Josëta wawqinkuna chikiyan

¡RIKË kë jöventa, imanö llakishqam y sin esperanzam këkan! José ninmi shutinta. Egiptoman ëwaq nunakunatash wawqinkuna rantikuriyashqa. Tsëchöshi José sirviente kanqa. ¿Imanir-raq wawqinkuna kë mana allita rurayashqa? Këtaqa rurayashqa Josëta chikirshi.

Josëtaqa pëkunapa papänin Jacob alläpash kuyanaq. Tsëshi huk shumaq röpan rurapushqa kanaq. Tsënö Josëta papänin Jacob alläpa kuyaqta rikarshi, 10 punta mayor wawqinkuna más chikikurkuyänaq. Hina kanaqshi huk razón más chikiyänampaq.

Ishkë suëñïninshi kanaq Josëpa. Tsë ishkan suëñïninchöshi pëman wawqinkuna qonqurikuyänaq. Kë suëñïninkunata wawqinkunata willëkuptinshi masraq chikikurkuyänaq.

Huk kutish, Jacob kachanaq Josëta üshankuna mitsikaq mayor wawqinkuna imanöpis këkäyanqanta rikämunampaq. Tsënash wakin wawqinkunaqa, ‘¡wanïkatsishun!,’ niyan José yëkurëkaqta rikarnin. Pero ‘¡ama tsëtaqa rurayëtsu!,’ ninshi mayor wawqin Rubén, tsëpa rantinqa tsaki pözomanshi hitarkuyänaq. Tsëpitanash imata Josëwan rurayänampaqpis llapan ëllukärir parlayänaq.

Tsë tiemposh ismaelïtakuna shayämunaq. Tsënash, ‘ismaelïtakunata rantikïkushun,’ ninaq Judá wawqinkunata. ¡Y tsënöshi rurayänaq, 20 piezas de plata nishqanllachöshi Josëta rantikïkuyänaq! ¡Imanö mana ankupäkoq y mana allim karqan kë llapan!

¿Kë llapan Josëpa wawqinkuna imaraq niyanqa papäninta? Y huk cabrata wanuratsirshi tsë shumaq Josëpa röpanta atska kuti yakayänaq tsë yawarninman. Tsëpitanash papänin Jacobman apayänaq Josëpa röpanta: ‘Këtam tariyämorqö. Mä rikärïki Josëpakush,’ nishpa.

Tsë Josëpa röpan kanqantash reqirinaq Jacob. ‘Josëtaqa huk chukaru animalchi wanïkatsishqa kanqa,’ nishpash waqanaq. Y tsënö papänin creinantash munayänaq Josëpa wawqinkunaqa. Alläpash llakïkunaq Jacobqa. Atska hunaqshi waqanaq. Pero manash Josëqa wanushqatsu. Mä imash pasan Josëta apayanqanchö, tsëtam rikärishun.