Willapäkinintsikqa ankupakurnin yanapakuna obram
1 Jesusqa cuentata qokorqam llapan yachatsikïninta wiyëkaq nunakuna, “limpu haqishqa y witsishqa mana mitseqyoq ushakunano” kayanqanta (Mat. 9:36). Tsemi kuyakurnin y ankupäkurnin Jehovapa leyninta yachatserqan, tsenomi yanaparqan maslla pekuna yachakuyänampaq. Sikush yarpashun alleq pë ruranqanta, tseqa yachakushunmi willapakoq ewarnimpis pëno ankupäkoq y kuyakoq kanapaq.
2 Yachakïkarnenqa ichik yarparishun imanoshi Jesucristu rikänaq yanapananta munar nunakuna peman ewayaptin (Luc. 5:12, 13; 8:43-48). Jesusqa allapa ankupäkoqmi karqan, tsemi tukilaya qeshyawan sufreqkunata yanaparqan (Mar. 7:31-35). Wakinkunapa llakikïninkunata rikarnimpis peqa yarpararqam manam qonqekorqantsu pekunata. Jesusqa manam nunakuna imanöpis kayanqanllatatsu rikarqan, shonqunkunacho sentimientunkunatam rikarqan (Luc. 7:36-40). Clarum kekan, tsenomi Jesusqa rikatsikorqan Diosnintsikpa perfectu ankupäkoq keninta.
3 “Ankuparqam”: Jesusqa manam willapäkorqan ruranan kaptinllatsu, sinoqa “ankuparqan” nunakuna imanopis kawayanqanta rikarninmi (Mar. 6:34). Tsenollam kanan noqantsikpis yanapeta tirashwan nunakuna kawëninta salvayänampaq, manam willapäkunantsikllatsu. Kayitaran munantsik imanirshi mä nunakuna yachatsishqa wiyakuyantsu. ¿Imakunaraq preucupätsiyan? ¿Mana alli mitseqninkunatsuraq casuyantsu tsetsuraq lluta ramakashqa ampeqcho purikuyan? Ankupäkoq y yanapakoq kenintsikta wakinkuna rikarnenqa, itsa wiyeta munayanman willapakïnintsikkunata (2 Cor. 6:4, 6).
4 Ankupakiqa shonquyaqmi chan. Kecho rikärishun huk ejempluta. Huk warmish allapa llakikurnin sufrinaq kima killayoqllaraq kekarnin wambra wanukïkuptin. Ishkaq Testigukuna punkumpa qayakuriyaptinshi wayinman pasaratsinaq, imanir Dios llakikikunata permitenqampaq yachatsikïninkunata allitsu ninanrekur. Tsepita huk tiempu pasariptinnash tse warmi ninaq: “Ankupayamarninmi shumaq wiyëkayamarqan, tsenomi yanaparayamarqan alliyärinäpaq. Tsemi pekuna ewkikayaptinna nerqa, yape wayïman kutirayämunampaq”. Y noqantsikqa, ¿esforsakikantsikku willapakoq ewarnin ankupäkoq keta?
5 Ankupäkoq karnenqa yanapashun consularmi wakinkunata. Tseno rurarninmi alabashun “kuyakoq y ankupäkoq teyta” Jehovata (2 Cor. 1:3).