Mantsallïsha këkarpis misionëram karqä

1951 watachömi Austria nacionpa Viëna markanchö yurikurqä. Mantsallïsha karpis, Diosnintsikmanqa llapan shonqüwanmi seguïdu mañakoq kä. Papänïwan mamänïqa catölicum kayarqan. Peru nuëvi watayoq këkaptïmi, papänïqa Testïgukunawan Bibliapita yachakur qallëkurqan, y ichik tiempullachönam mamänïpis.

Tsëpitanam papänïwan mamänïqa Viëna markachö këkaq Dobling congregacionman reunionkunaman pushayämarqan. Wayïkunachöqa llapäkuna juntum Bibliata seguïdu leyiyaq y estudiayaq kayä, reunionkunaman ëwayaq kayä y asamblëakuna kaptimpis imëka rurëchömi yanapakuyaq kayä. Tsë watakunam papänïqa yanapamarqan llapan shonqüwan Jehoväta kuyanäpaq. Y Jehoväman mañakurqa, noqapaq y menor kaq nanäpaqmi mañakamoq precursöra kayänäpaq. Peru noqaqa manam precursöra këtaqa pensaqtsu kä.

LLAPAN TIEMPÜWAN JEHOVÄTA SIRWIR QALLËKÜ

1965 watachömi 14 watayoq këkar bautizakurqä. Peru noqaqa mana reqinqä nunakunata parlapëtaqa mantsaqmi kä, y mana väleqnömi imëpis sientikoq kä. Tsëmi nunakunata Diosnintsikpita parlapëqa fäciltsu karqan. Y bautizakushqana këkarpis mana väleqnö sientikurmi wakinkunanö këta munar mana Testïgu jövinkunawan juntakur qallëkurqä. Pëkunawan amïgu kë gustamaptimpis, mana Testïgukunawan juntakë mana alli kanqanta musyarmi mana alli sientikoq kä. Tsënö sientikurpis amïgükunataqa manam dejëta puëdirqätsu. Peru ¿imatan yanapamarqan pëkunawan manana juntakunäpaq?

Tsë witsankunam 16 watayoq Dorothee jutiyoq shipash publicadora tikrarqan. Pëtaqa wayin wayin yachatsikuymi alläpa gustaq. Peru noqaqa pëpa mayornin këkarpis, manam yachatsikoq alläpaqa yarqoqtsu kä. Tsëmi kënö pensarqä: “Noqapaqa papänïpis y mamänïpis Testïgum kayan, peru Dorotheeqa japallanmi Jehoväta sirwin y qeshyëkaq mamänintam atiendin. Tsënö këkarpis, seguïdum yachatsikoq yarqun”. Pëta rikarmi noqapis Jehoväpita maslla yachatsikuyta munarqä. Ishkäkunam precursöra tikrayarqä; puntataqa precursöra auxiliarmi kayarqä y tsëpitanam precursöra regular. Dorotheetaqa Jehoväpita yachatsikuymi alläpa gustaq, tsëmi noqapis pënö yachatsikunäpaq kallpachakurqä. Dorotheem yanapamarqan juk estudiantita tarinäpaq. Y mas seguïdu yachatsikurmi wayin wayimpis y cällikunachöpis mas fäcil-llana nunakunata parlapëta puëdeq kä.

Precursöra këta qallanqä watam congregacionnïman chämurqan juk precursor especial y jutinqa Heinzmi karqan. Pëqa Canadä nacionta Testïgu wawqinta watukaq ëwanqanchömi Jehoväpita yachakushqa kanaq. Heinzqa rikanqä junaqpitam gustamarqan. Peru pëqa misionëru këtam munaq y noqaqa manam misionëra këta pensaqtsu kä. Tsëmi alläpa kuyëkarpis imatapis nirqätsu. Peru tiempuwanqa casakuyarqämi y Austriachömi precursor sïguiyarqä.

MISIONËRA KËTA MUNÄ

Heinzqa misionëru këta munanqantam imëpis nimaq, peru manam misionëra kanäpaq obligamaqtsu. Kuyëllapam kënö nimaq: “Wamrantsik mana këkaptinqa, ¿manatsuraq Jehoväpaq masllata rurashwan?”. Rasunmi, mantsallïsha këkarpis precursöranam karqä, peru misionëra këtaqa imëpis mana puëdinäpaq kaqtam pensarqä. Tsënö kaptimpis Heinzqa pacienciawanmi yanapamarqan, y misionëru këta munanqantam höra höraqa yarpätsimaq. Tsënöllam nimarqan rurëta mana puëdinäpaq kaqkunaman alläpa mana yarpachakunäpaq. Tsëpa rantinqa, nunakunata yanapëta puëdinqäman maslla pensanäpaqmi nimarqan. Tsënö consejamanqanqa alläpam yanapamarqan.

Peru tiempuwanqa misionëra këtam munarqä, tsëmi Galaad Escuëlaman ëwayänäpaq solicitudta llenayarqä. Peru siervu de sucursalnö trabajaq turim nimarqan inglesta maslla yachakunäpaq. Tsëmi maslla yachakur qallëkurqä, y tsëpita kima wata pasariptinmi Salzburgu markachö këkaq serbocroata idiömata parlaq congregacionman mandayämarqan. Tsëchöqa siëti watapam yanapakuyarqä, y juk watam congregacionkunata watukar yanapakuyarqä. Serbocroata idiömata yachakunanqa manam fäciltsu karqan, tsënö kaptimpis atskaqtam Bibliapita yachatsiyaq kayä.

Tsëpitanam 1979 watachö vacacionta ëwaqnölla Bulgaria nacionta ëwayänäpaq niyämarqan. Tsë nacionchö Testïgukunaqa, autoridäkuna michäkuyaptinmi Diospita yachatsikuyta ni reunionkunata rurëta puëdiyaqtsu. Tsëmi sucursalpita niyämarqan Sofïa markachö këkaq pitsqaq nanakunapaq ichikllëllaman rurayanqan publicacionkunata pakëllapa apayänäpaq. Noqaqa alläpam mantsapakurqä, peru Jehovä yanapamaptinmi mandayämanqanta cumplirqä. Peru tsë nanakunaqa autoridäkuna carcelayänan kaptimpis, Jehovätaqa kushishqam sirwiyaq. Pëkunata rikanqämi yanapamarqan dirigimaqnintsikkuna niyämanqankunata mana mantsapakuypa ruranäpaq.

Y tsë witsankunam Galaad Escuëlaman ëwayänäpaq solicitudta yapë llenayarqä y tsë kutichöqa invitayämarqanmi. Noqaqa pensarqä Estädus Unïdusta Galaad Escuëlaman ëwayänäpaq kaqta y ingles idiömachö yachakuyänäpaq kaqtam. Peru 1981 watachömi Alemania nacionpa Wiesbaden markanchö këkaq sucursalchö Galaad Escuëlata rurayarqan aleman idiömachö, y tsëmanmi ëwayarqä. Noqapaqqa tsë idiömata parlaptïmi mas fäcil karqan yachakunäpaq. Peru Galaad Escuëla ushariptin mëman mandayämänampaq kaqtaqa manam musyayarqätsu.

ALLÄPA GUËRRA KANQAN NACIONMANMI MANDAYÄMARQAN

Kenia nacionmanmi mandayämarqan. Peru Kenia nacionchö këkaq sucursalpitam, “¿Uganda nacionchö yanapakuyta munayankimantsuraq?” nir tapuyämarqan. Uganda nacionchöqa Idi Amin jutiyoq oficialmi gobiernuta vencirir kikin gobernar yëkushqa karqan; tsëpitaqa 10 watanam pasashqa karqan. Idi Amin gobernanqan witsanqa mëtsikaq nunakunam wanuyarqan y alläpam sufriyarqan. Y 1979 watachönam Idi Amintapis gobernëkanqampita qarquriyarqan. Uganda nacionchö alläpa guërra kashqa kaptinmi ëwananqa mantsëpaq karqan. Peru Galaad Escuëlachömi yachatsiyämarqan Jehoväman confiakuyänäpaq, tsëmi ëwayänäpaq änikuyarqä.

Ugandachö kawëqa manam fäciltsu karqan. Tsëchöqa manam yaku kaqtsu, telëfunupaqpis señal kaqtsu, nunakunatam lluta illapayaq y alläpam suwakuyaq; y paqaspam masqa suwakuyaq. Tsëmi llapan nunakuna wayinkunachö quedakuyaq, y paqaspa wayinkunaman suwakoq o wanutseq mana chäyänampaqmi Diosman mañakuyaq. Tsënö kawakuy mana fäcil këkaptimpis, turikuna y nanakunaqa kushishqam Jehoväta sirwiyaq.

1982 watachömi, Uganda nacionpa Kampäla markanman chäyarqä. Y pitsqa killapam Sam y Christina Waiswa familiapa wayinchö quedakuyarqä. Pëkunaqa tsë wayichö kayaq pitsqa wamrankunawan y chusku familiankunawanmi. Pëkunaqa waktsalla këkarpis, wayinkunachömi quedatsiyämarqan y diachö juk kutillam mikuyaq. Pëkunawan juntu täkurmi imëkatapis alli cuidëta yachakuyarqä. Wallkalla yakuwan bañakuytam yachakuyarqä y bañakuyanqä yakutanam bäñuchö utilizäyaq kayä. Tsëkunata yachakuyanqämi alläpa yanapayämarqan misionëru kayanqä witsan. Y 1983 watachönam täkuyänäpaq juk wayita tariyarqä; tsë sitiuqa wakin sitiukunapita mas següruran karqan.

Tsë markachö Diospita yachatsikuyqa alläpa shumaqmi karqan. Y yarpämi juk killallachö 4 mil revistakunata nunakunata dejapuyanqäta. Nunakunaqa Diostam respetayaq y Bibliapita parlapäyaptïqa kushishqam wiyakuyaq. Heinzwan noqaqa cada ünum diezta o quinceqta nunakunata Bibliapita yachatsiyaq kayä. Pëkunaqa reunionkunaman chakipa karuta ëwëkarpis, manam quejakuyaqtsu; imëpis kushishqallam këkäyaq. Pëkuna tsënö kayanqampitaqa imëkatam yachakuyarqä.

Uganda nacionchöqa 1985 y 1986 watakunachöpis ishkë kutim guërra karqan. Tsëchöqa wamrakunapis soldädum kayaq; controlkunachömi imëpis rikäyaq kayä armankunawan këkäyaqta. Noqakunaqa Jehovämanmi seguïdu mañakuyaq kayä imatapis alli pensëkur rurayänäpaq y mana mantsapakuyänäpaq. Y Jehoväqa yanapayämarqanmi. Bibliapita yachakuyta munaq nunakunata tarirqa, mananam mantsakuyaqnatsu kayä.

Tsënöllam tsë nacionman juk nacionkunapita chämoq nunakunatapis Diospita parlapäyaq kayä. Juk kutim parlapäyarqä Murat Ibatullin nunata y warmin Dilbarta. Pëkunaqa kayarqan Rusia centralchö këkaq Tartaristan markapitam. Muratqa doctormi karqan, y warminwan ishkanmi Jehoväpita yachakuyarqan y kananyaqmi Jehoväta sirwikäyan. Y tiempuwannam Tatjana Vileyska jutiyoq warmitapis yachatsiyarqä. Pëqa Ucraniapitam karqan, y alläpa llakishqalla kakurmi wanutsikuyta pensanaq. Tatjanaqa bautizakurqanmi, tsëpitam markanman kutikurqan y tsëchömi publicacionkunata traducir yanapakurqan.a

JUK NACIONCHÖNA MISIONËRU KAYÄ

Euröpachöqa atska watakunapam wakin nacionkunachö gobiernukuna Testïgukunata prohibiyarqan Diospita yachatsikuyänanta y reunionninkunata rurayänanta. Peru tsëqa cambiashqanam karqan, tsëmi Bulgaria nacionchöqa Testïgukuna yachatsikuyta puëdiyarqanna. 1991 watam vacacionyoq karnin Austriata ëwayarqä, tsëchö këkäyaptïmi sucursalpita qayayämarqan Bulgaria nacionta mandayämänampaq. Puntataqa 1979 watachömi Bulgaria nacionta ëwayarqä publicacionkunata pakëllapa apar. Peru kananqa Diospita yachatsikuyänäpaqnam mandëkäyämarqan.

Austria sucursalpitaqa niyämarqan Ugandata mana kutiyänäpaqmi. Tsëmi cösasnïkunata apamoq ni turi nanakunapita despidikoqpis ëwayarqänatsu. Austriapitaqa Alemaniachö këkaq Betelmanmi ëwayarqä, tsëchömi cärruta qoyämarqan y tsë cärruwanmi Bulgaria nacionyaq ëwayarqä. Bulgariaman chärirqa, Sofïa markachö 20 publicadoryoq grüpuchömi yanapakuyarqä.

Bulgaria nacionchö Diospita yachatsikuyqa manam fäciltsu karqan. Manam bulgaru idiömata yachayarqätsu. Tsë idiömachöqa La verdad que lleva a vida eterna y Mi libro de historias bíblicas librukunallam kaq. Y nunakunapis manam Bibliapita yachakuyta munayaqtsu. Peru turi nanakunawanqa gänas gänasllam yachatsikuyaq kayä. Tsëtam cuentata qokuriyarqan ortodoxo religionchö nunakuna, y chikirmi qallëkayämarqan.

1994 watachömi gobiernuqa Testïgukunata yapë prohibirirqan yachatsikuyänanta. Tsëmi nunakunaqa, “kë religionqa alläpa peligrösum” nirnin mana alli tratar qallëkayämarqan. Wakin Testïgukunatam autoridäkuna carcelman apayarqan. Y periödicupapis, televisionpapis ulikurmi o llullakurmi Testïgukunapaq kënö niyaq: “Pëkunaqa wamrankunatam wanunampaq dejariyan y Testïgu mayinkunatapis wanutsikuyänampaqmi animayan”. Tsënömi imëkata ulikuyaq. Y Diospita yachatsikuyaptïqa nunakunaqa maqayämëtam munayaq, qayapäyämaq, policïatam qayayämoq y imëkakunawanmi qompayämaq o saqmayämaq. Tsë nacionmanqa manam publicacionkunapis chämoqtsu, y reunionkunata rurayänäpaq wayinkunata alquilayämëtapis manam munayaqtsu. Y juk kutiqa asamblëachö këkäyaptïmi, policïakuna yëkëkamur asamblëata rurayänäta munayarqannatsu. Tsëkunapaqa manam Heinzwan imëpis pasashqatsu kayarqä. Ugandachöqa nunakuna alläpa kuyakoqmi kayaq y Diospita yachatsiyaptïpis shumaqmi wiyakuyaq. Peru ¿imatan yanapayämarqan Bulgariachö kushishqa yachatsikur sïguiyänäpaq?

Turi nanakunawan juntu kayanqämi yanapayämarqan. Pëkunaqa Jehoväpita rasumpa kaqta yachakushqa kayanqampitam alläpa kushikuyaq y tsëchö këkäyanqäpitam alläpa agradecikuyaq. Turi nanakunawanqa imëkachömi yanapanakuyaq kayä y cuidanakuyaq kayä. Tsëchömi qowäwan o runäwan yachakuyarqä ima problëmapa pasarpis o mëchö karpis nunakunata rasumpa kuyarqa, kushishqa këta puëdinqantsikta.

Peru 1998 watachömi gobiernu permitiptin, Testïgukuna yachatsikuyta puëdiyarqanna. Tsëmi bulgaru idiömaman publicacionkunata traducir qallëkuyarqan. 2004 watachönam Betel wayita rurar ushayarqan. Bulgaria nacionchöqa kananqa 57 congregacionkuna y 2.953 publicadorkunam kayan. 2024 watachönam 6.475 nunakuna Jesus wanunqanta yarpänapaq reunionman ëwayarqan. Y Sofïa markachöqa kananqa nuëvi congregacionkunam kan. Puntataqa tsë markachö pitsqaq nanakunallam kayarqan. Clärum rikäyarqö Diospa Palabran kënö ninqan cumplikanqanta: “Wallkaqlla kaqkunam atska milman chäyanqa” (Is. 60:22).

QESHYAPÄKUYÄ

Doctorkunam cuerpüchö atska kuti tumorkunata tariyarqan. Peru peqächö o umächö kaqmi mas grävi karqan. Tsëmi India nacionchö radioterapiata rurayämarqan y 12 höram operayämarqan. Tumortaqa cäsi llapantam ushakätsiyarqan. Tsëmi mejoranqäyaq India sucursalchö quedakuyarqä y tsëpitaran Bulgaria nacionta kutikuyarqä.

Tsë witsankunam qowä Heinztapis doctorkuna willayarqan Huntington qeshyawan qeshyëkanqanta. Tsë qeshyawan karmi purita y parlëtapis alläpaqa puëdeqllatsu y karkaryarllam kakoq. Peoranqanmannömi maslla cuidanä karqan. Peru alläpa utishqa o pishipashqam sientikoq kä, tsëmi atiendita manana puëdinäpaq kaqta pensar yarpachakoq kä. Peru juk jövinlla turim Diospita yachatsikuyänampaq qowäta seguïdu apaq. Parlëta mana puëdiptin y karkaryarlla kakuptimpis, tsë turiqa pacienciawanmi qowäta yanaparqan. Y atiendita mana puëdinqä hörakunam tsë turi yanapamaq. Wamräkuna mana kaptimpis, Jehovä Diosnintsikmi tsë turita churamurqan imëka wamräkunanö yanapayämänampaq (Mar. 10:29, 30).

Qowä o runä Heinzpis cancer qeshyawanmi qeshyarqan y 2015 watachömi wanukurqan. Qowätaqa alläpam llakï, pëmi alläpa mana yarpachakunäpaq yanapamaq (Lüc. 20:38). Shumaq parlapämanqankunata y consejamanqankunataqa imë hörapis yarparëkällam. Alläpam agradecikü pëwan juntu atska watakunapa Jehoväta sirwiyanqäpita.

JEHOVÄTAM AGRADECIKÜ YANAPAMANQAMPITA

Imëka problëmakunapa pasanqächöpis Jehovämi yanapamashqa. Tsënöllam misionëra kanäpaq y mantsallïsha këkaptïpis nunakunata maslla kuyanäpaq yanapamashqa (2 Tim. 1:7). Jehovä yanapayämaptinmi menor kaq nanäpis y noqapis llapan tiempükunawan Jehoväta sirwikäyä. Menor kaq nanäqa qowanwan o runanwanmi Euröpachö serbia idiömata parlaq congregacionkunata watukarnin yanapakuykäyan. Wamra këkäyaptï papänï mañakunqantaqa Jehovä Diosnintsik contestamushqam.

Bibliata leyirmi tranquïlu sientikü. Y mana allikunapa pasanqä hörakunam, Jesus ruranqannö, Diosnintsikman ‘llapan shonqüwan’ mañakuyta yachakurqö (Lüc. 22:44). Y mañakunqätaqa Jehovä contestamushqa, Sofïa markachö Nadezhda congregacionchö turi nanakunawanmi. Pëkunaqa wayinkunamanmi invitayäman y kuyayämanqantam niyäman, tsëmi kushishqa sientikü.

Wanushqakuna kawariyämunampaq kaq tiempuman pensanqämi alläpa yanapaman. Familiäkunawan Shumaq Patsachö kushishqa këkäyanqämanmi pensä: papänïwan mamänï casakuyanqan junaqchö jövin y shipash kayanqannö wayïkunachö këkäyanqanta, menor kaq nanä cocinakuykanqanta y qowä Heinz cawallunwan këkanqantam pensä. Tsëkunaman pensanqämi yanapaman Jehoväta agradecikunäpaq y alläpa mana llakikunäpaq.

Kananyaq Jehovä bendicimanqankunaman pensar y shamoq tiempuchö bendicimänampaq kaqkunaman pensarqa, Davidnömi sientikü. Pëmi kënö nirqan: “Teyta Jehoväqa alläpa allim, pëman mana markäkushqa o [mana] yärakushqa karqa, manam kawëkämantsu karqan. Teyta Jehoväman confiakuy, valienti kë, ama imatapis mantsëtsu, Teyta Jehoväman confiakuy” (Sal. 27:13, 14).