 13. Salmus 103:14 textuchö ninqannö, ¿imanö kanqantsiktataq Jehovä yarpan y imatataq ruran?

¹² (Leyi Salmus 103:14). Davidmi Jehoväpaq nirqan, “allpallapita kanqantsikta” yarpanqanta. Tsëta ninqanwanmi entiendintsik Diosnintsikqa jutsasapa kanqantsikta y imatapis mana allita ruranqantsikta musyanqanta. Tsëmi shonqupita arrepentikushqaqa, perdonamänantsikpaq listu këkan. Tsë versïculu ninqampita maslla yachakurishun.

¹³ Davidmi Jehoväpaq kënö nirqan: “Allim musyan imanö kamashqa kanqantsikta”. Diosnintsikqa Adanta kamarqan “allpapitam”, tsëmi musyan imanö kanqantsikta y imata wananqantsikta. Nunakunaqa jutsannaq karpis kawayänampaqqa shütëta, mikuyta y punuytaran wanayan (Gen. 2:7). Y Adanwan Ëva jutsata rurariyaptinqa, perdonashqa këtapis wanarqantsiknam. Tsëtam Jehoväqa musyan. Peru manam musyanllatsu, sinöqa jutsasapa kanqantsiktam yarpan. Y Salmus 103:14 textuchö “yarpanmi” neq palabraqa entienditsikun, rasumpa arrepentikushqaqa jutsasapa kanqantsikta yarparnin Diosnintsik llakipämanqantsikta y perdonamanqantsiktam (Sal. 78:38, 39).

14. (1) Salmus 103:12 ninqanqa, ¿Jehovä imanö perdonamanqantsiktataq entienditsimantsik? (2) ¿Jehovä imanö perdonamanqantsiktataq entiendintsik Davidta perdonanqanwan? (Leyi “Jehovä perdonamarnintsikqa chipyëpam qonqëkun” neq recuadruta).

¹⁴ ¿Ima mastataq Salmus 103 textuchö Jehoväpaq nimantsik? (Leyi Salmus 103:12). Davidqa nirqan Jehovä perdonamarnintsikqa jutsantsikta alläpa karuman apakunqantam. “Inti o rupay yarqamunan” läduqa, jeqanan lädupita alläpa karuchömi këkan, tsënö karumanmi jutsantsikta apakun. ¿Imatataq tsënö ninqanwan entienditsimantsik? Tsë versïculupaqmi juk libru kënö nin: “Jutsata tsënö karuman apakuptinqa, segürum kanantsik ni ima rastrupis mana quedanqanta ni ichikllapis mana yarpanqanta” (El tesoro de David, de Charles Spurgeon, volumen 2, Samuel Vila traducinqan). Höraqa imatapis muskirirmi o mushkurirmi unë pasamanqantsikkunata yarpärintsik. Peru Jehovä perdonamashqaqa, jutsata ruranqantsikqa manam ni imapis quedannatsu yarpätsinampaq. Alläpa karuman apakoq cuentam chipyëpa qonqëkunqa y manam jutsa ruranqantsikkunapita juzgamäshunnatsu (Ezeq. 18:21, 22; Hëch. 3:19).

15. Jutsata ruranqëkipita mana alli sientikurqa, ¿imatataq rurankiman?

¹⁵ Jutsata ruranqëkipita arrepentikushqana këkarpis mana alli sientikurqa, ¿imatataq rurankiman? Diosnintsik perdonashunqëkita següru kanëkipaqmi Salmus 103 ninqanta yarpänëki. Y kënömi pensanëki: “Jutsasapa kanqäta Jehovä musyëkaptinqa y arrepentikuptï perdonamashqana këkaptinqa, mananam jutsata ruranqäkunaman yarpänänatsu. Y Jehovä perdonamarnin jutsa ruranqäta chipyëpa qonqëkaptinqa y imëpis manana yarpëkaptinqa, noqapis chipyëpam qonqëkunä”. Diosnintsik perdonashurnikiqa, mananam jutsata ruranqëkikunata yarpannatsu. Pëpis mana yarpëkaptinqa, manam allitsu kanman yarparäkunqëki (Sal. 130:3). Jehovä perdonashunqëkita següru karninqa, manam jutsata ruranqëkikunata yarpar llakikunkinatsu y kushishqam Jehoväta sirwinki.

16. ¿Imanirtan allitsu kanman jutsata ruranqantsikkunallaman alläpa yarparäkunqantsik? (Dibüjuta rikäri).

¹⁶ Këllaman pensarishun: cärruta manejaqkunaqa, qepankunata juk cärrukuna ëwëkanqanta o mana ëwëkanqanta musyayänampaqmi höra höralla espëjuman rikäyan. Peru manam espëjuman rikararllatsu manejayan, tsënö manejayaptinqa peligrösum kanman y manam avanzayanmantsu. Tsëmi següru manejayänampaqqa, masqa puntaman rikaräyan. Tsënöllam jutsata ruranqëkikunaman höra höralla yarpanqëkipis alli kanqa, tsëmi yanapashunki jutsa rurëman yapë mana ishkinëkipaq. Peru jutsata ruranqëkillaman alläpa yarparäkunqëkiqa manam allitsu kanman y manam Jehovä Diosnintsikta llapan shonquykiwan sirwita puëdinkitsu. Tsëmi Diosnintsik änikunqankunaman masqa yarparänëki. Shumaq Patsachöqa mananam mana allikunata ruranqëkikunata yarpankinatsu (Is. 65:17; Prov. 4:25).

SHONQUNTSIKCHÖ SEGÜRU KANANTSIKPAQ KALLPACHAKUR SÏGUISHUN

17. ¿Imanirtan Jehovä perdonamanqantsikta següru kanapaq kallpachakur sïguinantsik?

¹⁷ Jehovä kuyamanqantsikta y perdonamanqantsikta següru kanapaqmi shonquntsikta entienditsir o creitsir sïguinantsik (1 Juan 3:19, nöta). ¿Imanirtan tsëta ruranantsik? Tsëta mana rurashqaqa, Satanasmi creitsimënintsikta munanqa Jehovä mana kuyamanqantsikta y mana perdonamanqantsikta. Tsëta creirqa, Jehovä Diosnintsiktam dejarishwan. Y Satanasqa musyanmi wallka tiempullana kanampaq kaqta, tsëmi masraq Jehoväpita rakimënintsikta munan (Apoc. 12:12). ¡Ama permitishuntsu Satanas creitsimänata!

18. ¿Imatataq rurankiman Jehovä kuyashunqëkita y perdonashunqëkita següru kanëkipaq?

¹⁸ Punta kaq yachatsikuychömi yachakurqantsik Jehovä kuyashunqëkita següru kanëkipaq imakunata ruranëkipaq kaqta. Y këchönam yachakurquntsik jutsata ruranqëkipita Jehovä perdonashunqëkita següru kanëkipaq imakunata ruranëkipaq kaqta. Allim pensanëki sirweqninkunata Diosnintsik perdonanqanta y llakipäkoq kanqanta Biblia willakunqanman. Ama qonqëtsu jutsasapa kanqëkita cuentachö katsinqanta y alläpa llakipäshunqëkita. Jehovä Diosnintsik perdonashurnikiqa llapantam qonqëkun y manam jutsata ruranqëkikunata yarpannatsu. Tsëta següru karqa, Davidnömi llapan shonquykiwan kënö ninki: “¡Gracias Jehovä jutsata ruranqäkunapita perdonëkamanqëkita!” (Sal. 32:5).