Jesusqa Läzarutam kawaritsirqan

Jesuspa kimaq o kimsaq kuyë amïgunkunam Betania markachö täräyaq. Jutinkunaqa karqan Läzaru, Marïa y Martam, kimanmi pani turi kayarqan. Juk kutim Jordan mayupa tsimpanchö Jesus këkaptin juk nuna chärir kënö nirqan: “Läzarum alläpa qeshyëkan. Jinan hörash ëwëkullanki”. Jesusqa manam jinan höratsu ëwarqan. Ishkë junaq pasariptinmi qateqninkunata kënö nirqan: “Aku Betaniata. Amïguntsik Läzarum punukärishqa, peru riyatsinäpaqmi o rikchatsinäpaqmi pë këkanqanman ëwëta munä”. Tsënam qateqninkunaqa niyarqan, “Teytë, punuykarqa alliyärinqachi”. Tsëmi Jesusqa pëkunata cläru nirqan, “Läzaruqa wanushqam”.

Jesusqa chusku junaqna Läzaru pamparëkaptinmi Betaniaman chärirqan. Y mëtsikaq nunakunam Martata y Marïata shoqaq ëwashqa kayänaq. Tsënam Martaqa Jesus chärishqa kanqanta wiyarir, jinan höra taripaq ëwarqan. Y tinkurirmi kënö nirqan: “Teytë, këchö kaptikiqa manachi turï wanunmantsu karqan”. Peru Jesusqa kënömi nirqan: “Turikiqa kawarimunqam. ¿Qam tsëta creinkiku?”. Tsënam Martaqa kënö nirqan: “Musyämi wanushqakuna kawariyämuptin ushanan kaq junaqchö sharkamunampaq kaqta”. Y Jesusnam kënö nirqan: “Noqam wanushqakunata kawaritseq y nunakunata kawëkaqta katseq kä”.

Tsëpitam Martaqa Marïa këkanqanman ëwarir kënö nirqan: “Jesusmi këchöna këkan”. Tsënam Marïaqa cörrillapa Jesusta taripaq ëwarqan, y nunakunapis qepantam ëwayarqan. Y Jesus këkanqanman chärirmi chakin kaqman qonqurikuykur alläpa waqar, kënö nirqan: “Teytë, këchö kaptikiqa, manachi turï wanunmantsu karqan”. Tsëmi alläpa waqaqta rikar Jesuspis waqar qallëkurqan. Tsëta rikëkurnam nunakunaqa, “rikäyë, ¡imanömi Läzaruta kuyashqa!” niyarqan. Peru wakinqa kënömi niyarqan: “¿Manatsuraq Läzaru mana wanunampaq imallatapis ruranman karqan?”. ¿Y imatataq Jesusqa rurarqan?

Jesusqa Läzarupa ayanta churayanqan machëmanmi ëwarqan. Y chärirmi, “tsaparaq rumita wititsiyë” nirqan. Tsëmi Martaqa kënö nirqan: “Teytë, chusku junaqnam pasashqa, kananyaqqa alläpanachi asyan”. Tsënö niptimpis tsaparaq rumitaqa wititsiyarqanmi. Tsënam Jesusqa Jehoväman kënö mañakurqan: “Teytallä, wiyamanqëkipitam alläpa agradecikoq. Noqaqa musyämi imëpis wiyamanqëkita, peru läduchö këkaq mëtsika nunakuna qam mandamanqëkita creiyänampaqmi mañakëkämü”. Tsëpitam fuerti kënö nirqan: “¡Läzaru, yarqamuy!”. Y mana creipaqmi karqan, Läzaruqa ratashkunawan wankushqam yarqaramurqan. Tsënam Jesusqa, “purita puëdinampaq ratashninkunata paskariyë” nirqan.

Tsëta rikarmi mëtsikaq nunakuna Jesusman creikur qallëkuyarqan, peru wakinqa fariseukunata willaqmi ëwayarqan. Tsë junaqpitam fariseukunaqa Läzarutawan Jesusta wanutsiyänampaq yachatsinakuyarqan. Tsëmi Jesuspa apostolnin Jüdas Iscariöti pakëllapa ëwëkur fariseukunata kënö tapurqan: “¿Ëkatataq pagayämankiman Jesusta prësuyänëkipaq yanapayapteq?”. Tsënam pëkunaqa 30 yuraq pläta qellëta äniyarqan. Tsë junaqpitam Jüdasqa Jesusta traicionanampaq imë mas alli kanampaq kaqta pensarqan.