“Creikïnikikunachö mas firmi tsarakïtam wanayanki”

ANDRËAa Jehoväpa testïgun tikrariptinmi, qowanqa alläpa piñakurqan. Diospita Yachatsikuyänan Wayiman ëwananta y Diospa jutinta parlanantam paqwë michärirqan. Jehoväpa jutinta parlaqta wiyarqa alläpam piñakoq.

Jina wamrankunata Jehoväpita yachatsinanta y reunionkunaman apanantapis micharqanmi. Tsëqa Andrëapaq alläpa sasam karqan, porqui wamrankunataqa pakëllapanam Diospita yachatsinan karqan.

¿Imëllaqa tsënö qamtapis pasashurqunkiku? Itsa Jehoväpa testïgun kanëkita familiëkichö michäkuyan. O itsa atska watapana qeshyëkanki, o wamrëki, qowëki o warmiki kar wanushqa. O itsa mëqan familiëkillapis Jehoväpa testïgunnatsu. Tsë cäsukunachöqa, ¿imataraq rurankiman Jehoväta mana jaqipa sirwir sïguinëkipaq?

Apostol Pablum nirqan: “Creikïnikikunachö mas firmi tsarakïtam wanayanki” (Hebrëus 10:36, NM). Tsëqa, ¿imataq yanapamäshun creikïnintsikchö firmi tsarakunapaq?

JEHOVÄTA MAÑAKÏ YANAPASHUNËKIPAQ

Problëmakunapa pasëkarninqa, alleq tsarakunëkipaq Jehoväta mañakï. Tsënömi Äna jutiyoq panipis rurarqan qowan illaqpita wanuriptin. 30 watapanam casädu kayarqan. Pëmi nin: “Manam trabäjumpita kutimurqannatsu, 52 watayoqllaraqmi karqan”.

Änaqa trabäjuchömi ocupädu këta tïrarqan, peru tsëqa manam llakikïninta qonqanampaq yanaparqantsu. ¿Imatataq rurarqan? Pëmi nin: “Imanö sientikunqätam Jehoväta willaq kä y yanapamänampaqmi rogakoq kä”. Pëqa segürum këkan Jehovä yanapanqanta, porqui mañakurirqa tranquïlunam sientikureq. Y qowanta Jehovä kawaritsimunampaq kaqta musyanqanmi alläpa shoqaq (Filipensis 4:6, 7).

Jehoväqa sirweqninkunatam änin mañakïninkunata imëpis wiyanampaq (Salmu 65:2). Jina sirwir sïguiyänampaqmi llapan wanayanqanta qon. Tsëmi imëka problëmapa pasarpis firmi tsarakunëkipaq Jehoväqa yanapashïnikita puëdin.

CRISTIÄNU MAYIKIKUNAWAN IMËPIS JUNTU KË

Jina cristiänu mayintsikkunawanmi Jehoväqa yanapamantsik firmi tsarakunapaq. Yarpärishun Tesalönica markachö unë cristiänukunata pasanqanta. Pëkunaqa feyupa qatikachashqa karmi firmi tsarakuyänan karqan, tsëmi juknin juknin animanakuyänan y yanapanakuyänan precisarqan (1 Tesalonicensis 2:14; 5:11). ¿Imanötaq tsëta rurayarqan? Reunionkunachö ëllukarnin y amïgunö yanapanakurnin. ¿Imanötaq pëkunanölla noqantsikpis rurashwan?

Congregacionchöqa alli amïgukunatam ruranantsik y juknintsik juknintsikmi animanakunantsik. Tsë rurëqa masran precisan problëmakunapa pasashqa (Romänus 14:19). Apostol Pabluqa qatikachashqa kar y juk problëmakunapa pasarmi alli tsarakunan karqan. Peru cristiänu mayinkunawan Jehovä yanapanqantam nirqan (Colosensis 4:10, 11). Tsënömi rikätsikuyarqan Pabluta kuyayanqanta. ¿Imëllapis congregacionchö cristiänu mayikikuna animayäshunëkipaq imallatapis rurayanqanta o niyäshunqëkita yarpankiku?

ANCIÄNUKUNAPA YANAPAKÏNINTA ASHI

Juknöpaqa Jehovä yanapamantsik anciänukunawanmi. Pëkunaqa utilizäyan Bibliatam animamänapaq y consejamänapaq. Pëkunapaqmi Bibliaqa kënö nin: “Cada ünum sinchi vientupita tsapämaqnintsik kayanqa, sinchi tamyapita tsapämaqnintsik, tsaki markachö mayu yakunö, achachaq sitiuchö tsapäkoq machënö” (Isaïas 32:2). ¿Manaku tsënö anciänukuna kayanqampita kushikuntsik? Tsëmi problëmantsikkuna kaptinqa pëkunawan parlashun. Y pëkunam Jehoväta sirwir sïguinapaq yanapamäshun.

Anciänukunapis jutsasapam kayan (Hëchus 14:15). Tsëmi llapan problëmantsikkunataqa altsamïta puëdiyanqatsu. Peru noqantsikwan mañakïtaqa puëdiyanmi y tsëqa allim sientikatsimäshun (Santiägu 5:14, 15). Italia nacionchö juk wawqim atska watapana qeshyan, peru allim tsarakïkan. ¿Imataq yanapan? Pëqa nin cristiänu mayinkuna watukayanqan y kuyëpa tratayanqanrëkur kanqantam. Tsëmi, problëmantsikkuna kaptinqa, Jehovä nimantsik anciänukunapa yanapakïninta ashinapaq.

JEHOVÄTA SIRWINQËKITA PRECISAQPAQ CHURË

Problëmakunapa pasëkarpis Jehoväpa kaqta precisaqpaq churashqaqa pëqa yanapamäshunmi. Tsëmi pasarqan John jutiyoq wawqita. 39 watayoq këkaptinmi canceryoq kanqanta musyariyarqan. Jövinllaraq këkar qeshyëkanqanqa alläpam llakitsirqan. Warmimpaq y kima watayoqllaraq wamrampaqmi yarpachakoq. Pëmi nin: “Warmïqa manam wamrällatanatsu atiendinan karqan, sinöqa noqatawannam. Y cancerpaq tratamientukunaqa utishqatam sientitsimaq y melanätsimaqmi. Manam tsëllatsu, warmïqa musyarirqan papänin alläpa qeshyarnin cuidayänanta wananqantam”.

¿Imataq yanaparqan Johnta y familianta? Utishqalla sientikurpis, llapankuna Jehoväta sirwir sïguiyänampaqmi pëqa kallpachakurqan. Y kënömi nin: “Höraqa sasam karqan, peru imëpis reunionkunam y yachatsikoqqa ëwayarqämi y Familiachö Diosta Adorana Höratapis rurayaqmi kayä”. Johnqa yachakurqan Dioswan amïgu këninta sinchiyätsinan precisanqantam. Qallananchö mantsakashqa karpis, Jehovä yanapanqanta y wananqan kallpata qonqantam sientirqan. Jina pëta kallpata qonqannölla wakin sirweqninkunatapis Jehovä yanapanampaq kaqtam nin. Qamtapis yarpachakïnikichö y mantsapakïnikichö Jehoväqa yanapashïnikita puëdinmi.

Problëmakunapa pasarqa, yarpë apostol Pablu kënö ninqanta: “Creikïnikikunachö mas firmi tsarakïtam wanayanki”. Tsëmi Jehoväta mañakï, cristiänu mayikikunawan imëpis juntu kë, anciänukunapa yanapakïninkunata ashi y Jehoväta sirwinqëkita precisaqpaq churë. Tsëqa kanan o shamoq tiempuchö ima problëmapa pasaptikipis Jehovämi yanapashunki.