Josëqa Diosta cäsukoq esclävum karqan

Josëqa Jacobpa juk menor kaq tsurinmi karqan. Wawqinkunam cuentata qokuriyarqan papäninkunaqa pëta mas kuyanqanta, tsëta rikarchi wawqinkunaqa capaz chikipar qallëkuyarqan. Juk kutim, suëñunqanta wawqinkunata cuentarqan, tsënam wawqinkunaqa Josë sueñunqannö imë karpis puntanman qonqurikuyänampaq kaqta pensarnin mas chikipar qallëkuyarqan.

Juk kutim Siquem markapa amänunchö Josëpa wawqinkuna üshata mitsikäyarqan. Tsëmi Jacobqa Josëta mandarqan wawqinkunata rikaq ëwanampaq, y pëkuna kaqman ëwëkaqta rikëkurmi wawqinkunaqa kënö parlayarqan: “¡Rikäyë! Suëñunqanta willakur pureqmi taqëta shamuykan. Wanuykatsir pözuman jitarkushun”. Y llapankuna tsarirkurmi juk pözuman jitarkuyarqan, peru wawqin Judäqa kënömi nirqan: “Imatataq tarishun wawqintsikta wanuratsir. Mejorqa esclävu kanampaq rantikuykushun”. Tsëmi Egiptuman ëwëkaq Madianpita negociantikunata veinti yuraq pläta qellëpaq rantikuyarqan.

Nïkurqa juk chïvuta pishtëkurmi Josëpa largu röpanta yawarwan pichuyarqan y papäninkunaman chärirmi kënö niyarqan: “Mä rikärillë, ¿tsurikipa largu röpanku?”. Jacobqa pensarqan juk chukaru animal Josëta mikushqa kanqantam, tsëmi alläpa llakikur waqarqan. Y manam pipis shoqëta puëdirqantsu.

Josëta Egiptuman chäratsiyaptinqa Potifar jutiyoq guardiam esclävun kanampaq rantirqan. Peru Jehoväqa manam Josëta dejarqantsu. Josë alli trabajaq kanqanta y confiakuypaq kanqantam Potifarqa rikarqan, tsëmi Potifarqa wayinchö encargädu kanampaq Josëta churarqan.

Josëqa fuerti y shumaq jövinmi tikrarqan, tsëmi patronnin Potifarpa warminqa Josëta rikapar qallëkurqan y kutin kutinmi, “shamuy punukuykushun” nipaq. ¿Y imatataq Josëqa rurarqan? Manam munaqtsu, y kënömi neq: “Manam, manam tsëqa allitsu. Patronnïqa confiakamarmi llapan kapunqanta cargüman churamushqa, peru qamtaqa manam, warmin kaptiki. Tsëqa, ¿imanöraq Teyta Diosta llakitsir tsëläya jutsata rurëküman?”.

Juk kutim Potifarpa warminqa Josëwan punukuykuyta munar röpampita tsarikurkurqan, peru Josëqa qeshpirmi ëwakurqan. Potifar wayinman chäriptinmi warminqa mana kaqpita Josëta acusar violëta munashqa kanqanta nirqan. Tsënam Potifarqa alläpa cölerakur carcelatsirqan. Peru Jehoväqa manam Josëta dejarqantsu.