Läzaruta Jesus kawaritsin

Jesusqa Betaniaman chëkarmi Martawan y Marïawan toparir, Läzaru pamparëkanqanman ëwayarqan, tsë sepultüraqa juk machëmi karqan, y punkuntaqa juk jatun rumim tsapararqan. Tsënam Jesusqa, “tsaparaq rumita jorqayë” nir mandakurqan. Imata rurëta munanqanta mana musyarmi, Martaqa kënö nirqan: “Teytë, kananyaqqa alläpanachi asyan, porqui chusku junaqnam pasarishqa”. Jesusnam, “¿manaku nirqaq creirqa Diospa chipapäkoq puëdeq këninta rikänëkipaq kaqta?” nir tapurqan (Juan 11:39, 40).

Rumita jorqariyaptinnam, ciëluta rikärir kënö mañakurqan: “Teytallä, wiyamanqëkipitam qamta alläpa agradecikoq. Awmi, noqaqa musyämi qamqa imëpis wiyamanqëkita; peru kë jiruroqchö shëkaq mëtsikaq nunakunarëkurmi parlarqö, qam kachamashqa kanqëkita creiyänampaq”. Nunakunapa rikëninchöqa mañakurqan, ruranampaq kaqqa Diospa poderninwan kanqanta rikätsikunampaqmi. Tsëpitanam, sinchipa kënö nirqan: “¡Läzaru, yarqamï!”. Y Läzaruqa, chakinkuna y makinkuna wankushqam yarqaramurqan, y qaqllanqa juk ratashwanmi wankushqa këkarqan. Jesusnam, “paskayë y purinanta jaqiyë” nirqan (Juan 11:41-44).

Marïatawan Martata shoqaq ëwaq nunakunaqa tsë milagruta rikäyarqanmi y Jesusmanmi markäkur qallëkuyarqan. Peru wakinqa, fariseukuna kaqtam ëwayarqan y Jesus ruranqantam willayarqan. Tsënam fariseukunawan precisaq sacerdötikunaqa, Judïukunapa Precisaq Cortinchö kaqkunawan ëllukäriyarqan. Tsëchöqa sacerdötikunapa mandaqnin Caifas nunapis këkarqanmi. Wakinkunam quejakur kënö niyarqan: “¿Imatataq rurashun? Porqui kë nunaqa imëka señalkunatam ruran. Tsënölla jaqirishqaqa, llapanmi pëman markäkur qallëkuyanqa, y Röma nunakunaqa shamïkurmi sitiuntsikta y nacionnintsikta qochiramäshun” (Juan 11:47, 48). Jesus ruranqankunata rikaq nunakuna willayashqa kayaptinmi, fariseukunaqa ‘imëka señalkunata’ Jesus ruranqanta musyayaq. Peru Jesuspa makinwan Dios rurëkanqampitaqa manam kushikuyarqantsu. Antis precisaq këninkunata y autoridäyoq këninkunatam oqrëta mantsayarqan.

Saduceukunaqa manam wanushqakuna kawariyämunampaq kaqman creiyaqtsu, tsëmi Läzaru kawarimunqantaqa creiyarqantsu. Saduceu sectapita Caifasmi kënö nirqan: “Qamkunaqa manam ni imatapis musyayankitsu, y manam cuentata qokuyankitsu entëru nacion ushakänampa rantinqa, llapan nunakunarëkur juk nunalla wanunan qamkunapaq mas alli kanqanta” (Juan 11:49, 50; Hëchus 5:17; 23:8).

Caifasqa manam kikimpa pensënimpitatsu tsënöqa nirqan, sinöqa sacerdötikunapa mandaqnin kaptinmi, Dios tsënö parlatsishqa karqan. Rasumpa kaqchöqa, autoridäyoq këninkunata y pushakoq religiösunö precisaq këninkunata mana oqrayänampaqmi, Jesusta wanutsiyänampaq nikarqan. Caifas tsënö ninqanqa rikätsikurqan, judïukunata y “Diospa ramakashqa këkaq tsurinkunata” wanurnin Jesus salvanampaq kaqtam (Juan 11:51, 52).

Cortichö kaqkuna Jesusta wanutsiyänampaq patsätsiyänantam Caifasqa lograrirqan. Peru tsë cortichö kaq Nicodëmu nunaqa Jesusta respetaqmi. ¿Pëqa willarqantsuraq cortichö kaqkuna tsëkunata patsëkätsiyanqanta? Imanö kaptimpis, Dios mana dispuninqan tiempuchö mana wanuratsiyänampaqmi Jesusqa Jerusalenpita ewkurqan.