“Dios Yayapa kuyakïninchö imëpis kawakuyë”
1. ¿Imachö yanapamänapaqtaq rurayämushqa “Dios Yayapa kuyakïninchö imëpis kawakuyë” librota?
1 31 de agosto semänachömi, Bibliapita Yachakunapaq reunionchö yachakur qallashun “Dios Yayapa kuyakïninchö imëpis kawakuyë” libropita. ¡Imanö kushishqam tsë hunaq chämunanta shuyarëkantsik! Diosta kuyaqkunaman Jehoväpa Testïgonkunata Pushaqkuna cartakuyanqanchömi, kënö nin mushoq libropaq: “Llapan shonqükunawanmi munëkuyä, Dios Yayapa kuyakïninchö imëpis kawakïkänapaq kë libro yanapëkamänantsikta, y mana wanushpa kawakïman chänapaq (Judas 21)”.
2. ¿Imakunachöraq yanapamäshun kë mushoq libro?
2 Imakunatataq yachakushun: Amïgokunata akranqantsikchö, kushikunapaq imatapis ruranqantsikchö, autoridadkunata respetëchö, yachakashqa rurënintsikkunachö, casado këchö, parlakïnintsikchö, costumbrekunachö, ¿imanöraq Biblia nenqan yanapamäshun? Kë libropita yachakurmi, Biblia nenqannölla concienciantsikta yachatsishun Dios munanqannö kawakunapaq (Sal. 19:7, 8). Dios imanö pensanqantapis alli yachakurirmi, kushitsita munar imëka rurënintsikchöpis pëta wiyakushun (Pro. 27:11; 1 Juan 5:3).
3. ¿Imanirtaq Bibliapita Yachakunapaq reunionkunachö comentëta tïrashwan?
3 Comentanapaq churakäshun: Qorikashqa o ëllukashqa Markanchö Diosta alabanëkirëkur puntallapitana preparakï (Heb. 13:15). Llapantsik hukllachö ëllukëkurmi kë libropitaqa yachakushun. Yachakunantsikpaq kaq wallkalla kaptinmi, puntallapitana llapantsik alli yachakushun, tsënöpa yachakonqantsikpita mana mantsakushpa comentanapaq. Hina, puntallapitana alli yachakïkur y wallka tiempollachö comentarmi yanapanakushun alli kaqta ruranapaq y kuyanakunapaq, hinamampis alli preparakonqantsikqa shumaq y alli yachakunapaqmi yanapamäshun (Heb. 10:24). Y comentanqantsikwan fënintsikta rikätsikorqa, kushishqam kashun.
4. ¿Jehoväpa mandakïninkunata wiyakunantsik imanirtaq alläpa precisan?
4 Diosta kuyarqa mandakonqankunatam wiyakunantsik, tsëtam Jesus yachatsikorqan wanukunan paqas (Juan 15:10). “Dios Yayapa kuyakïnin” librom yanapashun imëpitapis más Biblia nenqanta ruranapaq, y ‘Dios Yayapa cuyacuyninchö imaypis cawacunapaq’ (Jud. 21, Señor Jesucristopa Alli Willacuynin Nuevo Testamento Conchucos Quechua-Norte).