“Wanushqakunata kawaritseq y kawëta qokoq”

Jesusqa Perëapitam Betaniaman chëkarqanna, tsë markaqa Jerusalenpita kima kilömetruchönömi këkarqan. Läzaru wanurinqampitaqa juk ishkë junaqkunanönam pasarishqa karqan, peru Marïawan Martaqa waqëkäyarqanllaran. Mëtsikaqmi shoqaqnin ëwashqa kayarqan.

Tsënam, Jesus chëkanqanta Martata willariyarqan, tsëmi pëqa Jesusta taripaq ëqipa ëwarqan. Jesus këkanqanman chärirnam, Martaqa itsa nananwan pensayanqanta kënö nirqan: “Teytë, këchö kaptikiqa manam turï wanunmantsu karqan”. Tsënö nirqa manam shamoq tiempuchö wanushqakuna kawariyämunan kaqman mana markäkunqantatsu rikätsikïkarqan, kënömi nirqan: “Alleqmi musyä Diosta imatapis mañakuptikiqa, Diosqa wiyashunëkipaq kaqta” (Juan 11:21, 22). Martaqa segürum këkarqan turinta Jesus kawaritsita puëdinqantaqa.

Tsëpitanam Jesusqa, “turikiqa sharkamunqam” nirqan. Martaqa, shamoq tiempuchö wanushqakuna kawariyämunampaq kaqpaq parlëkanqantam pensarqan, tsëmanqa Abrahan y Diospa unë witsan sirweqninkunapis markäkuyaqmi. Tsëmi kënö nirqan: “Noqaqa musyämi ushanan junaqchö wanushqakuna kawariyämuptin sharkamunampaq kaqta” (Juan 11:23, 24).

¿Imatataq Jesus rurarqan? Wanïta vencinampaq Dios poderta qoshqanta yarpätsirmi, Martata kënö nirqan: “Noqaman markäkunqanta rikätsikoq kaqqa, wanurnimpis kawarimunqam; y kawëkaq kaqkuna y noqaman markäkoq kaqkunaqa manam ni imëpis wanuyanqatsu” (Juan 11:25, 26).

Jesusqa manam qateqninkuna imëpis mana wanuyänampaq kaqtatsu nikarqan. Apostolninkunata ninqannömi pëpis wanunan karqan (Mateu 16:21; 17:22, 23). Pëman markäkoqkunaqa imëyaqpis kawëyoq kayänampaq kaqtam nirqan. Mëtsikaqmi kawariramurnin tsë kawëta chaskiyanqa. Y itsachi ushakë junaqchö Diospa sirweqninkuna kawëkaq kaqkunaqa manana wanuyanqanatsu. Imanö kaptimpis, Jesusman llapan markäkoqkunaqa segürum kayan wanurpis yapë kawariyämunampaq kaqta.

Peru “wanushqakunata kawaritseq y kawëta qokoq” kanqanta nikarqa, ¿puëdirqantsuraq chusku junaqna wanushqa këkaq Läzaruta kawaritsita? Martatam kënö tapurqan: “¿Qamqa tsëta creinkiku?”. Pënam, “awmi Teytë, noqaqa creirqömi qamqa nunakunaman shamoqpaq kaq Diospa Tsurin Cristu kanqëkita” nirqan. Martaqa segürum këkarqan turinta Jesus kawaritsita puëdinqanta. Tsëmi wayinta jinan höra ëwarqan y nananta pakallapa kënö nirqan: “Maestrum këchö këkan, y qayashunkim” (Juan 11:25-28). Tsënam Marïaqa jinan höra ëwarqan y wayichö këkaqkunanam Läzaru pamparëkaqman ëwanqanta pensar mëtsikaq qepanta ëwayarqan.

Peru Marïaqa Jesus kaqtam ëwarqan, y chakin kaqman qonqurikïkurmi waqallapa nanan ninqannölla kënö nirqan: “Teytë, këchö kaptikiqa manam turï wanunmantsu karqan”. Marïata y qepanta ëwaq mëtsika nunakuna waqëkäyaqta rikëkurmi, Jesusqa shonqunchö alläpa nanatsikurqan y waqarirqan. Tsëta rikëkurmi mëtsikaq espantakuyarqan. Peru wakinqa kënömi tapunakuyarqan: “¿Manatsuraq kë nunaqa wiskupa nawintapis kachakëkätsirqa wanunanta michëta puëdinman karqan?” (Juan 11:32, 37).