Plantayanqanchö wëtaq cuenta kayänampaqmi Jehovä yanaparqan

Matsta y warmin Anntaqa 1979 watam Galaad escuëlaman invitayarqan. Tsë escuëlachömi wawqi Jack Redford llapankunata kënö nir consejarqan: “Plantayäshunqëkichö wëtaq cuenta kayë”, tsë consëjum pëkunataqa alläpa yanaparqan. Pëkunataqa imëka plantata jukläman jukläman plantaq cuentam juklächö juklächö yanapakuyänampaq niyarqan. Tsëmi kë nacionkunachö yanapakuyarqan: Iran, Mauriciu, Myanmar, Tanzania, Uganda y Zaire. Imakunapa pasayanqanta musyarishun.

¿Imanötan Jehoväpita yachakur qallayarqan?

Matsmi kënö willakun: Guërra kanqan witsampaqqa papänïqa Polonia nacionchömi tärarqan o yacharqan, pëqa catölicukuna mana allikunata rurayaqta rikarmi llakikoq. Tsëmi “mëllachöpis alli kaq religionqa kanchi” nir pensaq. Awmi papänï ninqanqa rasumpam kanaq. Alli kaq religion kanqantaqa librukunata leyirmi musyarirqä, noqataqa utilizashqa librukunata rantïkur leyïmi gustamaq. Juk kutim La verdad que lleva a vida eterna neq azul libruta rikärir alläpa gustamaptin rantirirqä y tsë paqasllam llapanta leyir usharirqä. Tsëta leyirmi cuentata qokurqä rasumpa kaq religionta tarishqa kanqäta.

1972 wata abril killapitam Jehoväpa Testïgunkunapa librunkunata y maskunata leyir qallëkurqä, tsëkunachömi tapukuynïkunapa respuestanta tarirqä. Jesus parlanqan negocianti nunanömi noqapis sientikurirqä, tsë nunaqa alläpa väleq perlasta tarïkurmi jinan höra imëkanta rantikuykur tsë perlasta rantirqan. Pënöllam noqapis doctorpaq estudianäpaq këkarnin, tsëkunata dejëkur Bibliapita yachakur qallëkurqä (Mat. 13:45, 46). Y 10 de diciembri de 1972 watachömi bautizakurqä.

Bautizakuriptïnam papänïkuna y wawqïpis Bibliapita yachakur qallëkuyarqan y juk watallachömi bautizakuyarqan. Noqaqa 1973 wata juliu killapitam precursor regular karqä. Tsë witsanmi congregacionnïchö Ann-Catrin jutiyoq Jehoväta kuyaq shumaqllan precursörata reqirirqä y shonqütam suwarirqan, pëwanmi 1975 watachö casakurqä. Ishkäkunam Suecia nacionpa juk markanchö chusku watapa yachatsikuyarqä, tsë shumaq markachöqa pïmëmi Bibliapita yachakuyta munayaq.

Annmi kënö willakun: Estocolmu markachö universidächö këkarmi papänïqa Bibliapita estudiar qallëkurqan. Papänïqa kimsa killayoqllaraq këkaptïmi reunionkunam y yachatsikoq ëwarnin apamaq. Tsëqa manam ichikllapis mamänïta gustarqantsu. Tsëmi imëkanöpa papänïta creitsita munarqan Jehoväpa Testïgunkunaqa pantashqa këkäyanqanta. Peru manam puëdirqantsu, kikimpis Bibliapitam yachakur qallëkurqan y bautizakurirqanmi. Noqaqa 13 watayoq këkarmi bautizakurqä y 16 watayoq këkarnam precursöra regular karqä. Unëpam Umëa markachö yachatsikur yanapakurqä, tsëllanam precursöra especial kanäpaq nirayämarqan.

Matswan casakurirllam mëtsikaqta Bibliapita yachatsiyarqä y bautizakuyarqanmi. Juk shipashtapis Bibliapita yachatsiyarqämi jutinqa Maivormi, pëqa atska qellëtam gänanman karqan, peru Jehoväta maslla sirwinampaqmi tsë llapanta dejarqan y menor kaq nanäwanmi precursöra kayarqan y mëtsëchömi yanapakuyarqan. Pëkunataqa 1984 watachömi Galaad escuëlaman ëwayänampaq invitayarqan. Y kananqa Ecuadorchömi misionëra kayan.

¿Imanötan “plantayäshunqëkichö wëtaq cuenta kayë” neq consëju mëtsëchö misionëru kayanqan witsan yanaparqan?

Matsmi kënö willakun: Awmi noqakunataqa juk plantata jukläman jukläman plantaqnömi juklächö juklächö yanapakuyänäpaq niyämarqan. Peru Jesusman markäkur o yärakurmi “ruri ruriyaq watsiyoq o matsuyoq” planta cuenta fuerti y firmi kayarqä. Tsëmi Jesusnölla humildi kayänäpaq kallpachakuyarqä (Col. 2:6, 7). Noqakunaqa manam costumbrïkunamannö imatapis rurayänantatsu shuyaräyaq kayä, tsëpa rantinqa kikïkunam kallpachakuyarqä chäyanqä markachö wawqi panikunapa costumbrinkunawan yachakäyänäpaq. Imëkachöpis Jesusnö kayänäpaq kallpachakuyanqämi yanapayämarqan ‘yaku kuchunchö jatun plantanö’ raslla yachakäyänäpaq y mëtsëchö yanapakur kushishqa kayänäpaq (Sal. 1:2, 3).

Annmi kënö willakun: Juk plantata juk läduman plantayaptin jeqar sïguinampaqqa intita o achëtaraqmi necesitan, tsë plantata ‘inti o rupay’ yanapaqnömi noqakunatapis Jehovä yanapayämashqa y bendiciyämashqa (Sal. 84:11). ¿Imanötan bendiciyämashqa? Wakin markakunachönöllam Iran nacionpa Teheran markanchöpis wawqi panikunaqa unë witsan Diospa sirweqninkunanölla alläpa kuyakoq y alli kayarqan. Iranchö wawqi panikunata alläpa yachanarmi tsëpita ëwakuyta munayarqätsu, peru 1980 watachömi autoridäkuna niyämarqan manana yachatsikuyänäpaq y ishkë dia masllana quedayänäpaq. Tsëmi sucursalpita niyämarqan Africachö këkaq Zaire nacionchöna yachatsikuyänäpaq (kananqa Republica Democrätica del Congu nirmi reqiyan).

Africaqa mantsëpaq kanqanta, culebrakuna y imëka qeshya kanqanta willayämashqa kaptinmi, tsëman ëwayänäpaq nirayämaptin alläpa mantsakar waqarqä. Peru tsënö mantsakashqa këkaptïmi tsëchö yanapakushqa amïgükuna kënö niyämarqan: “Ama yarpachakuyëtsu manam pensayanqëkinötsu, tsëman chärirqa rasmi yachakäriyanki y gustayäshuptikim tsëpita ëwakuytapis munayankinatsu”. Awmi niyanqannöllam Africachö wawqi panikunaqa alläpa kuyakoq y yachanëpaq kayarqan. Peru seis watapana tsëchö yanapakuykäyaptïmi autoridäkunaqa yachatsikuyänäta michäyämarqan. Tsëmi Jehoväman mañakurqä tsëchö quedakuyänäpaq. Tsë höram kënö nir asinärirqä, “qallananllachöqa shamuyta munarqätsu, peru kananqa quedakuyta munar mañakuykä”.

¿Ima bendicionkunatataq chaskiyashqa yanapakuyanqan witsan?

Matsmi kënö willakun: Noqakunanölla mëtsëpita misionëru wawqi panikunatam reqiyarqö y amïgükunam kayan. Y manam tsëllatsu wakin sitiukunachöqa mëtsikaqtam Bibliapita yachatsiyarqö, noqam 20 nunakunata y tsënöllam warmïpis 20 warmikunata Bibliapita yachatsirqan. Jinamampis Africachö wawqi panikuna kuyakoq y alli kayanqantaqa kananyaqmi yarparëkä. Zaire nacionchö congregacionkunata watukarmi cärrükunata wawqikunapa wayin lädunllachö cuadrayaq kayä, pëkunaqa ‘puëdiyanqampitapis mastam’ imëkata qarayämaq (2 Cor. 8:3). Jinamampis warmïwanqa cada paqasmi cuentanakuyaq kayä tsë diachö imakunapa pasayanqäta, tsënö cuentanakuyqa alläpa shumaqmi kaq. Cada cuentanakurmi warmïwan ishkäkuna Jehoväta agradecikuyaq kayä yanapayämanqampita.

Annmi kënö willakun: Alläpam kushikurqä mëtsëpita turi nanakunata reqirirnin. Jinamampis frances, luganda, persa y suajili idiömakunata y pëkunapa costumbrinkunapitam maslla yachakuyarqö. Y manam tsëllatsu, congregacionkunachö tsëllaraq bautizakushqakunatam maslla yanapakuyänampaq yachatsiyarqö y llapäkuna juntum Jehoväta kushishqa sirwiyarqä, pëkunaqa amïgukunam kayan (Sof. 3:9).

Cada markakunata viajarmi Jehovä imëka kamanqankunata kushishqa rikäyaq kayä. Pasyaq ëwaqkunanöllam noqakunapis kushishqa mandayämanqampa ëwayaq kayä y Jehovänam tsë sitiukunata reqitsiyämaq cuenta yanapayämarqan. Jehoväta mana sirwishqa karqa manachi mëtsëpa reqipakur kushishqa puriyämantsu karqan.

¿Imatan pëkunata yanapashqa mana allikunapa pasayanqan höra?

Matsmi kënö willakun: Yanapakuyanqä witsanqa imëkapitam qeshyayarqö, malaria o paludismo niyanqan qeshyapis tsariyämarqanmi. Warmï Anntanäqa atska kutim operayarqan. Manam tsëllatsu, papänïkunapaqpis edäna kayaptinmi alläpa yarpachakuyaq kayä. Peru wawqï y warmïpa turinkuna y nananmi mana fäcil kaptimpis pëkunata shumaq atiendir cuidayarqan, tsënö cuidayanqampitam pëkunata alläpa agradecikuyä (1 Tim. 5:4). Peru tsënö kaptimpis karuchö karmi papänïkunata yanapëta mana puëdir llakikuyaq kayä.

Annmi kënö willakun: 1983 watachömi cölera qeshyawan qeshyarirqä, tsë watapaqqa Zaire nacionllachöraqmi këkäyarqä. Qeshyä alläpa grävi kaptinmi doctorkunaqa niyämarqan juk läduchö atiendikunäpaq ëwakuyäna mas alli kanqanta. Tsëmi waräninqa cargakunata apayanqan avionllachö Suecia nacionpa ëwakuyarqä.

Matsmi kënö willakun: Doctorkunaqa warmï manana alliyänampaq kaqtam niyämarqan, peru alliyärirqanmi. Tsënö kaptimpis “kananqa misionëru këtapis dejarishunchi” nirmi alläpa llakikur waqayarqä. Peru watanninllam Zaire nacionman kutiriyarqä suajili nishqan idiömata parlayanqan congregacionchö yanapakuyänäpaq.

Annmi kënö willakun: Lubumbäshi markachö yanapakuykäyaptïmi qeshyaq tikrarirqä, peru llullütam perdirirqä. Qallananllachö wamrayoq këta mana munashqa karpis, alläpa llakikurmi imanö këtapis puëdirqätsu. Tsënö llakishqa këkäyaptïmi Jehovä yanapayämarqan. Unëpitapis masmi mëtsikaqta Bibliapita yachatsir qallëkuyarqä, tsëmi congregacionchöpis cäsi juk watallachö 35 Testïgukunapita setentamanna chäriyarqä. Y reunionkunachöpis cuarentallam juntakäyaq kayä, peru tsëpitaqa doscientus veintinam. Jehovä bendicikäyämanqanta musyarmi alläpa kushikurqä, awmi nunakunata yachatsirmi ocupädu kayarqä. Peru höra höraqa llullükunapaqmi yarpäriyä, tsëmi alläpa munëkuyä Jehovä kawaritsimunan höra chämunantana.

Matsmi kënö willakun: Tsëpita tiempuwannam warmï Annqa illaqpita shütëta puëdirqantsu y tsëwanmi sufrir qallëkurqan, tsëllamannam noqatapis cancer de colon kapamanqanta willarayämarqan y alläpa grävi kaptinmi operayämarqan. Peru kananqa mas allinam këkä y warmï Annpis llapan puëdinqanmannömi yanapakur sïguikan.

Awmi wakin wawqi panikunapis imëka mana allikunapam pasayarqan. 1994 watachömi Ruanda nacionchö chikinakur wanutsinakur qallëkuyarqan, tsëmi carpakunaman qeshpir ëwakoq wawqi panikunata visitaq ëwayarqä. Imëkapa pasëkarpis Jehoväman confiakuyanqanta y alläpa alli kayanqanta rikarmi cuentata qokuriyarqä Jehoväqa imëkapa pasayaptimpis sirweqninkunataqa mana dejanqanta (Sal. 55:22).

Annmi kënö willakun: 2007 watachöpis juk desgraciam pasayämarqan, juk kutim Uganda nacionchö Betel wayita rurar ushariyaptin discursuta rurayanqanman wiyakoq ëwayarqä. Tsë discursu ushariptinmi 25 misionërukunawan y betelïtakunawan Nairöbi markaman ëwëkäyarqä. Y Kenia nacionpa frontëranman chëkäyaptïmi illaqpita puntäkunapa yurirkamur juk camion chokëkayämarqan. Tsë accidentichömi pitsqa wawqikuna y choferpis wanuyarqan, juk panitapis grävitam hospitalman apakuyarqan, pëpis tsë tardillam wanurqan. Alläpam llakiyä amïgükunata y kawariyämunantanam munëkuyä (Job 14:13-15).

Heridäkunapis sänuyärirqanmi. Peru wakinkunanöllam noqawan nunäpis höra höraqa tsëta yarpakurkur qeshyakurkuyä. Noqaqa cada paqas atäqui tsarimaptinmi “shonqünachi pärakärinqa” nirnin mantsakar rikchaq o riyaq kä. Tsë hörakunam Jehoväman seguïdu mañakuyaq kayä, gustayämaq textukunata leyikuyaq kayä y tsëkunaman pensayaq kayä. Tsëkunata rurayanqämi yanapayämarqan y doctorkunapis alläpam yanapayämarqan. Kananqa ichikllapis alliyäyarqönam y Jehovätam rogakuyä noqakunanölla pasëkaqkunatapis yanapëkunampaq.

Wallpapa ‘ruruntanömi o runtuntanömi’ Jehovä cuidayämashqa nirqa, ¿ima nitataq munëkäyan?

Matsmi kënö willakun: Suajili idiömachömi kënö nir parlakuyan “Tumebebwa kama mayai mabichi”, tsë palabrakunaqa, “rurutanömi o runtutanömi apayämashqa” ninanshi. Imanömi ruruta o runtuta mana pakinampaq shumaqlla apayan, tsënöllam Jehoväqa noqakunatapis imëkakunapita shumaq cuidayämashqa. Yanapakuyanqä witsanqa manam imäkunapis faltarqantsu y höranäqa wanayanqäpitapis masmi kaq. Jehoväqa kuyakoq karmi Testïgukunata dirigeqkunata utilizashqa shumaq cuidayämänampaq y yanapayämänampaq.

Annmi kënö willakun: Awmi, Mats ninqannöllam Jehoväqa shumaq cuidayämashqa. Juk kutim willarayämarqan papänï hospitalchö grävi këkanqanta y qowä o runä Matspis tsëllaraqmi malaria qeshyapita alliyëkarqan. Suecia nacionta papänïta yanapaq ëwëta munayaptïpis manam qellënïkuna karqantsu, tsëmi cärrükunata rantikuyta munayarqä, peru rantikuyänäpaqna këkäyaptïmi juk turiwan warmin qayayämarqan y “juknikikunallapaqpis pasäjita pagakayämushaq” niyämarqan. Y manam tsëllatsu juk edäna nanapis churakunqan qellëta qarayämänampaqmi qayayämarqan. Awmi Jehoväqa jinan höram yanapayämarqan (Heb. 13:6).

50 watakunanam llapan tiempunkunawan Jehoväta sirwikäyan, ¿imatataq cuentata qokuyashqa?

Annmi kënö willakun: Isaïas 30:15 ninqannöpis cuentatam qokurqö tranquïlu kar y Jehoväman confiakurqa kallpayoqmi tikrantsik. Pëman confiakushqaqa yanapamäshunmi (2 Crön. 20:15, 17). Llapan kallpäkunawan Jehoväta sirwishqa karmi atska bendicionkunata chaskiyarqö.

Matsmi kënö willakun: Noqaqa cuentatam qokurqö imëkapa pasarpis Jehoväman confiakuptïqa, pëqa yanapamanqam (Sal. 37:5). Pëqa änikunqannöllam imëpis yanapëkäyämashqa. Tsënöllam kë Myanmar Betelchöpis yanapëkäyäman.

Jehoväta maslla sirwiyänëkipaq kallpachakuykaq jövin wawqi panilläkuna, noqakunatanölla Jehovä yanapëkuyäshuy. Pëta sirwiyänëkipaq kallpachakuyaptikiqa juk läduman plantata yapë plantayaptin shumaq wëtanampaq yanapaqnömi Jehoväqa qamkunatapis yanapayäshunki.