Llapan shonquntsikwan Jehoväta qarënin qoshun
“Imata rurarpis, cushishqa llapan shonqiquicunawan rurayanqui. Tseno rurarqa [...] Diospaqmi rurecayanqui.” (COL. 3:23.)
RESPUESTANTA YARPÄRISHUN:
¿Imanötaq Jehoväta alabashwan cada hunaq kikintsikpaq ruranqantsikkunachö?
¿Imakunatataq haqintsik Jehoväta servinantsikrëkur?
Jehoväpa yachatsikïnin hinantin Patsaman chänampaq, ¿imakunawantaq yanapakushwan?
1-3. a) Jesus noqantsikrëkur wanushqana këkaptinqa, ¿mananatsuraq Jehoväta qarënin qonantsik precisan? Willakaramï. b) ¿Imatataq alliraq rikänantsik Diosta qarënin qorqa?
PUNTA cristiänokuna kawayanqan witsanmi markanta Jehová rikätsirqan, nunakunapa hutsankunarëkur Jesus wanushqa kaptin, Moises qellqanqan Leykuna manana precisanqanta (Col. 2:13, 14). Tsëmi judïokuna animalkunata pishtëkur kayayänan, y maskunata rurayänampis, manana precisarqannatsu ni yanapakurqannatsu. Imëka “pushaq” cuentam Leyqa judïokunata yanapashqana karqan Cristuta reqiyänampaq (Gal. 3:24).
2 Këqa, cristiänokunapaq sacrificiokuna rurë manana precisanqantatsu manam rikätsikun. Antis, ¡alläpa precisanqantam rikätsikun! Tsëmi apóstol Pëdrupis kënö nirqan: “Diospaq qareta apaqno peman alma y cuerpu entregaquicuyë [...] Teyta Jesucristurecur” (1 Ped. 2:5; noqakunam kinkishätsiyarqö). Y apóstol Pablupis clärom rikätsikurqan kawënintsikchö imëkatapis Dios ‘munashqannö’ ruranqantsikqa, pëpaq huk sacrificio o qarë cuenta kanqanta (Rom. 12:1).
3 Cristiänokunaqa Jehoväta qarënin qontsik pëpaqrekur imatapis rurar o servinantsikrëkur imëkatapis haqirmi. Tsëmi alliraq rikänantsik tsë qarënintsik Diosta kushitsinampaqnö kananta, hina yarpänantsikmi israelïtakunata imanö sacrificiokunata mañanqanta.
LLAPAN HUNAQKUNA QARANQANTSIK
4. ¿Llapan hunaqkuna ruranqantsikkunachö imatataq yarpänantsik?
4 Höraqa sasaran o ajaran llapan hunaqkuna ruranqantsikkuna Jehoväpaq huk qarë cuenta kanqanta yarpänantsik. Alleq mana tantearqa manam mäkuntsiktsu wayita imanöpis katsinqantsikchö, estudiochö, trabäjochö, rantipakoq ëwanqantsikchö y maskunata ruranqantsikchöpis Diosta kushitsinantsik alläpa precisanqanta. Tsëmi Jehovällatana servinapaq awnikushqana kar, o ichikllachöna tsëta rurana kaptimpis, llapanchö alli kaqta ruranantsik. Paqaspa y hunaqpapis cristiänom kantsik y llapan kawënintsikchömi Biblia ninqannö kawanantsik. Tsëmi Pablu kënö nirqan: “Imata rurarpis, cushishqa llapan shonqiquicunawan rurayanqui. Tseno rurarqa, manam nunacunapaqtsu rurayanqui, sinoqa Diospaqmi rurecayanqui” (lei Colosenses 3:18-24).
5, 6. ¿Imatataq rikätsikunantsik vestikïnintsikwan y portakïnintsikwan?
5 Awmi, kikintsikpaq cada hunaqkuna ruranqantsikkunawanqa manam Jehovätatsu adorëkantsik. Tsënö kaptimpis, apóstol Pabluqa “llapan shonqiquicunawan rurayanqui” nirqanmi, tsëmi yanapamantsik imëkata rurarpis Jehoväpaqnö ruranapaq. Tsëmi kënö tapukunantsik: “¿Shumaqku vestikö y portakö? ¿O mana alli portakur y vestikurku Jehoväpa testïgon kanqäta willakïta penqakö? ¡Tsëqa alläpa mana allichi kanman! Mana alli portakunqantsikrëkur Jehoväpa shutimpaq mana allita parlayänantaqa manam munantsiktsu (Isa. 43:10; 2 Cor. 6:3, 4, 9).
6 Pensarishun Diospaqnö ‘llapan shonquwan’ trabajëta munanqantsik, imëkata ruranqantsikchöpis imanö yanapamanqantsikman. Këpita yachakurnin, israelïtakuna alli kaq qarëta qoyänanta Jehová shuyaranqanman yarpäshun (Éxo. 23:19).
¿PIPAQNATAQ KAWANTSIK?
7. ¿Imanönataq kawantsik Jehovällapaqna kanapaq awnikushqa karqa?
7 Jehovällatana servinapaq awnirninqa, pëllapaqna kawanapaqmi nirqantsik. Huk parlakïchöqa, imëkata rurar o pasarpis pëllatana puntaman churanapaqmi awnirqantsik (lei Hebreus 10:7). Y tsëta rurarqa, ¡alli kaqtam akrarquntsik! Y rikarquntsikchi Dios munanqannö pensëkur y Biblia ninqannölla imatapis rurëta tïrashqaqa, imëkapis allilla yarqunqanta (Isa. 48:17, 18). Yachatsimaqnintsik Jehová imanöpis kanqanta rikätsikurmi santo y kushishqa markan kantsik (Lev. 11:44; 1 Tim. 1:11).
8. ¿Imatataq yachakuntsik israelïtakunapa qarëninkunata Jehová sagradotanö rikanqampita?
8 Jehoväqa alläpa sagrädotanömi rikaq sirveqnin israelïtakuna qarëninkuna apapuyanqantaqa (Lev. 6:25; 7:1). “Sagrado” nishqan palabrataqa hebreo idiömachö utilizäyaq Diosllapaq imatapis rakiyanqampaq o akrayanqampaq parlarmi. Tsëmi qarënintsikpita Dios kushikunanta munarqa, Diosta mana sirveq nunakunapatawanqa tallushwantsu. Diosnintsik chikinqantaqa manam ni imatapis kuyashwantsu (lei 1 Juan 2:15-17). Awmi, rikënimpaq mana alli këman chätsikoq rurëkunataqa manam imatapis ashinantsiktsu (Isa. 2:4; Apo. 18:4). Hina rakchakunata y mana allita rurëkaqkunatapis manam rikänantsiktsu, ni tsëkunaman pensakïkänantsiktsu (Col. 3:5, 6).
9. ¿Imanirtaq alläpa precisan nuna mayintsikta shumaq rikänantsik?
9 Pablum cristiänokunata kënö consejarqan: “Ama qonqayëtsu allicuna rureta, y cayäpushonqequicunawan jucniqui jucniquipis yanapanaquicuyë; porqui tseno rurayanqequim Diospaq allapa alli qareqa” (Heb. 13:16; noqakunam kinkishätsiyarqö). Këchömi claro rikantsik ninqanta wiyakunqantsik o wakinkunata yanapanqantsikqa Jehoväpaq alläpa alli qarë kanqanta. Nuna mayintsikkunata kuyarmi Jesuspa rasumpa qateqninkuna kanqantsikta rikätsikuntsik (Juan 13:34, 35; Col. 1:10).
DIOSTA ADORARNIN QARANQANTSIKKUNA
10, 11. ¿Imanötaq Jehová rikan wayin wayin yachatsikunqantsikta y adoranqantsikta? Y tsëta musyëqa, ¿imanötaq yanapamantsik?
10 Clärom këkan, ‘Diosnintsic llapan änimanqantsic cumplicänanpaq caqta’ willakïpis alli kaq rurëmi. ¿Mëchöpis këkarnin creinqantsikkunapita nunakunata parlapantsikku? Pablum nirqan tsëta rurarqa Diosnintsikta “llapan shonquntsicwan alabe[canqantsicta]”. Tsë rurëmi “allapa alli caq qareqa” (Heb. 10:23; 13:15; Ose. 14:2). Musyanqantsiknöpis, ëka tiempo y imanö yachatsikunqantsikqa alläpam precisan, y tsëtaqa Diospa Gobiernompita Yachatsikunapaq reunionchöpis kutin kutinmi yarpätsimantsik. Tsëmi wayin wayin o mëchö këkarpis yachatsikurqa, tsëta ruranqantsik Diospaq ‘allapa alli caq qare’ kanqanta qonqanantsiktsu, tsëmi Diospita yachatsikunqantsiktaqa imëkapitapis más precisaqpaq churanantsik. Llapantsik igualpa rurëta mana puëderpis, ëka tiempo ruranqantsikwanmi rikätsikuntsik Diospa kaqkunata imanö rikëkanqantsikta.
11 Llapan semänakunam cristiänokunaqa tiempota rakintsik hapallantsik y wakinkunawampis ëllukar o gorikar Jehoväta adoranapaq. Tsëkunata ruranapaqqa kikin Jehovämi mandakushqa. Manam unë tiemponönatsu sábado hunaqkuna hamanantsik ni Jerusalenyaq cada wata fiesta celebraq ëwanantsik. Tsënö kaptimpis, unë tiempochö rurayanqanqa kanan witsan cristiänokuna rurayanqanwampis igualanmi. Diosnintsikqa shuyaran imëka rurënintsikkunapitapis tiempota horqarïkur Palabranta yachakunata, pëman mañakunata y congregacionchö ëllukänatam. Hina casado ollqukuna familiankunata Diospita yachatsiyänantapis shuyaranmi (1 Tes. 5:17; Heb. 10:24, 25). Tsëmi, “¿puëdëmantsuraq Diospa kaqkunata más alli rurëta?” nir tapukunantsik.
12. a) Mushkoq inciensotanö, ¿imatataq Jehoväta qoshwan? b) Mañakïnintsik incienso cuenta kanqanta Biblia nikaptinqa, ¿imanötaq mañakushwan?
12 Rey Davidmi, “qampa nöpëkichö imëka inciensonö mañakïnï këkullätsun” nir Jehoväta alabarqan (Sal. 141:2). Pensarishun tsënö ninqanman y nïkur kënö tapukurishun: “¿Shumaq mushkoq inciensonöku mañakïnï? ¿Mana haqitaku mañakö? ¿Jehová chaskinampaqnöku?”. Apocalipsis libron rikätsikun ‘wamrancunapa mañaquinincuna’ Jehoväman alläpa shumaq mushkur chäriptin, imëka alli inciensotanö pë chaskinqanta (Apo. 5:8). Yarpäshun, unë witsankuna altarchö llapan hunaqkuna inciensota israelïtakuna kayayanqanqa, Jehová ninqannölla alli rurashqam kanan karqan. Y tsënö mana rurayaptinqa manam chaskeqtsu (Éxo. 30:34-37; Lev. 10:1, 2). ¿Imatataq tsëqa yachatsimantsik? Mañakunqantsikta Jehová wiyananta munarqa, alli pensëkur y respëtowanmi pë munanqannö ruranantsik.
QARANTSIK Y CHASKINTSIK
13, 14. a) ¿Imanötaq Epafroditu y Filipos cristiänokuna Pabluta yanapayarqan, y imanötaq pë tsëta rikarqan? b) ¿Imatataq Epafroditupita y Filipos cristiänokunapita yachakuntsik?
13 Hina Diospa yachatsikïnin hinantin Patsaman chänampaq atska o ichiklla qellëwan yanapakunqantsikpis, imëka qarë cuentam Diosnintsikpaq (Mar. 12:41-44). Punta cristiänokunapa tiemponchömi, Pabluta atiendenampaq y wananqankunata apanampaq Filipos congregacionpita llapan cristiänokuna Epafrodïtuta Römaman kachayarqan. Y manam tsëpinllaraqtsu tsënöqa yanapayarqan. Tsëtaqa rurayarqan Pablu qellëpaq manana yarpachakurnin más atska tiempo Diospita yachatsikunampaqmi. ¿Imanötaq tsë qarëta Pablu rikarqan? “Imeca insiensiuta cayashqa shumaq pucutaq[ta]nomi”, y tsënö rurayanqampita “Teyta Diosnintsic allapa cushishqa quecan[qantam]” nirqan (lei Filipenses 4:15-19). Rasun kaqchöqa, Pabluqa yanapayanqampita alläpam kushikurqan, hina tsënöllam Jehoväpis kushikurqan.
14 Kanan witsampis Jehoväqa alläpam kushikun hinantin Patsaman Diospita yachatsikï chänampaq ëkallawampis yanapakushqa. Pëpa mandakïninta puntaman churashqaqa, llapan wananqantsikkunata qomarnintsik yanapamänapaqmi awnimantsik (Mat. 6:33; Luc. 6:38).
JEHOVÄTA AGRADECIKUNQANTSIKTA RIKÄTSIKUSHUN
15. ¿Imakunapitataq Jehoväta agradecikushwan?
15 Jehová imëkakunata qomanqantsikpita ëka haqan kanqantsikta yuparqa, manachi ushashwantsu. ¿Manatsuraq kawëta qomanqantsikpita llapan hunaqkuna agradecikushwan? Pëqa, mikïta, röpata, wayita y shütanqantsik vientotam qomantsik. Hinamampis, pëman markäkunapaq o yärakunapagmi y alli kawëta shuyaränapaqmi rasun kaqta yachatsimantsik. Tsëmi Jehová pï kanqanman y noqantsikpaq tukïta ruranqankunaman pensashqaqa, ni imapis kantsu pëta adorëno y alabënöqa (lei Apocalipsis 4:11).
16. ¿Imanötaq rikashwan noqantsikrëkur Jesus wanunqanta?
16 Qepa kaq yachatsikïchö rikanqantsiknöpis, Diosnintsikpa alläpa shumaq qarëninmi Jesucristu noqantsikpaqrëkur wanunqanqa. ¡Imanö kuyakoq kanqantam Jehoväqa rikätsimarquntsik! (1 Juan 4:10.) Y tsënö kuyëkämashqaqa, ¿imanötaq agradecikushwan? Apóstol Pablum kënö nirqan: “Jesucristu cuyamanqantsicrecurmi peta shonqucurcur munashqanno cawantsic. Jesucristum llapantsicpaq wanorqan. [...] Tsemi wanushqa cuenta quecarnin, quiquintsicpa munenintsictaqa manana rurashwannatsu; sinoqa pe munashqanllatanam rurashwan. Porqui tsepaqmi wanurir cawarimushqa” (2 Cor. 5:14, 15). Tsënö ninqanwanmi Pabluqa rikätsimantsik, kuyamarnintsik Diosnintsik ruranqankunapita agradecikurqa, alabar y Tsurinta respetar kawanapaq kaqta. ¿Imanötaq agradecikuntsik Diosnintsikta y Jesucristuta? Mandamanqantsikkunata wiyakur, wayin wayin kushishqa yachatsikur y Jesuspa qateqnin tikrayänampaq nunakunata yanaparmi (1 Tim. 2:3, 4; 1 Juan 5:3).
17, 18. ¿Imatataq wakin cristiänokuna rurayashqa Jehoväta serviyänanrëkur? Hukta willakaramï.
17 ¿Puëdeshwantsuraq shimintsikwan Jehoväta más alli alabëta? Mëtsikaq cristiänokunam Jehová pëkunapaqrëkur ruranqanman pensar, tiemponkunata shumaq patsätsiyan pëta más serviyänampaq. Tsënöpam Diospa Gobiernompita más yachatsikuyan y huk rurëkunachöpis yanapakuyan. Wakinkunaqa watachö huk o más killakunam precursor auxiliar kayan. Wakinkunanam precursor regularnö serviyan. Y wakinkunaqa Testïgokuna Yachatsikuyänan Wayikunata rurarmi yanapakuyan. ¿Manaku tsëkunata rurarqa agradecido kayanqanta rikätsikïkäyan? Agradecikur y shonqupita patsë rurashqaqa, kushishqam Diosnintsik chaskimantsik.
18 Haqan cuenta sientekurmi mëtsikaq cristiänokuna Jehoväta más serviyänampaq sinchikuyan. Morena shutiyoq pani ruranqanta rikärishun. Rasumpa kaq yachatsikïta wambra kanqampita patsë ëwanqan iglesiachö y huk yachatsikoqkunachö ashirpis, manam tarirqantsu. Jehoväpa testïgonkunawan Bibliapita yachakurllam rasumpa kaq yachatsikïtaqa tarirqan. Tapukïninkunata Biblia contestanqanta y más yamëna kawakunampaq yanapanqanta cuentata qokurmi, pëllatana servinampaq churapakarqan. Bautizakurirllam precursora auxiliar karqan y tsëpitanam precursora regular. Pëqa kima chunka watanam llapan tiemponwan Jehoväta servikan.
19. ¿Imakunataraq rurashwan más alli kaq qarënintsikwan Jehoväta alabanapaq?
19 Musyanqantsiknöpis, manam llapan cristiänokunatsu precursornö servita puëdeyan. Tsënö karpis, puëdenqantsikmannö shonqupita patsë servirninmi Diosnintsiktaqa alläpa kushitsintsik. Tsëtaqa rurantsik alli portakunqantsikwanmi; tsë ninanqa, mandakunqankunata respetar y imë hörapis Jehoväpa testïgon kanqantsikta yarpararmi. Hina markäkïnintsikwan o yärakuynintsikwampis kushitsintsikmi; huk parlakïchöqa, Diosnintsikpa munëninkuna imanöpis cumplikänampaq kaqman paqwë markäkurmi. Y nïkurmi Diosnintsiktaqa kushitsintsik alli rurënintsikkunawan; masqa Diospita llapan nunakunata yachatsirnin. Nunaqa parlan shonqunchö imatapis yarpanqantam. Tsëmi, Jehová imëkata qaramanqantsikpita shonquntsik alläpa kushikuptinqa, kuyanqan kaqta y munanqan kaqta imëpis qarëkänantsik.
[26 kaq päginachö ninqan]
Jehová alläpa kuyakoq kanqan, ¿yanapamantsikku más alli alabanapaq?
[25 kaq päginachö dibüju]
¿Mëchö tsëchö këkarpis nunakunata Diospita parlapantsikku?