14 KAQ YACHAKUNËKIPAQ
¿Imatataq ruranantsik Diosta alli adoranapaq?
Musyanqantsiknöpis, manam llapan religionkunachötsu Diosta alli adorayan o pë munanqannö sirwiyan. Tsënö kaptimpis, Diosnintsik munanqannö adorëtaqa puëdintsikmi. Këchömi yachakunki Diosnintsik imanö adoranata munanqanta y mëqan religionchö Diosta alli adorayanqanta (Santiägu 1:27; nöta).
1 KAQ: ¿Imatan yanapamäshun Diosnintsikta alli adoranapaq?
Diosnintsikta alli adoranapaqqa Palabran Bibliachö yachakunqantsikmi yanapamäshun. Tsëmi Diosnintsikman mañakurnin Jesus kënö nirqan: “Palabrëkim rasumpa kaqqa” (Juan 17:17). Wakin religionkunachöqa, Diospa Palabran Bibliachö ninqankunata yachatsikuyänampa rantinmi, nunakunapa costumbrinkunata o kikinkuna pensayanqanta yachatsikuyan. Tsëta rurayanqanqa Teytantsik Jehoväta manam gustantsu (leyi Marcus 7:9). Palabran Bibliachö ninqannö Teytantsik Jehoväta adorashqa y consëjunkunata cäsukushqaqa alläpam kushikun.
2 KAQ: ¿Imanö adoranatataq Jehoväqa munan?
Kamamaqnintsik kaptinmi Teytantsik Jehovällata adoranantsik (Apocalipsis 4:11). Jehoväqa munan llapan shonquntsikwan kuyanantsikta y adoranantsiktam. Pëqa manam munantsu santukunaman, imäginkunaman o juk cösaskunaman mañakunantsikta (leyi Isaïas 42:8).
Diosnintsikta alli adoranapaqqa llapanchömi alli portakoq y limpiu kanantsik (Romänus 12:1). Tsëpaqqa Jehovä mandakunqankunatam llapanta cäsukunantsik. Jehoväta kuyaqkunaqa, casakuyta munaqkunapaq y casädukunapaq Jehovä mandakunqankunatam cäsukuyan. Y manam drögata o cigärruta fumayantsu ni washkuta upyar machakuyantsu.a
3 KAQ: ¿Imanirtan cäsukoq nunakunawan juntu Jehoväta adoranantsik?
Reunionkunachöqa mëtsikaq nunakunawan juntum Jehoväta alabantsik (Salmus 111:1, 2). Jehoväpaqmi shumaq cancionkunata cantantsik (leyi Salmus 104:33). Jehoväqa kuyamarnintsik y reunionkuna yanapamanqantsikta musyarmi imëpis ëwanantsikpaq nimantsik. Reunionkunaman ëwarqa juknintsik juknintsikmi animanakuntsik, y tsënömi kushishqa kawakuntsik.
MASLLA YACHAKUSHUN
Jehoväta adorar santukunata mana utilizänapaq y Diosnintsik munanqannö sirwinapaqmi yachakushun.
4 KAQ: Diosnintsikta adoranapaqqa manam santukunata katsinantsiktsu
Santukunaman mañakuy imanir mana alli kanqanta VIDEUCHÖ rikäyë y këpaq parlayë:
¿Imatan israelïtakunata pasarqan örupita rurashqa becërruta adorayanqampita?
Wakinkunaqa pensayan Diosta adorayänampaq santukuna yanapanqantam. Peru, ¿Jehoväqa tsënö adorayänantaku munan? Leyiyë Exodu 20:4-6 y Salmus 106:35, 36 ima ninqanta y këkunapaq parlayë:
¿Imakunatataq nunakunaqa utilizäyan Diosman mañakurnin?
¿Imatataq Diosnintsik Jehovä nin santukunata rezapëpaq?
¿Ima ninkitan Diosta adorëta munar santukunata rezapäyanqampaq?
5 KAQ: Nunakunapa costumbrinkunata ruranantsikpa rantinqa Jehovätam adoranantsik
Jehovä munanqannö sirwinqantsikqa, mana alli costumbrikunata dejanapaqmi yanapamantsik. Tsëta VIDEUCHÖ rikäyë.
Leyiyë Salmus 91:14 ima ninqanta y këpaq parlayë:
¿Imatataq noqantsikpaq Jehovä ruramunqa pëllata kuyashqa y pëllata adorashqaqa?
6 KAQ: Reunionkunachömi Diosnintsikta adorantsik
Reunionkunachö cantar y yachakunqantsikkunata parlakurmi Jehoväta alabantsik y juknintsik juknintsik yanapanakuntsik. Leyiyë Salmus 22:22 ima ninqanta y këkunapaq parlayë:
¿Yachakuyanqanta reunion höra parlakuyanqanqa gustashunkiku?
¿Pëkunanö parlakuyta munankimantsuraq?
7 KAQ: Jehoväqa munan jukkunatapis yachatsinantsiktam
Bibliachöqa imëkatam yachakuntsik, y tsëtaqa jukkunatapis yachatsinantsikmi. Leyiyë Salmus 9:1 y 34:1 ima ninqanta y këpaq parlayë:
¿Bibliachö imata yachakunqëkitataq jukkunata parlapëta munanki?
WAKIN IMA NIYANQAN: “Alli nuna kashqaqa imanö adorashqapis Diospaqqa allillam”.
¿Qamqa ima ninkitan?
KËTAM YACHAKURQUNKI
Diosnintsiktaqa kushitsintsik pëllata adorar, reunionnintsikkunachö adoranapaq juntakar, y yachakunqantsikta jukkunata parlaparmi.
¿Yarpankiku?
¿Imatan yanapamantsik Diosnintsikta alli adoranapaq?
¿Imanirtan Jehovällata adoranantsik?
¿Imanirtan jukkunawan juntakunantsik Diosnintsikta adoranapaq?
MASTA YACHAKUY
Santukunata rezapaq juk warmim willakun imanir tsëta manana ruranqanta. Tsëta maslla musyanëkipaq leyi: “Kananqa mananam santukunata adoränatsu” ninqan willakuyta.
“Bibliam yanapashqa jukläyana kawakuyänampaq” (Täpakoq, 1 de juliu 2011)
Reunionkunachö parlakurinëkipaq imakuna yanapashunëkipaq kaqta yachakuy.
Mana fäcil kaptimpis reunionkunaman ëwanqan juk jövinta imanö yanapanqanta rikë.
Mëtsikaq nunakunam Diosta adorayänampaq cruzta katsiyan. ¿Tsënö adorayänantatsuraq Jehovä munan?
a Këkunapitaqa tsëpitaran masllata yachakunki.