Jehoväqa Josëta manam dejarqantsu

Egiptuchö gobernaq faraon suëñunqantam pipis entiendita puëdirqantsu, y tsë tiempuqa Josëqa carcelchömi këkarqan. Tsëmi faraonta juk sirweqnin willarqan, suëñunqan imapaq kanqanta Josë willëta puëdinqanta. Tsëmi faraonqa Josëta pëman apayänampaq mandakurqan.

Faraonqa Josëta kënömi tapurqan: “¿Suëñunqä imapaq kanqanta nimëta puëdinkiku?”. Tsënam Josëqa kënö nirqan: “Qanchis watapam entëru Egiptuchö mikuy mëtsika kanqa, y tsëpitam qanchis watapa Egiptuchö alläpa mallaqë kanqa. Tsëmi alli yachaq y alli juiciuyoq nunata akranëki mikuykunata shumaq guardanampaq, tsënöpa mallaqëpita nunakuna mana wanuyänampaq”. Faraonnam kënö nirqan: “¡Noqaqa qamtam akraq! Y llapan nunakunam qamta cäsuyäshunki. Noqallam qampita mas autoridäyoqqa kashaq”. Peru, ¿imanirtan Josëqa musyarqan faraonpa suëñun imapaq kanqanta? Jehovä yanapashqa kaptinmi.

Josëqa qanchis watam mëtsika mikuykunata juntarqan, y tsëpitaqa pë willakunqannöllam më tsëchö alläpa mallaqë karqan, y nunakunaqa më tsëpitam mikuyta ranteq chäyarqan. Papänin Jacobpis Egiptuchö mikuy kanqanta musyarirmi chunka wamrankunata mandarqan.

Jacobpa wamrankunaqa Josëmanmi chäriyarqan, peru Josë tsëchö encargädu kanqantaqa manam musyayarqantsu. Y jövin këkar Josë suëñunqannöllam puntanman qonqurikuyarqan. Peru Josëtaqa, ¿wawqinkuna chikipëkäyarqanllaratsuraq? Tsëta musyanampaqmi Josëqa kënö nirqan: “¡Qamkunaqa musyapakoqkunam kayanki! ¡Kë nacionman yëkayämunëkipaqmi rikapakoq shayämurqunki!”. Tsënam kënö niyarqan: “¡Teytallë, noqalläkunaqa gränu mikuy ranteqllam shayämurqö! Noqakunaqa döci wawqim kayä, Canaanchömi papänïkunawan täkuyä. Ultimu kaq wawqïkunaqa papänïkunawanmi quedakamushqa, y juk wawqïkunaqa wanukushqanam”. Tsënam Josëqa, “niyämanqëkita creinapaqqa ultimu kaq wawqikikunataraq pushayämuy” nirqan, tsëmi pëkunaqa wayinkunata kutikuyarqan.

Familiampaq mikuy yapë faltaptinmi, Jacobqa wamrankunata yapë Egiptuman mandarqan. Y tsë kutichöqa ultimu kaq wawqinkuna Benjaminta pusharkurnam ëwayarqan. Tsëmi Josëqa wawqinkunata probëta munar pläta metalpita rurashqa cöpanta Benjaminpa costalninman winarkurqan, nïkurmi “qamkunam suwapayämarqunki” nir wawqinkunata culparqan. Josëpa sirweqninkuna tsë cöpata Benjaminpa costalninchö taririyaptinqa, wawqinkunaqa pasëpam mantsakäyarqan. Tsëmi niyarqan, “ama Benjaminta castiguëkullëtsu, pëpa rantin noqakunata castigayäme”.

Tsëchömi Josëqa cuentata qokurqan wawqinkunaqa cambiashqana kayanqanta. Y aguantëta manana puëdirmi waqar qallëkur kënö nirqan: “Noqaqa Josëmi kä. ¿Papänïqa kawëkanraqku?”. Wawqinkunaqa mantsakashqam quedariyarqan, peru Josëqa kënömi nirqan: “Mana allita rurayämanqëkipita ama llakikuyëtsu ni culpanakuyëtsu. Teyta Diosnintsikmi permitishqa nunakuna mana wanuyänampaq këman chämunäta. Kananqa, jinan höra ëwar papänïta apayämuy”.

Josëpa wawqinkunaqa kushishqam kutikuyarqan, y tsë alli noticiatam papäninta willayarqan, y Egiptumanmi apakuyarqan. Josëqa unënam papäninta rikashqatsu karqan.