‘Ancupäcoq’ kashun
1. ¿Imatataq nunakuna imëpitapis más wanayan?
1 Kanan witsannöqa, manam ni imëpis nunakuna alläpaqa wanayashqatsu yanapayänanta. Hinantin Patsachö imëka mana allikuna pasaptinmi nunakunaqa alläpa llakishqalla kawakuyan. Cristiänokunaqa musyantsikmi pï më nunakuna yanapayänanta wanayanqanta, y noqantsikpa makintsikchömi këkan pëkunata ankupäkoq o llakipäkoq kanqantsikta rikätsinantsik (Mat. 22:39; Gal. 6:10). Rikärishun nuna mayintsikta imanö yanapanapaq kaqta.
2. ¿Imanötaq ankupäkoq kanqantsikta rikätsikushwan?
2 Ankupäkoq kanqantsiktam yachatsikurninqa rikätsikuntsik. Diosnintsikllam rasumpaqa ankupämantsik (2 Cor. 1:3, 4). Kikinnö alläpa ‘ancupäcoq’ kanatam Jehoväqa munan, tsëmi Gobiernompita vecïnontsikkunata yachatsinapaq nimashqantsik (1 Ped. 3:8). Tsëta imëpis rurarllam ‘nanaq shonquyoq’ këkaq nunakunata rasumpa yanapashun, Diospa Gobiernonlla llapan hipakïta ushakätsimunan kaptin (Isa. 61:1). Jehová Diosqa alläpa llakipäkoq karninmi, ichik tiempollachöna ushakäratsimunqa llapan mana alli rurëkunata, y kë Patsata mushoqyäratsimunqa (2 Ped. 3:13).
3. ¿Imanötaq Jesus ruranqanta qatishwan?
3 Jesus nunakunata rikanqannömi rikänantsik. Jesus atskaq nunakunata yachatsirnimpis, cada nunatam precisaqpaq churaq. Jesusqa musyaqmi cada nuna Diosta alli serviyänampaq imata wanayanqanta, y mitseqninnaq üsha cuentatanö rikarmi alläpa ankupäkïwan yachatseq (Mar. 6:34). Jesusnö yachatsikurqa, llakipäkoq kanqantsiktam rikätsikushun, y tsëqa qaqllantsikchö y parlakïnintsikchöpis rikakanqam. Hinamampis, puntamanmi Diospita yachatsikïta churashun y cada nuna wananqanmannömi yanapashun (1 Cor. 9:19-23).
4. ¿Imanirtaq ‘ancupäcoq’ kanantsik?
4 Tukï nacionpita atska millón nunakunam Diospa Gobiernompita kushishqa yachakïkäyan, y yanapëta munar shumaq yachatsinqantsiktapis wiyakïkäyan. ‘Ancupäcoq’ karninqa, ankupäkoq Diospa shonquntam kushikätsintsik y shutintam alabëkantsik (Col. 3:12).