Pëdrum Jesusta negarqan

Jesusqa ultimu cënachömi apostolninkunata kënö nirqan: “Kanan paqasqa llapëkim dejarayämanki”. Tsënam Pëdruqa kënö nirqan: “Pasashunqëkita rikar llapankuna dejayäshuptikipis, ¡noqaqa manam imëpis dejashqëkitsu!”. Peru Jesusqa kënömi nirqan: “Kanan paqas gällu manaraq cantaptinmi, kima kuti negamanki”.

Jesusta Caifaspa wayinman soldädukuna apayanqan hörapaqqa, cäsi llapan apostolkunam qeshpir ëwakushqa kayarqan. Peru ishkë apostolkunaqa, tsë nunakunawan juntum ëwayarqan. Jukqa Pëdrum karqan. Pëqa Caifaspa wayimpa patiunmanmi yëkurqan, y qoñükur këkäyanqanmanmi witirqan. Y tsëchö këkaptinmi juk sirwipakoq warmi rikëkur kënö nirqan: “¡Qamtaqa reqeqmi! ¡Qampis Jesuswanmi pureq kanki!”.

Pëdrunam kënö nirqan: “Manam noqatsu kä. Pantëkankim”, y punku kaqpam ëwakurqan. Tsëchöpis juk sirwipakoq warmi rikärirmi, tsëchö këkaqkunata nirqan: “¡Kë nunapis Jesuswanmi pureq!”. Peru Pëdruqa, “¡manam tsë nunata reqïtsu!” nirmi negarqan. Rätunllatanam juk nunapis kënö nirqan: “Qampis pëkunawanmi pureq kanki, imanö parlanqëkipitam tsëta musyayä”. Y Pëdruqa kënömi nirqan: “¡Manam tsë nunata reqïtsu!”.

Tsë höram juk gällu cantarirqan. Y Pëdruqa Jesus rikarëkanqanta cuentata qokurirmi cenëkäyaptin ninqanta yarpärirqan. Y waqtaman yarqurirmi llakikur alläpa waqarqan.

Tsëyaqnam mandakoq sacerdötikuna y Judïukunapa Jatun Cortinchö llapan trabajaqkunaqa Jesusta juzgayänampaq juntakäyarqan. Pëkunaqa puntapitanam wanutsita munayarqan, tsëmi acusayänampaq imallatapis tarita munayarqan. Peru manam puëdiyarqantsu imapitapis acusëta. Tsënam Caifasqa kënö tapurqan: “¿Qamku Diospa Tsurin kanki?”. Y Jesusqa, “awmi” nirqanmi. Tsënam Caifasqa kënö nirqan: “¿Imapaqnatan mas testïgukunata wanantsik? ¡Rikäyë, wiyayarqunkim Diosta ofendinqanta!”. Y llapan juzgaqkunam kënö niyarqan: “Kë nunaqa wanunanmi o wañunanmi”. Nïkurmi laqyar, toqapur y nawinta tsaparkur maqar ushayarqan, y kënö nirmi burlakuyarqan: “¡Diospa willakoqnin karqa, pï laqyashunqëkita willayämë!”.

Patsa waräriptinqa Judïukunapa Jatun Cortinmanmi Jesusta apayarqan, y yapëmi, “¿qamku Diospa Tsurin kanki?” nir tapuyarqan. Tsënam Jesusqa, “awmi. Kikikikunapis tsëtataq nikäyanki” nirqan. Y pëkunaqa yapëmi, “¡Diostam ofendishqa!” nir acusayarqan. Tsëpitanam gobernador Ponciu Pilätupa wayinman apayarqan. Y tsëpita ima pasanqantaqa, qateqnin kaqchömi yachakushun.