Teyta Diosqa ¿më tsëchöku këkan?
Bibliachö yachakunqantsik
Teyta Diosqa llapantam rikëkan, y imëkatam rurëta puëdin (Proverbius 15:3; Hebrëus 4:13). Tsënö kaptimpis, Bibliachöqa manam më tsëchö këkanqantatsu ni llapanchö këkanqantatsu yachatsikun. Tsëpa rantinqa, ciëluchö täkunqantam nimantsik.
¿Imanötan Teyta Diosqa? Teyta Diosqa juk espïritum (Juan 4:24). Tsëmi pï nunapis rikashqatsu (Juan 1:18). Bibliachöqa nin ciëluchö këkanqantam, y manam më tsëchö këkanqantatsu (Isaïas 6:1, 2; Revelacion [Apocalipsis] 4:2, 3, 8).
¿Mëchötan täkun? Teyta Diosqa ciëluchömi täkun, y manam më tsëchötsu ni Patsachötsu. Tsëmi Bibliachöqa nin, ‘ciëluchö täranqanta’ (1 Rëyes 8:30). Y Bibliachöqa kënöpis ninmi: “Teyta Diospa nöpanman[mi] angelkuna chäyarqan” (Job 1:6, Teyta Diospa Willakïnin [TDW]). Tsëmi rikätsimantsik, Teyta Jehoväqaa ciëluchö täkunqanta.
Teyta Dios më tsëchö mana këkarqa, ¿yanapamënintsikta puëdintsuraq?
Teyta Diosqa ciëluchö tärarpis llapantsikpaqmi yarpachakun. Y Patsachö llapan shonqunkunawan sirweqkunataqa yanapanmi (1 Rëyes 8:39; 2 Crönicas 16:9). Teyta Dios noqantsikpaq yarpachakunqantaqa, këkunachömi rikantsik:
Mañakunqantsik höra: Teyta Diosqa llakikuykunapa pasashqa mañakuynintsikta wiyan y yanapamantsikmi (2 Crönicas 18:31).
Alläpa llakikunqantsik höra: “Jutsankunapita llakikuqkunataqa TEYTA DIOS ankupanmi. Ima rurëtapis mana puëdiqkunata yanapanmi” (Salmus 34:18, [TDW]).
Shumaq yachatsimanqantsik höra: Teyta Diosqa Palabran Bibliawanmi alli kawakunapaq yachatsimantsik (Salmus 32:8).
Teyta Dios më tsëchö këkanqanta niyan
Ima niyanqan: Diosqa llapan kamanqankunachömi këkan.
Rasumpa kaq: Teyta Diosqa manam Patsachö ni ima kamanqanchötsu täran (1 Rëyes 8:27). Qoyllurkuna y llapan kamanqankunaqa, Teyta Dios ‘poderyuq kashqantam’ Bibliachöqa rikätsikun (Salmus 19:1). Juk pintaq nunaqa, manam pintanqan cuadruchötsu täran. Peru tsë ruranqan cuadruqa, tsë nuna imanö kanqantam rikätsikun. Tsënöllam Jehoväpa poderninta, yachaq këninta y kuyakoq kanqantaqa kamanqankunachö rikantsik (Romänus 1:20).
Ima niyanqan: Llapanta Puëdeq karqa, Teyta Diosqa më tsëchöchi këkanman.
Rasumpa kaq: Teyta Diosqa imakuna pasanqantam musyan, y kallpanwanmi imëkatapis rurëta puëdin. Tsëmi imatapis musyanampaqqa, më tsëchöraqtsu këkänan (Salmus 139:7).
Ima niyanqan: Salmus 139:8 (TDW) ninqanmi rikätsikun llapan läduchö këkanqanta. “Qoyllurkuna kaqman ëwaptïpis tsëchömi këkanki. Patsa ruriman ratakuptïpis tsëchömi këkanki”.
Rasumpa kaq: Salmus 139:8-chöqa manam Teyta Dios më tsëchö këkanqantatsu rikätsikun, sinöqa mëchö këkashqapis yanapamanqantsiktam.
a Teyta Diospa jutin Jehovä kanqantam Bibliachöqa nimantsik.